Vijay Deverakonda: విజయ్‌ దేవరకొండ ‘ఫ్యామిలీ స్టార్‌’?

పెళ్లిచూపులు... గీత గోవిందం తదితర సినిమాలతో కుటుంబ ప్రేక్షకులకు చేరువయ్యారు యువ కథానాయకుడు విజయ్‌ దేవరకొండ (Vijay Deverakonda). వచ్చే సంక్రాంతికి ఆయన ‘ఫ్యామిలీ స్టార్‌’ (Family Star)గా సందడి చేసే అవకాశాలున్నాయి. పరశురామ్‌ దర్శకత్వంలో విజయ్‌ దేవరకొండ కథానాయకుడిగా ఇటీవలే ఓ చిత్రం మొదలైంది. మృణాల్‌ ఠాకూర్‌ కథానాయిక. శ్రీ వెంకటేశ్వర క్రియేషన్స్‌ పతాకంపై  దిల్‌రాజు, శిరీష్‌ సంయుక్తంగా నిర్మిస్తున్నారు. ఈ సినిమాకి ‘ఫ్యామిలీ స్టార్‌’ అనే పేరు పరిశీలనలో ఉంది. ‘గీత గోవిందం’ తర్వాత విజయ్‌ - పరశురామ్‌ కలిసి చేస్తున్న చిత్రమిది. సంక్రాంతికి ప్రేక్షకుల ముందుకు తీసుకొచ్చేందుకు సన్నాహాలు చేస్తున్నారు.

చిత్రీకరణ షురూ

కొత్త సినిమాల విషయంలో విజయ్‌ జోరు పెంచారు. ఒకవైపు ‘ఖుషి’ సినిమాని పూర్తి చేసే పనిలో ఉన్న ఆయన, కొత్తగా రెండు చిత్రాల కోసం రంగంలోకి దిగారు. అందులో ఒకటి గౌతమ్‌ తిన్ననూరి దర్శకత్వంలో రూపొందుతోంది. సితార ఎంటర్‌టైన్‌మెంట్స్‌ పతాకంపై సూర్యదేవర నాగవంశీ, సాయి సౌజన్య నిర్మిస్తున్న ఈ సినిమాలో విజయ్‌ ఓ గూఢచారిగా కనిపించనున్నారు. శ్రీలీల కథానాయిక. శుక్రవారం చిత్రీకరణ మొదలైంది. పరశురామ్‌ దర్శకత్వంలో రూపొందుతున్న సినిమా చిత్రీకరణ వచ్చే నెల నుంచి మొదలు కానుంది.