telugu movies: తెలుగు తెరకు పేరు బలం

శీర్షికల్లో భాషా సౌందర్యం
నేడు ప్రపంచ మాతృభాషా దినోత్సవం

తెలుగు సినిమాకి అచ్చమైన తెలుగు పేరు పెట్టుకుంటే.. ఆ అందమే వేరుగా ఉంటుంది. పాత రోజుల్లో ప్రతి చిత్రానికీ అలా అచ్చతెలుగు దనాన్ని శీర్షికగా పెట్టేవారు. ఆ పేర్లు ఓ వైపు చిత్ర కథా నేపథ్యానికి అద్దం పట్టేలా ఉంటూనే.. మరోవైపు తెలుగు భాషా సొబగుల్ని అద్దుకొని పరిమళించేవి. ఆధునిక పోకడల వెంట పరుగులు తీయడం మొదలు పెట్టాక.. ఆ తెలుగు వెలుగులు కాస్త మసకబారాయి. యువతరాన్ని ఆకర్షించే క్రమంలో ఆంగ్ల పదాలను పేర్లుగా పెట్టేయడం పరిపాటిగా మారిపోయింది. ఇప్పుడు చిత్రసీమలో మళ్లీ మునుపటి తెలుగు వెలుగులు కనిపిస్తున్నాయి. పలువురు దర్శక నిర్మాతలు, కథానాయకులు తమ సినిమాలకు స్వచ్ఛమైన తెలుగు పేర్లు ఖరారు చేసి.. భాషాభిమానాన్ని చాటుకుంటున్నారు. వెండితెరపై తెలుగు సొగసుల్ని గుబాళింపజేస్తున్నారు.

సాధారణంగా తెలుగు పేర్లు వినిపించడంలో చిన్న చిత్రాలే ఎక్కువ ముందుంటుంటాయి. అవన్నీ పేర్లతోనే సినీప్రియుల దృష్టిని ఆకర్షించి.. థియేటర్ల వైపు రప్పించే ప్రయత్నం చేస్తుంటాయి. ఇప్పుడీ విషయంలో అగ్ర కథానాయకులు, దర్శకుల దృక్పథాల్లోనూ మార్పు స్పష్టంగా కనిపిస్తోంది. కొత్తదనం చూపిస్తూనే.. ఆకర్షణీయమైన అచ్చ తెలుగు పేర్లు వినిపించేందుకు ఆసక్తి చూపిస్తున్నారు. ఫలితంగా ఇప్పుడు ఏ అగ్ర కథానాయకుడి ప్రచార చిత్రం చూసినా.. తెలుగుదనమే కనిపిస్తోంది. ‘శ్రీమంతుడు’, ‘భరత్‌ అను నేను’.. ఇలా దర్శకుడిగా సినీప్రయాణం ప్రారంభించినప్పటి నుంచి ప్రతి సినిమాకీ తెలుగు పేర్లనే ఖరారు చేస్తూ వస్తున్నారు కొరటాల శివ. ఇప్పుడీ క్రమంలోనే చిరంజీవి చిత్రానికి ‘ఆచార్య’ అనే పేరు ఖరారు చేసి అందరి దృష్టినీ ఆకర్షించారు. చిరు - రామ్‌ చరణ్‌ కలిసి నటించిన ఈ సినిమా ఏప్రిల్‌ 29న ప్రేక్షకుల ముందుకు రానుంది.

* వరుస సినిమాలతో జోరు చూపిస్తున్నారు కథానాయకుడు పవన్‌ కల్యాణ్‌. ఇప్పుడాయన ‘భీమ్లానాయక్‌’గా వినోదాలు పంచేందుకు   సిద్ధమవుతున్నారు. ఇది ఈనెల 25న ప్రేక్షకుల ముందుకు రానుంది. దీని తర్వాత ఆయన నుంచి రానున్న సినిమాలకి ‘హరి హర వీరమల్లు’, ‘భవదీయుడు భగత్‌సింగ్‌’ అనే నిండైన తెలుగు పేర్లనే నిర్ణయించారు.

* ‘అఖండ’గా వచ్చి అందరినీ అలరించారు నందమూరి బాలకృష్ణ. ఇప్పుడాయన గోపీచంద్‌ మలినేని  దర్శకత్వంలో ఓ చిత్రం చేస్తున్నారు. ఇప్పుడీ సినిమా కోసం ‘జై బాలయ్య’ అనే పేరును పరిశీలిస్తున్నట్లు తెలుస్తోంది.

* ‘శ్రీమంతుడు’, ‘భరత్‌ అను నేను’, ‘మహర్షి’, ‘సరిలేరు నీకెవ్వరు’.. ఇలా కొన్నాళ్లుగా తెలుగు పేర్లతోనే ప్రయాణిస్తూ వస్తున్నారు కథానాయకుడు మహేష్‌బాబు. ఇప్పుడీ పంథాలోనే పరశురామ్‌ సినిమా కోసం ‘సర్కారు వారి పాట’ అనే అచ్చ తెలుగు పేరు ఎంచుకున్నారు. ప్రస్తుతం తుది దశ చిత్రీకరణలో ఉన్న ఈ సినిమా మే 12న ప్రేక్షకుల ముందుకు రానుంది. ఇక మహేష్‌ - త్రివిక్రమ్‌ కలయికలో రూపొందుతోన్న కొత్త చిత్రానికి సైతం ‘పార్థు’ అనే పేరును పరిశీలిస్తున్నట్లు ప్రచారం వినిపిస్తోంది. ఇప్పటికే లాంఛనంగా మొదలైన ఈ సినిమా.. వచ్చే నెల నుంచి చిత్రీకరణ ప్రారంభించుకోనున్నట్లు తెలుస్తోంది.

వీళ్లూ ఆ దారిలోనే..

త్రివిక్రమ్‌, ఇంద్రగంటి మోహనకృష్ణ, క్రిష్‌ వంటి దర్శకులే కాదు.. ప్రస్తుతం వెండితెరపైకి వరుస కడుతున్న పలువురు కుర్ర దర్శకులు సైతం తెలుగు పేర్ల వైపే మొగ్గు చూపుతున్నారు. ఫలితంగా కుర్ర హీరోల సినిమాలు సైతం కమ్మనైన తెలుగు పేర్లతో ఊరిస్తున్నాయి. రానా.. ‘విరాటపర్వం’, నాని.. ‘అంటే సుందరానికి’, ‘దసరా’, శర్వానంద్‌.. ‘ఆడవాళ్లు మీకు జోహార్లు’, ‘ఒకే ఒక జీవితం’, నాగశౌర్య.. ‘కృష్ణ వ్రింద విహారి’, ‘ఫలానా అమ్మాయి ఫలానా అబ్బాయి’, విష్వక్‌ సేన్‌ ‘అశోక వనంలో అర్జున కల్యాణం’, సత్యదేవ్‌ ‘గుర్తుందా శీతాకాలం’, వైష్ణవ్‌ తేజ్‌ ‘రంగ రంగ వైభవంగా’, సుధీర్‌బాబు ‘ఆ అమ్మాయి గురించి మీకు చెప్పాలి’, సంతోష్‌ శోభన్‌ ‘అన్నీ మంచి శకునములే’, సమంత ‘శాకుంతలం’, ‘యశోద’ వంటివన్నీ పేర్లకు నిండైన  తెలుగుదనాన్ని అద్దుకున్నవే. ఇలా మంచి తెలుగు పేర్లతో    ప్రేక్షకుల ముందుకు వస్తే... గ్రామీణ స్థాయిలోనూ చిత్రాలకు ప్రచారం, ఆదరణ బాగుంటాయనేది దర్శక, నిర్మాతల భావన.

కొన్నింటితోనే ఇబ్బంది...

తమిళ, ఇతర భాషల నుంచి తెలుగు తెరపైకి ఏ చిత్రమొచ్చినా.. ఇక్కడి ప్రేక్షకుల అభిరుచికి తగ్గట్లుగా ఓ అచ్చ తెలుగు పేరును ఖరారు చేయడం ఆనవాయితీగా ఉండేది. ఇప్పుడిందుకు భిన్నమైన పరిస్థితులు కనిపిస్తున్నాయి. ఆయా భాషల సినిమాల్ని తెలుగులో నేరుగా అదే పేరుతో తీసుకొచ్చే ప్రయత్నం చేస్తున్నారు. అజిత్‌ కథానాయకుడిగా నటించిన ‘వలిమై’ ఈనెల 24న ప్రేక్షకుల ముందుకు రానుంది. దీన్ని తెలుగుతో పాటు మిగతా భాషల్లోనూ నేరుగా అదే పేరుతో విడుదల చేస్తున్నారు. అలాగే సూర్య నటించిన ‘ఎతర్కుమ్‌ తునిందవన్‌’ను.. మిగతా అన్ని భాషల్లో ‘ఈటీ’ అనే సంక్షిప్త నామంతో విడుదల చేయనున్నారు. ఇది మార్చి 10న ప్రపంచ వ్యాప్తంగా విడుదల కానుంది. అయితే ఈ చిత్రాల్ని అన్ని భాషల్లోకి అనువాదం చేస్తున్న నిర్మాతలు.. ఆయా భాషలకు తగ్గట్లుగా పేర్లు ఖరారు చేయకపోవడంపై భాషా ప్రేమికులు అసంతృప్తి వ్యక్తం చేస్తున్నారు. నామవాచకాలంటే ఏదోలే అని సరిపెట్టుకోవచ్చు.. క్రియానామాలు సైతం పరభాషా పదాలు అలాగే ఉంచడాన్ని విమర్శిస్తున్నారు.  రానున్న కొన్ని తెలుగు చిత్రాలకు సైతం ఆంగ్లంలో పేర్లు పెట్టడం మానుకోవాలని కోరుతున్నారు.