‘తండేల్‌’అంటే అర్థమదే.. చైతన్య, సాయిపల్లవికి ఇద్దరికీ అవార్డులొస్తాయి!

Thandel Meaning (హైదరాబాద్‌): ‘తండేల్‌’లో నటకుగానూ నాగచైతన్య (Naga Chaitanya), సాయిపల్లవి (Sai Pallavi) ఇద్దరికీ అవార్డులు వస్తాయని నిర్మాత అల్లు అరవింద్‌ ఆశాభావం వ్యక్తం చేశారు. చందూ మొండేటి దర్శకత్వంతో రూపొందిన చిత్రమిది. బన్నివాసు నిర్మాత. అల్లు అరవింద్‌ సమర్పకులుగా వ్యవహరిస్తున్నారు. చిత్రీకరణ చివరి దశకు వచ్చిన ఈ మూవీని ఫిబ్రవరి 7న విడుదల (Thandel release date) చేయనున్నట్లు చిత్రం బృందం ప్రకటించింది. ఈ సందర్భంగా విలేకరులు (thandel movie press meet) అడిగిన పలు ప్రశ్నలకు సమాధానం ఇచ్చారు.

సంక్రాంతి నుంచి ఫిబ్రవరికి వాయిదా వేయడానికి కారణం?

అల్లు అరవింద్‌: సంక్రాతికి రావాలని అందరూ అనుకుంటారు. తాజాగా జరుగుతోన్న పరిణామాలను బట్టి ఈ నిర్ణయం తీసుకున్నాం. రానున్న సంక్రాంతికి నాలుగు పెద్ద సినిమాలున్నాయి. వాటికి థియేటర్లు షేర్‌ అవుతాయి. మాకు ఏ పోటీ లేకుండా రావాలని ఉంది. అందుకే ఫిబ్రవరి 7న రిలీజ్‌ చేస్తున్నాం. మార్చి మొదటి వారంలో పరీక్షలు ఉన్నాయి. అందుకే ఫిబ్రవరి 28 చేయలేదు.

‘పుష్ప’తో అల్లు అర్జున్‌కు నేషనల్‌ అవార్డు వచ్చింది.. తండేల్‌తో సాయి పల్లవికి కూడా ఇలాంటి అవార్డు వస్తుందా?

అల్లు అరవింద్‌: ఈ సినిమా సాయి పల్లవికి, నాగచైతన్యకు నేషనల్‌ అవార్డు తీసుకురావాలని కోరుకుంటున్నా. అది జరిగే అవకాశం ఉంది.

ఈ మధ్య బాయ్‌కాట్‌ సాయిపల్లవి ట్రెండ్‌ అవుతోంది. రూ.100కోట్ల క్లబ్‌లో చేరుతుందనుకుంటున్నారా?

బన్నివాసు: రూ.100కోట్ల క్లబ్‌లో చేర్చడం కోసం మా ప్రయత్నం చేస్తున్నాం. అది నా విష్‌. నెరవేరాలని కోరుకుంటున్నాం. ఇందులో మంచి కంటెంట్‌ ఉంది.

100పర్సంట్‌ లవ్‌ తర్వాత నాగచైతన్యతో మళ్లీ ఇన్ని రోజులకు సినిమా చేస్తున్నారు? ఆయనలో ఏమైనా మార్పు చూశారా?

బన్నివాసు:  ఆయన అప్పుడు ఎలా ఉన్నారో.. ఇప్పడూ అలానే ఉన్నారు. ఈ చిత్రం కోసం ఎంతో కష్టపడ్డారు.

‘పుష్ప2’ విడుదల విషయంలోనూ మీరు సలహా ఇచ్చారా?

అల్లు అరవింద్‌: లేదు. ఆ సినిమా రిలీజ్‌ కోసం పెట్టిన మీటింగ్‌లో నేను పాల్గొన్నాను. కానీ, విడుదలపై సలహా ఇవ్వలేదు.

ఈ సినిమాను తెలుగు,తమిళ, హిందీలోనే విడుదలచేస్తున్నారా.. మిగతా భాషల్లో కూడా రిలీజ్‌ అవుతుందా?

అల్లు అరవింద్‌: ఈ మూడు భాషలపైనే ఎక్కువ శ్రద్ధ పెట్టాం. మలయాళం, కన్నడలో కూడా విడుదల చేస్తాం. ఈ మధ్య ఒక సినిమా పోస్టర్‌ విడుదల చేసి 14 భాషల్లో రిలీజ్‌ అంటున్నారు. మేము అలా చేయాలని అనుకోవడం లేదు.

‘తండేల్‌’ అని టైటిల్ పెట్టడానికి కారణం?

చందూ: ‘తండేల్‌’ అనేది సినిమా చర్చల సమయంలోనే తెలుసుకున్నాం. ‘తండేల్’ అంటే లీడర్‌ అని అర్థం. త్వరలోనే ఈ విషయంపై క్లారిటీ ఇస్తూ.. మరో ప్రెస్‌మీట్‌ పెడతాం (నవ్వుతూ)