రిజర్వేషన్లపై తేలిన తర్వాతే స్థానిక ఎన్నికలపై మాట్లాడాలి!

మంత్రి పొంగులేటికి పీసీసీ అధ్యక్షుడు మహేశ్‌కుమార్‌గౌడ్‌ సూచన

ఈనాడు, హైదరాబాద్‌: రిజర్వేషన్ల అంశం తేలిన తర్వాతే స్థానిక ఎన్నికల నిర్వహణపై మాట్లాడాలని మంత్రి పొంగులేటి శ్రీనివాసరెడ్డికి పీసీసీ అధ్యక్షుడు మహేశ్‌కుమార్‌గౌడ్‌ సూచించారు. త్వరలో స్థానిక సంస్థల ఎన్నికలుంటాయని మంత్రి ప్రకటన చేసిన నేపథ్యంలో పీసీసీ చీఫ్‌ మంత్రితో మాట్లాడినట్లు పార్టీ వర్గాలు తెలిపాయి. మంత్రివర్గంలో చర్చించాల్సిన అంశాలను ముందుగానే మీడియాతో మాట్లాడితే ఎలా? అని ప్రశ్నించినట్లు సమాచారం. కోర్టు పరిధిలో ఉన్న అంశాలపై మంత్రులు మాట్లాడేటప్పుడు అన్ని అంశాలను పరిగణనలోకి తీసుకోవాలని సూచించినట్లు తెలుస్తోంది. పార్టీతో ముందుగా సంప్రదించకుండా ఎన్నికలపై ప్రకటనలు చేయవద్దని మహేశ్‌కుమార్‌గౌడ్‌ మంత్రికి సూచించినట్లు పార్టీ వర్గాలు తెలిపాయి.