‘317 జీఓ’ ఉపాధ్యాయ బదిలీ దరఖాస్తులు 6,500

ఈనాడు, హైదరాబాద్‌: రాష్ట్రవ్యాప్తంగా 317 జీఓ ద్వారా బదిలీ అయిన ఉపాధ్యాయుల నుంచి తాత్కాలిక బదిలీ(డిప్యుటేషన్‌) కోసం సుమారు 6,500 దరఖాస్తులు అందాయి. దరఖాస్తు చేసుకునే గడువు ఈ నెల 26తో ముగిసింది. దరఖాస్తులను ఆయా డీఈఓలు పరిశీలిస్తే చివరకు అర్హత కలిగిన దరఖాస్తుల సంఖ్య 3 వేల నుంచి 4 వేలకు మించకపోవచ్చని విద్యాశాఖ వర్గాలు భావిస్తున్నాయి. బదిలీల్లో స్పౌజ్, పరస్పర తదితర కేటగిరీల కింద లబ్ధిపొందిన వారు, 2021లో 317 జీఓ జారీ చేసిన అనంతరం పదోన్నతులు పొందిన వారు తాత్కాలిక బదిలీకి అనర్హులు. దరఖాస్తుల పరిశీలన తర్వాత ఉమ్మడి జిల్లాలో కోరుకున్న జిల్లా పరిధిలో ఖాళీల ఆధారంగా తాత్కాలిక బదిలీకి ఆదేశాలు జారీ చేయనున్నారు. గరిష్ఠంగా మూడేళ్లపాటే బదిలీ చేస్తారు. ఒకసారి మాత్రమే ఈ వెసులుబాటును వినియోగించుకోవాల్సి ఉంటుంది.