నాగన్‌పల్లిలో ఎన్‌ఐఆర్‌డీ బృందం పర్యటన

‘రామోజీ ఫౌండేషన్‌’ చేపట్టిన అభివృద్ధి పనుల పరిశీలన

‘రామోజీ ఫౌండేషన్‌’ చేపట్టిన పనుల గురించి ఎన్‌ఐఆర్‌డీ అధికారులకు వివరిస్తున్న జగన్‌. చిత్రంలో శ్రీనివాస్‌ తదితరులు

ఇబ్రహీంపట్నం, న్యూస్‌టుడే: కార్పొరేట్‌ సామాజిక బాధ్యత(సీఎస్‌ఆర్‌)లో భాగంగా... రంగారెడ్డి జిల్లా నాగన్‌పల్లి గ్రామంలో సుమారు రూ.22 కోట్లతో రామోజీ ఫౌండేషన్‌ చేపట్టిన వివిధ అభివృద్ధి పనులను నేషనల్‌ ఇన్‌స్టిట్యూట్‌ ఆఫ్‌ రూరల్‌ డెవలప్‌మెంట్‌(ఎన్‌ఐఆర్‌డీ) ఆధ్వర్యంలో 14 రాష్ట్రాలకు చెందిన అధికారుల బృందం బుధవారం పరిశీలించింది. ఐదు రోజుల శిక్షణలో భాగంగా ఉదయం గ్రామాన్ని అధికారులు సందర్శించారు. నాగన్‌పల్లిలో రామోజీ ఫౌండేషన్‌ నిర్మించిన పాఠశాల, తాగునీటి ట్యాంకులు, సీసీ రోడ్లు, డంపింగ్‌ యార్డు, భూగర్భ డ్రైనేజీలు, వైకుంఠధామం, పల్లె ప్రకృతివనం, బస్టాండ్‌ తదితరాలను పరిశీలించారు. మాజీ సర్పంచ్‌ జగన్‌తోపాటు భువనగిరి ఎంపీడీవో శ్రీనివాస్‌ల నుంచి వివరాలను అడిగి తెలుసుకున్నారు. ఎన్‌ఐఆర్‌డీ బృందంతోపాటు కో-ఆర్డినేటర్‌ జ్యోతి, ఎంపీడీవో వెంకటమ్మ పాల్గొన్నారు.