రైల్వే ట్రాక్షన్‌ వ్యవస్థ అప్‌గ్రేడ్‌కు రూ.188 కోట్లు

ప్రతిపాదనలకు రైల్వే శాఖ ఆమోదం

ఈనాడు, హైదరాబాద్‌: దక్షిణ మధ్య రైల్వే జోన్‌ పరిధిలోని పగిడిపల్లి-గుంటూరు, మోటమర్రి-విష్ణుపురం రైల్వే సెక్షన్లలో విద్యుత్‌ వ్యవస్థను మెరుగుపరిచేందుకు రైల్వే శాఖ బుధవారం గ్రీన్‌ సిగ్నల్‌ ఇచ్చింది. ఈ ప్రాజెక్టును రూ.188.31 కోట్ల వ్యయంతో చేపడతారు. ప్రస్తుతం ఈ రెండు మార్గాల్లో 25 కేవీ విద్యుత్‌ వ్యవస్థ ఒక్కోటి ఉంది. వీటిని రెండు 25 కేవీ విద్యుత్‌ వ్యవస్థలుగా అభివృద్ధి చేయనున్నారు.

రైళ్ల వేగం పెంచడానికి ఆస్కారం

పగిడిపల్లి-గుంటూరు, మోటమర్రి-విష్ణుపురం మధ్య దాదాపు 337 రూట్‌ కిలోమీటర్లు ఉంటుంది. ఇవి ప్రస్తుతం సింగిల్‌ లైన్‌ మార్గాలు. ఈ మార్గాల్లో ఎలక్ట్రిక్‌ ట్రాక్షన్‌ సిస్టమ్‌ను మెరుగుపరిస్తే అధిక వోల్టేజ్‌తో విద్యుత్‌ సరఫరా అవుతుంది. తద్వారా ప్రస్తుతం తిరిగే రైళ్లను అధిక వేగంతో, ఎక్కువ సామర్థ్యంతో నడపడానికి వీలవుతుంది.

రద్దీ మార్గానికి ప్రత్యామ్నాయం బలోపేతం

సికింద్రాబాద్‌-విజయవాడ చాలా రద్దీగా ఉండే రైల్వే మార్గం. పగిడిపల్లి-గుంటూరు, విష్ణుపురం-మోటమర్రి సెక్షన్‌... సికింద్రాబాద్‌-విజయవాడ మధ్య ప్రత్యామ్నాయ మార్గంగా పనిచేస్తుంది. ఈ రెండు మార్గాల్లో మరిన్ని రైళ్లను నడపడానికి పగిడిపల్లి-గుంటూరు, విష్ణుపురం- మోటమర్రి సెక్షన్‌లో ఎలక్ట్రిక్‌ ట్రాక్షన్‌ సిస్టమ్‌ను మెరుగుపరచాలని నిర్ణయించాం. ఈ సెక్షన్‌ను రానున్న మూడు సంవత్సరాల్లో రూ.188 కోట్లతో మెరుగుపరుస్తాం.

అశ్వినీ వైష్ణవ్, రైల్వే మంత్రి