12,911 టన్నుల తడిసిన ధాన్యం బాయిల్డ్‌ మిల్లులకు కేటాయింపు

నాలుగు జిల్లాలపై పౌరసరఫరాల సంస్థ నిర్ణయం 

ఈనాడు, హైదరాబాద్‌: తుపాను ప్రభావంతో కొనుగోలు కేంద్రాల్లో వర్షాలకు తడిసిన ధాన్యంలో 12,911 టన్నులు బాయిల్డ్‌ మిల్లులకు కేటాయిస్తూ పౌరసరఫరాల సంస్థ నిర్ణయం తీసుకుంది. ఇందులో 7,411 టన్నులు ఆయా మిల్లులకు శుక్రవారం తరలించారు. ఎఫ్‌సీఐ నిబంధనల మేరకు ధాన్యం కొనుగోలు చేయాలంటే తేమ 17% దాటకూడదు. కొద్దిరోజులుగా కురుస్తున్న వర్షాలతో పలు జిల్లాల్లో కొనుగోలు కేంద్రాల్లో ధాన్యం తడిసింది. రాష్ట్రవ్యాప్తంగా 10 జిల్లాల్లో ధాన్యం కొనుగోళ్లు జరుగుతుండగా సిద్దిపేట, కరీంనగర్, నిజామాబాద్, నల్గొండ నాలుగు జిల్లాల్లో నష్టం తీవ్రంగా ఉందని అధికారులు పేర్కొన్నారు. సిద్దిపేట జిల్లా హుస్నాబాద్‌ మార్కెట్‌యార్టులో తూకం వేసినవాటితోపాటు వేయని ధాన్యం కలిపి 526 టన్నుల్ని బాయిల్డ్‌మిల్లులకు కేటాయించారు. అందులో ఇప్పటికే 400 టన్నులను మిల్లులకు తరలించారు. నల్గొండ జిల్లాలో 4,600 టన్నుల తడిసిన ధాన్యంలో 2,600 టన్నుల వడ్లను బాయిల్డ్‌మిల్లులకు తరలించినట్లు పౌరసరఫరాల సంస్థ జీఎం నాగేశ్వరరావు తెలిపారు.