సకాలంలో ఈ-బస్సులు సరఫరా చేయాలి

మంత్రి పొన్నం సమీక్ష

విద్యుత్‌ బస్సులపై సమీక్షిస్తున్న మంత్రి పొన్నం ప్రభాకర్‌. చిత్రంలో నాగిరెడ్డి, వికాస్‌రాజ్‌ 

ఈనాడు, హైదరాబాద్‌: హైదరాబాద్‌కు వచ్చే ఈ-బస్సులు సకాలంలో సరఫరా అయ్యేలా, సాంకేతిక సమస్యలు లేకుండా చూడాలని రవాణాశాఖ మంత్రి పొన్నం ప్రభాకర్‌ ఆదేశించారు. విద్యుత్‌ బస్సుల తయారీ సంస్థల ప్రతినిధులు, ఉన్నతాధికారులతో మంత్రి శుక్రవారం సచివాలయంలో సమీక్ష నిర్వహించారు. ‘పీఎం ఈ-డ్రైవ్‌’ కింద హైదరాబాద్‌ నగరానికి 2 వేల ఎలక్ట్రిక్‌ బస్సులను కేంద్రం కేటాయించిన నేపథ్యంలో వాటికి కావాల్సిన మౌలిక సదుపాయాల కల్పన, నిర్వహణలో ఎదురయ్యే సవాళ్లపై చర్చించారు. కొత్త విద్యుత్‌ బస్సుల విషయంలో పూర్తి సహకారం అందిస్తామని, ఎంపిక చేసిన బస్‌ డిపోల్లో హై-టెన్షన్‌ విద్యుత్‌ కనెక్షన్లను సకాలంలో ఏర్పాటు చేస్తామని తెలిపారు. గత అనుభవ సమస్యలను బస్సుల తయారీ కంపెనీల ప్రతినిధుల దృష్టికి ఉన్నతాధికారులు తీసుకెళ్లారు. ప్రత్యేక ప్రధాన కార్యదర్శి వికాస్‌రాజ్, ఆర్టీసీ ఎండీ నాగిరెడ్డి, అధికారులు పాల్గొన్నారు.