రన్‌వేపైకి వెళ్లిన విమానంలో పొగలు

పైలట్‌ అప్రమత్తతతో తప్పిన ప్రమాదం

శంషాబాద్, న్యూస్‌టుడే: రన్‌వేపైకి వెళ్లిన ఇండిగో విమానంలో పొగలు వచ్చిన సంఘటన శంషాబాద్‌ విమానాశ్రయంలో శనివారం రాత్రి చోటు చేసుకుంది. ఎయిర్‌పోర్ట్‌ అధికారులు తెలిపిన వివరాల ప్రకారం.. ఇండిగో ఎయిర్‌లైన్స్‌ విమానం 206 మంది ప్రయాణికులను ఎక్కించుకొని పశ్చిమ బెంగాల్‌లోని సిలిగురికి టేకాఫ్‌ తీసుకోవడానికి రాత్రి 8.20 గంటలకు రన్‌వేపైకి వచ్చింది. గాలిలోకి ఎగరడానికి సిద్ధమవుతుండగా విమానంలో పొగలు రావడంతో ప్రయాణికులు భయభ్రాంతులకు గురయ్యారు. అప్రమత్తమైన పైలట్‌ వెంటనే విమానాన్ని వెనక్కి తీసుకొచ్చారు. ఇంజినీరింగ్‌ నిపుణులు సాంకేతిక లోపాన్ని గంటన్నరపాటు శ్రమించి సరిచేశారు. దీంతో 2 గంటలు ఆలస్యంగా బయలుదేరింది. 

జెడ్డా విమానానికి బాంబు బెదిరింపు

సౌదీ అరేబియాలోని జెడ్డా నుంచి ఇండిగో ఎయిర్‌లైన్స్‌ విమానం శనివారం 179 మంది ప్రయాణికులతో హైదరాబాద్‌కు టేకాఫ్‌ తీసుకున్న తర్వాత బాంబు బెదిరింపు వచ్చింది. ఎయిర్‌పోర్ట్‌ ఆపరేషన్‌ సెంటర్‌ అధికారులు గగనతలంలో ప్రయాణిస్తున్న ఆ విమానాన్ని దారి మళ్లించి ముంబయిలో అత్యవసరంగా ల్యాండ్‌ చేశారు. క్షుణ్ణంగా తనిఖీలు చేయగా ఎలాంటి పేలుడు పదార్థాలు లభించలేదు. దీంతో విమానం 8 గంటలు ఆలస్యంగా శంషాబాద్‌ చేరుకుంది.