10% పెరిగిన జీఎస్టీ ఆదాయం

ఈనాడు, దిల్లీ: జీఎస్టీ రేట్ల హేతుబద్ధీకరణ తర్వాత తెలంగాణ ఆదాయం 10% పెరిగింది. ఆంధ్రప్రదేశ్‌ ఆదాయం 9% తగ్గింది. దేశవ్యాప్తంగా సగటున 4.6% వృద్ధి నమోదైంది. కేంద్ర ఆర్థికశాఖ శనివారం విడుదల చేసిన అక్టోబరు గణాంకాలు ఈ విషయాన్ని వెల్లడించాయి. సెప్టెంబరు 22 నుంచి కొత్త జీఎస్టీ రేట్లు అమల్లోకి వచ్చిన సంగతి తెలిసిందే. ఈ మేరకు అక్టోబరులో తెలంగాణ ఖజానాకు రూ.5,726 కోట్లు జమ అయ్యింది. గతేడాది ఇదే నెలలో వచ్చిన రూ.5,211 కోట్ల కంటే ఇది 10% ఎక్కువ. ఇదే సమయంలో ఆంధ్రప్రదేశ్‌కు రూ.3,490 కోట్ల ఆదాయం వచ్చింది. గతేడాది అక్టోబరుతో పోలిస్తే ఇది 9% తక్కువ. ఎస్‌జీఎస్టీ సెటిల్‌మెంట్‌ తర్వాత 2025-26 ఆర్థిక సంవత్సరంలో ఇప్పటివరకు తెలంగాణకు రూ.26,334 కోట్ల ఆదాయం వచ్చింది.