కాలుతున్న శవాలపైనా బంగారం వేట

బంగారం ధర తారస్థాయికి చేరుతున్న కొద్దీ.. కొందరిలో మానవత్వం అధఃపాతాళానికి దిగజారుతోంది.  మెదక్‌ జిల్లా చేగుంటలో ఇద్దరు వృద్ధులు చనిపోయాక శ్మశానంలో వారి చితాభస్మాన్ని ఎత్తుకెళ్లిన ఘటన వెలుగు చూసింది. స్థానిక ఎస్సై చైతన్యరెడ్డి తెలిపిన ప్రకారం... గ్రామానికి చెందిన వృద్ధురాళ్లు మురాడి నర్సమ్మ గత నెల 30న, నాగమణి 31న మృతి చెందారు. ఇద్దరి అంత్యక్రియలు స్థానిక వైకుంఠధామంలో నిర్వహించారు. శనివారం నాగమణి కుటుంబసభ్యులు వైకుంఠధామానికి వెళ్లగా.. చితిపై నీళ్లు పోసి సగం కాలిన మృతదేహాన్ని బయటకు తీసినట్లు ఉండటం చూసి నిర్ఘాంతపోయారు. పక్కనే నర్సమ్మ చితి వద్దకు వెళ్లి చూడగా.. తల భాగంలోని చితాభస్మం మొత్తం ఎత్తుకెళ్లినట్లు గుర్తించారు. అంత్యక్రియల సమయంలో చితిపై ఉన్న మృతదేహం నోట్లో కొద్దిగా బంగారం పెడుతుంటారు. వృద్ధుల చెవి పోగులను అలాగే వదిలేస్తుంటారు. దొంగలు వీటి కోసమే ఇలా చేసి ఉంటారని అనుమానిస్తున్నారు.

న్యూస్‌టుడే, చేగుంట