మార్చురీ ఘటనపై విచారణ నివేదిక అందజేత

విధుల నుంచి ఇద్దరి తొలగింపు

ఈనాడు, హైదరాబాద్, మహబూబాబాద్, న్యూస్‌టుడే: మహబూబాబాద్‌ ప్రభుత్వ జనరల్‌ ఆసుపత్రిలో బతికున్న వ్యక్తిని మార్చురీలో పెట్టిన ఘటనపై విచారణ పూర్తయింది. ఈ వ్యవహారంలో సిబ్బంది నిర్లక్ష్యంగా వ్యవహరించినట్లు విచారణ కమిటీ సభ్యులు నివేదికను శనివారం డీఎంఈకి అందజేశారు. అనారోగ్యంతో రాజు అనే వ్యక్తి ఇటీవల మహబూబాబాద్‌ ఆసుపత్రికి రాగా.. అక్కడి వారు క్యాజువాలిటీలో వైద్యం అందించకుండా.. బతికుండగానే మార్చురీలో మంచంపై పడుకోబెట్టిన ఘటన రాష్ట్రంలో సంచలనం రేపింది. ఈ ఘటనపై డీఎంఈ నరేంద్రకుమార్‌ ముగ్గురు వైద్యులతో విచారణ కమిటీని నియమించారు. ఆ కమిటీ సభ్యులు శుక్రవారం ఆసుపత్రికి వెళ్లి ఘటనకు దారి తీసిన అంశాలను ఆరా తీశారు. ఆసుపత్రి పర్యవేక్షకుడితో పాటు ఇతర వైద్యులు, సిబ్బందితో మాట్లాడారు. బాధితుడి వెంట అటెండెంట్‌లు లేరని చికిత్స చేయకుండా నిర్లక్ష్యం వహించినట్లు విచారణలో తేలిందని సమాచారం. ఈ ఘటనలో మార్చురీ వద్ద నిర్లక్ష్యంగా వ్యవహరించిన ప్రైవేటు ఏజెన్సీ సెక్యూరిటీ గార్డు, సెక్యూరిటీ సూపర్‌వైజర్‌ను శనివారం విధుల నుంచి తొలగించారు. మహబూబాబాద్‌ ఎమ్మెల్యే డాక్టర్‌ భూక్యా మురళీనాయక్‌ ఆసుపత్రిని సందర్శించి వైద్యులతో సమీక్ష నిర్వహించారు.