అవసరమున్న చోట టీచర్ల సర్దుబాటు

పాఠశాల విద్యాశాఖ సంచాలకుడి ఆదేశాలు 

ఈనాడు, హైదరాబాద్‌: పాఠశాలల్లో అధికంగా టీచర్లు ఉన్నచోట నుంచి అవసరమున్న పాఠశాలలకు సర్దుబాటు ద్వారా పంపాలని, ఆ ప్రక్రియ త్వరగా పూర్తి చేయాలని పాఠశాల విద్యాశాఖ సంచాలకుడు డాక్టర్‌ నవీన్‌ నికోలస్‌ డీఈఓలను ఆదేశించారు. ఈ మేరకు ఆయన ఇటీవల ఉత్తర్వులు జారీ చేశారు. ఇప్పటికే సర్దుబాటు చేసినా కొన్ని పాఠశాలల్లో కొరత ఉందని, అదే సమయంలో అనేక చోట్ల ఎక్కువ ఉపాధ్యాయులు ఉన్నారని పేర్కొన్నారు. అందువల్ల అవసరమైన పాఠశాలలకు వారిని తాత్కాలిక బదిలీ చేయాలన్నారు. పలు జిల్లాల్లో సర్దుబాటుకు ఉత్తర్వులిచ్చినా.. అనేక మంది ప్రజాప్రతినిధులతో ఒత్తిడి చేయించి, వాటిని నిలిపివేయించుకున్నారు. ఆ విషయం సంచాలకుడి దృష్టికి రావడంతో మరోసారి ఆదేశాలిచ్చినట్లు సమాచారం. ఏడాదికి ఒకసారి సర్దుబాటు చేయడం కాదని.. ఒక ఉపాధ్యాయుడు పదవీ విరమణ పొందినా, దీర్ఘకాలిక సెలవులో వెళ్లినా, ఆ స్థానంలో మరో టీచర్‌ను నియమించాలని ఇటీవల డీఈఓలను మౌఖికంగా ఆదేశించారు.