కుభీరులో టోకెన్ల పంపిణీలో తోపులాట

ఇద్దరు మహిళా రైతులకు గాయాలు

టోకెన్ల కోసం బారులు తీరిన మహిళా రైతులు

కుభీరు, న్యూస్‌టుడే: నిర్మల్‌ జిల్లా కుభీరు ప్రాథమిక వ్యవసాయ సహకార సంఘంలో శనివారం సోయా కొనుగోళ్ల కోసం చేపట్టిన టోకెన్ల పంపిణీలో తోపులాట జరిగింది. ఇందులో ఇద్దరు మహిళలకు తీవ్ర గాయాలయ్యాయి. టోకెన్ల కోసం రైతులు వేకువజామున సంఘం కార్యాలయానికి చేరుకున్నారు. వరుసలో చెప్పులు, రాళ్లు పెట్టారు. కార్యాలయం తెరవగానే పెద్దసంఖ్యలో బారులు తీరారు. అధికారులు టోకెన్లకు అవసరమైన పత్రాలు తీసుకునే క్రమంలో తోపులాట జరిగింది. దీంతో గచ్చుపై నుంచి కిందపడటంతో కుభీరుకు చెందిన బత్తిని చంద్రబాయి, పార్డి(కె) గ్రామానికి చెందిన శానే లక్ష్మీబాయిలు గాయపడ్డారు. పలువురు రైతులు స్వల్పంగా గాయపడ్డారు. ఎస్సై కృష్ణారెడ్డి పరిస్థితిని చక్కదిద్దారు. అనంతరం పీఏసీఎస్‌ సీఈఓ క్రాంతికుమార్, సిబ్బంది రైతులకు టోకెన్లు జారీ చేశారు.