ఆయిల్‌పాం దిగుమతి శాతంలో తెలంగాణ హవా!

దేశంలోనే అత్యధిక ఓఈఆర్‌ 20.01% నమోదు 

అత్యధిక ఓఈఆర్‌ సాధించిన అప్పారావుపేట పామాయిల్‌ పరిశ్రమ

అశ్వారావుపేట, న్యూస్‌టుడే: ఈ ఏడాది భారీ వర్షాలతో చాలా పంటలు దెబ్బతిన్నా ఆయిల్‌పాం మాత్రం బలంగా నిలిచింది. ఈ క్రమంలో దేశంలోనే అత్యధిక ఓఈఆర్‌ (నూనె దిగుమతి శాతం) నమోదుతో తెలంగాణ రికార్డు సృష్టిస్తోంది. తొలిసారిగా మలేసియా ఓఈఆర్‌కు సమానంగా అప్పారావుపేట పామాయిల్‌ పరిశ్రమ 20.01% సాధించిందని పరిశ్రమ మేనేజర్‌ కల్యాణ్‌ తెలిపారు. ఓఈఆర్‌ పెరిగితే గెలల ధర కూడా భారీగా పెరుగుతుందన్నారు. 2024 నవంబరు 1 నుంచి 2025 అక్టోబరు 31తో ఆయిల్‌ సంవత్సరం ముగుస్తుంది. ఈ ఏడాది కాలంలో అశ్వారావుపేట పరిశ్రమలో 1,02,343 టన్నులు, అప్పారావుపేటలో 2,26,609 టన్నులు, ఇటీవలే ట్రయల్‌రన్‌ చేసిన సిద్దిపేట జిల్లా నర్మెట్ట పరిశ్రమలో 2,500 టన్నుల గెలలు గానుగ ఆడారు. దీంతో ఈ ఏడాది నిర్దేశించిన 3 లక్షల టన్నుల లక్ష్యాన్ని మించి 3,31,452 టన్నులు గానుగ ఆడారు. ఈ క్రమంలోనే అప్పారావుపేట పరిశ్రమ సగటు ఓఈఆర్‌ 20.01% రాగా అశ్వారావుపేటలో 19.47% వచ్చింది. ఆయిల్‌పాం రైతులకు ఈ ఏడాది సగటు ధర టన్నుకు రూ.19,700 దక్కింది. 2023-24 ఏడాదితో పోల్చితే రూ.4,690 ఎక్కువ వచ్చింది. 2025 అక్టోబరులో టన్ను గెల ధర రూ.19,681గా ఖరారైంది.