అడవిలో 8 కి.మీ. నడిచొచ్చి ఓటేసి..

ఓటు వేసేందుకు అడవిలో వాగు దాటి వెళ్తున్న రేగళ్లగుంపు గొత్తికోయలు 

భద్రాద్రి కొత్తగూడెం జిల్లా అశ్వారావుపేట మండలం రేగళ్లగుంపునకు చెందిన గొత్తికోయలు కారడవిలో రాళ్లూరప్పల మార్గంలో వాగులూ వంకలూ దాటి 8 కిలో మీటర్ల దూరం కాలినడకన వెళ్లి ఓటు వేశారు. 20 ఏళ్ల కిందట ఛత్తీస్‌గఢ్‌ నుంచి వలస వచ్చిన 45 గొత్తికోయ కుటుంబాలు బచ్చువారిగూడెం పంచాయతీ పరిధిలోని దట్టమైన అటవీ ప్రాంతంలో నివాసం ఏర్పాటు చేసుకున్నాయి. ప్రస్తుతం 200 మందికి పైగా జనాభా ఉన్న ఇక్కడ 97 మందికి ఓటుహక్కు ఉంది. ఆదివారం నిర్వహించిన రెండో విడత గ్రామ పంచాయతీ ఎన్నికల సందర్భంగా రేగళ్లగుంపునకు చెందిన గొత్తికోయలంతా కాలినడకన బచ్చువారిగూడెం పోలింగ్‌ కేంద్రానికి వెళ్లి ఓటు వేశారు. చంటి బిడ్డలున్న తల్లులు సైతం వారిని ఎత్తుకుని ఎనిమిది కిలో మీటర్ల దూరం నడిచి వచ్చి మరీ ఓటు వేయడం విశేషం.    -న్యూస్‌టుడే, అశ్వారావుపేట గ్రామీణం