Hyderabad: హైదరాబాద్‌లో కుండపోత.. జలమయమైన రహదారులు

హైదరాబాద్‌: నగర వాసులను వరుణుడు బెంబేలెత్తిస్తున్నాడు. హైదరాబాద్‌లోని పలు ప్రాంతాల్లో భారీ వర్షం కురుస్తోంది. సికింద్రాబాద్‌, తార్నాక, అమీర్‌పేట, ఎర్రగడ్డ, కూకట్‌పల్లి, గచ్చిబౌలి మాదాపూర్‌ తదితర ప్రాంతాల్లో రహదారులు జలమయమయ్యాయి. పెద్దఅంబర్‌పేట నుంచి హైదరాబాద్ సిటీలోకి వెళ్లే రోడ్డుపై ట్రాఫిక్‌ జామ్‌ అయ్యింది. భాగ్యలత ప్రాంతంలో నీరు నిల్వ ఉండిపోవడంతో వాహనాలు నెమ్మదిగా కదులుతున్నాయి. సైదాబాద్‌ రెడ్డి కాలనీలో రోడ్లపైకి వర్షపు నీరు వచ్చింది. దీంతో బయటకు వెళ్లేందుకు స్థానికులు ఇబ్బంది పడుతున్నారు. జీహెచ్‌ఎంసీ పరిధిలో రాత్రి 10 గంటల వరకు వెల్లడైన వివరాల ప్రకారం.. బేగంబజార్‌లో అత్యధికంగా 117.5 మి.మీ వర్షపాతం నమోదైంది. సర్దార్‌ మహల్‌లో 106.3మి.మీ, ఖైరతాబాద్‌లో 94.3 మి.మీ వర్షపాతం నమోదైంది. మరోవైపు రంగారెడ్డి జిల్లా అబ్దుల్లాపూర్‌మెట్‌లో అత్యధికంగా 135.5మి.మీ మేర వర్షం కురిసింది.