కంగుతినేలా రంగు.. ఒక వైపు పల్లెవెలుగు, మరోవైపు ఎక్స్‌ప్రెస్‌ బస్సు

ఆర్టీసీ పల్లెవెలుగు బస్సులకు ఒక రంగు, ఎక్స్‌ప్రెస్‌ సర్వీసులు, సూపర్‌ లగ్జరీ బస్సులకు ఒక రంగు ఉండటం సాధారణమే. కానీ ఒక వైపు పల్లెవెలుగు, మరోవైపు ఎక్స్‌ప్రెస్‌ బస్సు రంగు ఉంటే.. ఆశ్చర్యమే కదూ! అయితే, పల్లెవెలుగు రంగును చూసి.. ఇది తమ ఊరిలో ఆగుతుందని ఎక్కుతున్న ప్రయాణికులు అది ఎక్స్‌ప్రెస్‌ బస్సు అని తెలుసుకుని కంగుతింటున్నారు. కొత్తగూడెం ఆర్టీసీ డిపో పరిధిలో ఓ బస్సు ఇలాగే తిరుగుతోంది. బస్సుకు రెండు వైపులా పల్లెవెలుగు రంగు ఉంటే.. ముందుభాగంలో ఎక్స్‌ప్రెస్‌ రంగు ఉంది. బస్సుల కొరతతో ఒకే బస్సుకు రెండు రకాల సర్వీసుల రంగులు వేయించామని, రద్దీకి అనుగుణంగా ప్రయాణికులకు సేవలందిస్తున్నామని కొత్తగూడెం ఆర్టీసీ డిపో మేనేజర్‌ వెంకటేశ్వరరావు తెలిపారు.

ఈనాడు, ఖమ్మం