Afghan Earthquake: అఫ్గానిస్థాన్‌లో భారీ భూకంపం..6.3 తీవ్రతగా నమోదు

ఇంటర్నెట్‌ డెస్క్‌: అఫ్గానిస్థాన్‌లో భారీ భూకంపం (Earthquake) సంభవించింది. సోమవారం తెల్లవారుజామున ఉత్తర అఫ్గాన్‌ నగరం మజార్-ఎ షరీఫ్ సమీపంలో రిక్టర్‌ స్కేల్‌పై దీని తీవ్రత 6.3గా నమోదైంది. ఖుల్మ్‌ సమీపంలో భూకంప కేంద్రం ఉన్నట్లు అధికారులు తెలిపారు. ఈ విపత్తు (Earthquake in Afghanistan) కారణంగా ఏడుగురు ప్రాణాలు కోల్పోగా.. 150 మందికి పైగా గాయపడ్డారని స్థానిక అధికారులు పేర్కొన్నారు. అనేకమంది శిథిలాల్లో చిక్కుకున్నారన్నారు. మృతుల సంఖ్య మరింత పెరిగే అవకాశం ఉన్నట్లు వెల్లడించారు. 

యూఎస్‌ జియోలాజికల్‌ సర్వే వివరాల ప్రకారం.. ఖుల్మ్‌ సమీపంలో భూకంప కేంద్రం ఉన్నట్లు వెల్లడైంది. 28 కిలోమీటర్ల లోతులో అది కేంద్రీకృతమై ఉంది. దీంతో సమీప ప్రాంతాల్లో ఆరెంజ్‌ అలర్ట్‌ జారీ చేశారు.  ఘోర విపత్తు కారణంగా మజార్-ఎ షరీఫ్ సహా ఇతర ప్రాంతాలు తీవ్రంగా ప్రభావితమైనట్లు సమాచారం. భూకంపం కారణంగా పలు గ్రామాల్లోని ఇళ్లు పూర్తిగా నేలమట్టమయ్యాయని ఆ దేశ జాతీయ విపత్తు నిర్వహణ సంస్థ  అధికారులు వెల్లడించారు. ఈ విపత్తు ధాటికి పలు కుటుంబాలు కకావికలమైనట్లు పేర్కొన్నారు. భూకంప ప్రభావిత ప్రాంతాల్లో శిథిలాల కింద చిక్కుకున్న వారిని రక్షించడానికి సహాయక చర్యలు కొనసాగుతున్నాయి.