Earthquake: డ్రీక్‌ పాసేజ్‌లో భారీ భూకంపం.. సునామీ హెచ్చరికలు జారీ

ఇంటర్నెట్‌డెస్క్‌: దక్షిణ అమెరికాను శుక్రవారం భూకంపం వణికించింది. డ్రీక్‌ పాసేజ్‌లో ఈ భూకంప తీవ్రత రిక్టర్‌ స్కేలుపై 7.5గా నమోదైంది (Earthquake Hits Drake Passage). భూ ఉపరితలానికి 11 కి.మీ. లోతున భూకంప కేంద్రాన్ని గుర్తించామని  యూఎస్‌ జియోలాజికల్ సర్వే(USGS) వెల్లడించింది. ఈ ప్రకంపనల కారణంగా సునామీ ముప్పు పొంచిఉండటంతో చిలీ దేశం అప్రమత్తమైంది. సునామీ హెచ్చరికలు జారీ చేసిందని అంతర్జాతీయ మీడియా పేర్కొంది. దక్షిణ అమెరికా, అంటార్కిటికా మధ్య ఈ డ్రీక్ పాసేజ్ (జలవనరు) ఉంటుంది.

ఇటీవల రష్యా తీరంలో భారీ భూకంపం (Earthquake) సంభవించిన సంగతి తెలిసిందే. రిక్టర్ స్కేల్‌పై 8.8గా తీవ్రత నమోదైంది. ఈ భారీ భూప్రకంపనల ధాటికి రష్యా, జపాన్‌తో పాటు ఉత్తర పసిఫిక్‌లోని పలు తీర ప్రాంతాలను సునామీ (Tsunami) తాకింది. పసిఫిక్‌ ప్రాంతంలో 2011 తర్వాత ఇదే అత్యంత భారీ భూకంపమని నిపుణులు పేర్కొన్నారు.