Elon Musk: ప్రపంచంలో తొలి ట్రిలియనీర్‌గా మస్క్‌..?

ఇంటర్నెట్‌ డెస్క్‌: ప్రపంచ కుబేరుడు ఎలాన్‌ మస్క్‌ (Elon Musk) కొన్నేళ్లలో మరో ఘనత సాధించే అవకాశాలు కనిపిస్తున్నాయి. ఎలక్ట్రిక్‌ కార్ల సంస్థ టెస్లా (Tesla) విస్తరణ లక్ష్యాలు చేరుకుంటే.. ప్రతిపాదిత ప్రోత్సాహక ప్యాకేజీ కింద సంస్థ సీఈవోగా ఆయనకు భారీ మొత్తం సమకూరనుంది. దీంతో ఆయన సంపద అమాంతం పెరిగి ప్రపంచంలోనే తొలి ట్రిలియనీర్‌గా (Trillionaire) చరిత్ర సృష్టించే అవకాశం కనిపిస్తోంది.

ప్రపంచంలో అత్యంత సంపన్నుల జాబితాలో ఎలాన్‌ మస్క్‌ ఇప్పటికే తొలి స్థానంలో ఉన్నారు. ప్రస్తుతం ఆయన సంపద విలువు సుమారు 400 బిలియన్‌ డాలర్లు. అయితే, రానున్న రోజుల్లో మార్కెట్‌ విలువను భారీగా పెంచేందుకు టెస్లా ముమ్మర ప్రయత్నాలు చేస్తోంది. ప్రస్తుతం 1.1 ట్రిలియన్‌ డాలర్లుగా ఉన్న కంపెనీ మార్కెట్‌ విలువను రానున్న పదేళ్లలో భారీగా పెంచాలని ప్రతిపాదించింది.

• భారత్‌కు దూరమయ్యాం! - ట్రంప్‌ కీలక వ్యాఖ్యలు

ఇందుకోసం రోబోట్యాక్సీ, ఏఐ మార్కెట్‌ విస్తరణ వంటి లక్ష్యాలను పెట్టింది. ఈ పనితీరు లక్ష్యాలను ఎలాన్‌ మస్క్‌ సాధిస్తే ప్రతిపాదిత ప్రోత్సాహక ప్యాకేజీ కింద ఆయనకు భారీగా షేర్లు సమకూరుతుంది. దాదాపు 900 బి.డాలర్లు సమకూరనున్నట్లు అంచనా. దీంతో మస్క్‌ సంపద విలువ ట్రిలియన్‌ డాలర్లు దాటిపోతుంది. మరోవైపు కార్పొరేట్‌ చరిత్రలోనే ఇది భారీ ప్రోత్సాహకంగా మిగలనుంది. అమెరికా అధ్యక్షుడితో ఎలాన్‌ మస్క్‌ విభేదాల తర్వాత టెస్లా షేర్లు భారీగా పతనమయ్యాయి. దీంతోపాటు చైనాలోని బీవైడీ తదితర కంపెనీల నుంచి పోటీ కూడా పెరిగింది. జర్మనీలో కూడా అమ్మకాలు పడిపోయాయి. ఈయూ దేశాల్లో ఇదే పరిస్థితి. ఈ నేపథ్యంలోనే టెస్లా భారీ విస్తరణ అంచనాలను వెల్లడించింది.