గాజాలో యుద్ధం ముగిసింది.. అమెరికా అధ్యక్షుడు ట్రంప్‌ ప్రకటన

ఇంటర్నెట్‌ డెస్క్‌: ఇజ్రాయెల్‌-హమాస్‌ మధ్య తొలి దశ శాంతి ఒప్పందం కుదిరిన విషయం తెలిసిందే. కాల్పుల విరమణ ఒప్పందంలో భాగంగా హమాస్‌ ఈరోజు ఇజ్రాయెల్‌ బందీలను విడుదల చేయనుంది. ఈ నేపథ్యంలో అమెరికా అధ్యక్షుడు ట్రంప్‌ ఇజ్రాయెల్‌ బయలుదేరి వెళ్లారు. విమానంలో బయలుదేరే ముందు రిపోర్టర్లతో మాట్లాడుతూ.. గాజాలో యుద్ధం ముగిసినట్లు ప్రకటించారు. ఇక నుంచి పశ్చిమాసియాలో సాధారణ పరిస్థితులు నెలకొననున్నట్లు పేర్కొన్నారు. 

• గాజాలో శాంతి సాధ్యమేనా..!

మరికొద్ది గంటల్లోనే ఇజ్రాయెల్‌ బందీలను హమాస్‌ విడుదల చేయనుంది. దీంతో రెండేళ్ల అనంతరం బందీలు విడుదల అవుతుండడంతో అంతటా తీవ్ర ఉత్కంఠ నెలకొంది. ట్రంప్‌ తొలుత ఇజ్రాయెల్‌ చేరుకొని పార్లమెంట్‌లో ప్రసంగించనున్నారు. అనంతరం బందీల కుటుంబ సభ్యులను కలవనున్నారు. అక్కడి నుంచి ఈజిప్ట్‌ వెళ్లనున్నారు. షర్మ్‌ ఎల్‌-షేక్‌లో ఆ దేశ అధ్యక్షుడు అబ్దెల్‌ ఫతా అల్‌ సిసీ నిర్వహిస్తున్న శాంతి శిఖరాగ్ర సదస్సులో పాల్గొంటారు. ఈ సందర్భంగా కాల్పుల విరమణ ఒప్పందానికి సంబంధించిన సంతకాల కార్యక్రమం ఉంటుంది. ఈ సదస్సుకు 20 దేశాల అధినేతలు, అంతర్జాతీయ ప్రముఖులు హాజరుకానున్నారు.   

2023 అక్టోబరు 7న హమాస్‌ మిలిటెంట్లు ఇజ్రాయెల్‌పై దాడి చేసి 1200 మందిని హత్య చేసి, 251 మందిని బందీలుగా చేసుకున్న సంగతి తెలిసిందే. వారిలో కొంతమందిని హమాస్‌ విడుదల చేయగా, కొంతమందిని ఇజ్రాయెల్‌ దళాలు రక్షించాయి. మరికొంత మంది మరణించగా, ప్రస్తుతం హమాస్‌ వద్ద 48 మంది బందీలు ఉన్నారు. వారిని హమాస్‌ తిరిగి అప్పగించనుంది. అయితే వారిలో 20 మంది మాత్రమే సజీవంగా ఉన్నట్లు సమాచారం. ఇక బందీల అప్పగింతకు ప్రతిగా 2వేల మందికి పైగా పాలస్తీనా ఖైదీలను ఇజ్రాయెల్‌ విడుదల చేయనుంది. వీరంతా సోమవారం సాయంత్రం జైళ్ల నుంచి బయటకు వచ్చే అవకాశం ఉంది.