బ్రిటన్‌లో భారత యువతిపై అత్యాచారం

జాత్యాహంకారంతో దారుణం 

లండన్‌: బ్రిటన్‌లో జాత్యాహంకారంతో ఓ శ్వేతజాతీయుడు భారత సంతతికి చెందిన 20 ఏళ్ల యువతిపై అత్యాచారానికి పాల్పడ్డాడు. స్థానిక కాలమానం ప్రకారం శనివారం సాయంత్రం ఉత్తర ఇంగ్లండ్‌లోని వాల్సల్‌ పట్టణంలో ఉన్న పార్క్‌ హాల్‌ ప్రాంతంలో జరిగిన ఈ ఘటన ఆలస్యంగా వెలుగులోకి వచ్చింది. బాధితురాలు పంజాబీ యువతి. సమాచారమందుకున్న పోలీసులు ఘటనా స్థలానికి చేరుకొని బాధితురాలిని ఆసుపత్రికి తరలించారు. సీసీటీవీ దృశ్యాల ఆధారంగా 32 ఏళ్ల వయసున్న ఓ శ్వేతజాతీయుడు ఈ దారుణానికి పాల్పడినట్లు ప్రాథమికంగా నిర్ధారించారు. బాధితురాలి వివరాల ఆధారంగా అనుమానితుడిని సోమవారం అదుపులోకి తీసుకున్నారు. ఇది జాత్యహంకార భావనతో జరిగిన నేరమని వెల్లడించారు. బాధితురాలు నివాసముంటోన్న ఇంటి తలుపు బద్దలుకొట్టి మరీ నిందితుడు అత్యాచారానికి పాల్పడ్డాడని స్థానిక సిక్కు ఫెడరేషన్‌ వర్గాలు తెలిపాయి. గత నెల ఓల్డ్‌బరీ ప్రాంతంలోనూ ఓ సిక్కు యువతిపై ఇదే తరహాలో లైంగిక దాడి జరిగింది. దీంతో ఈ వరుస ఘటనలు రాజకీయంగా దుమారం రేపుతున్నాయి.