అమెరికాకు చీకటి రోజులివి: బైడెన్‌

వాషింగ్టన్‌: అమెరికాకు ప్రస్తుతం చీకటి రోజులు నడుస్తున్నాయని ఆ దేశ మాజీ అధ్యక్షుడు జో బైడెన్‌ అన్నారు. అయినప్పటికీ ఆశావాద దృక్పథంతో ఉండాలని ఆ దేశ ప్రజలకు పిలుపునిచ్చారు. 82 ఏళ్ల బైడెన్‌ బోస్టన్‌లో ఆదివారం ఎడ్వర్డ్‌ ఎం.కెన్నడీ ఇన్‌స్టిట్యూట్‌ నుంచి ఆదివారం జీవన సాఫల్య పురస్కారం అందుకున్నారు. అనంతరం ప్రసంగిస్తూ.. ‘‘అమెరికాలో ఇప్పుడున్నవి చీకటి రోజులు. అయితే తప్పకుండా దేశం మళ్లీ సరైన గాడిన పడుతుంది. ఎప్పట్లాగే మరింత బలంగా పుంజుకుంటుంది. మనం విశ్వాసం కోల్పోకూడదు’’ అని పేర్కొన్నారు. ట్రంప్‌ సర్కారుకు వ్యతిరేకంగా గళమెత్తుతున్నవారిని ఆయన ప్రశంసించారు. ప్రస్తుతం దేశంలో భావ వ్యక్తీకరణ స్వేచ్ఛపై దాడులు జరుగుతున్నాయన్నారు. దేశాధ్యక్షుడు ట్రంప్‌ తన కార్యనిర్వాహక అధికారాల విషయంలో హద్దులు మీరుతున్నారంటూ విమర్శించారు. ప్రొస్టేట్‌ క్యాన్సర్‌కు ఇటీవల రేడియేషన్‌ చికిత్స చేయించుకున్న అనంతరం బైడెన్‌ బహిరంగంగా మాట్లాడటం ఇదే తొలిసారి.