హైతీలో మెలిసా హరికేన్‌ బీభత్సం

25 మంది మృత్యువాత 

శాంటియాగో డి క్యూబా: కరీబియన్‌ దేశమైన హైతీని మెలిసా హరికేన్‌ కుదిపేసింది. ఈ పెను తుపాను తీవ్రతతో బుధవారం లా డిగ్యూ నదికి పోటెత్తిన వరదల్లో 25 మంది మృత్యువాతపడ్డారు. పదుల సంఖ్యలో ఇళ్లు కూలిపోయాయి. శిథిలాల కింద పలువురు చిక్కుకొని ఉండొచ్చన్న ఆందోళనలు వ్యక్తమవుతున్నాయి. మరోవైపు- జమైకా, క్యూబాల్లోనూ మెలిసా హరికేన్‌ విధ్వంసం సృష్టించింది. జమైకాలో ఈ తుపాను ఒకరి ప్రాణాలను పొట్టన పెట్టుకుంది. క్లారెండోన్, సెయింట్‌ ఎలిజబెత్‌ ప్రాంతాలు పూర్తిగా నీట మునిగాయి. పలు ఆసుపత్రులు దెబ్బతిన్నాయి. విద్యుత్‌ సరఫరాకు తీవ్ర అంతరాయాలు కలిగాయి. క్యూబాలో అధికారులు మెలిసాను కేటగిరీ-3 పెను తుపానుగా గుర్తించారు. ఇప్పటికే వారు వేల మందిని సురక్షిత స్థావరాలకు తరలించారు. ఈ హరికేన్‌ క్రమంగా బహమాస్‌ వైపు ప్రయాణించే అవకాశముంది.