వర్సిటీల్లో హెచ్‌1బీ నియామకాలొద్దు

ఫ్లోరిడా గవర్నర్‌ ఆదేశం

న్యూయార్క్‌: విశ్వవిద్యాలయాల్లోని ఉద్యోగాల్లో అమెరికన్లనే నియమించుకోవాలని, హెచ్‌1బీపై వచ్చే విదేశీయులకు అవకాశమివ్వొద్దని ఫ్లోరిడా గవర్నర్‌ రాన్‌ డీశాంటిస్‌ ఆదేశించారు. రాష్ట్రంలోని వర్సిటీల్లో హెచ్‌1బీ వీసాల దుర్వినియోగాన్ని సహించేది లేదని తేల్చి చెప్పారు. ‘దేశంలోని వర్సిటీలన్నీ హెచ్‌1బీ వీసాలపై విదేశీయులను దిగుమతి చేసుకుంటున్నాయి. సరైన అర్హతలున్న అమెరికన్లున్నా వారికి ఉద్యోగాలివ్వడం లేదు’ అని బుధవారం ఆయన ఒక ప్రకటనలో పేర్కొన్నారు. కొన్ని వర్సిటీలు.. కంప్యూటర్‌ అప్లికేషన్‌ కోఆర్డినేటర్లు, అసిస్టెంట్‌ ప్రొఫెసర్లు, పబ్లిక్‌ పాలసీ ప్రొఫెసర్లను చైనా నుంచి, అసిస్టెంట్‌ స్విమ్‌ కోచ్‌ను స్పెయిన్‌ నుంచి నియమించుకోవడాన్ని ఆయన ఉదాహరణగా చూపారు.