Gaza: గాజాలో మళ్లీ రక్తపాతం

కాల్పుల విరమణకు తూట్లు
ఇజ్రాయెల్‌ భీకరదాడులు
104 మందికిపైగా పాలస్తీనియన్ల మృతి

డెయిర్‌ అల్‌-బలా: గాజాలో మళ్లీ రక్తం ఏరులై పారింది. అమెరికా అధ్యక్షుడు డొనాల్డ్‌ ట్రంప్‌ చొరవతో కుదిరిన కాల్పుల విరమణ ఒప్పందానికి తూట్లు పడింది. మంగళవారం రాత్రి నుంచి భారీస్థాయిలో గాజావ్యాప్తంగా ఇజ్రాయెల్‌ బాంబుల వర్షం కురిపించింది. ఈ దాడుల్లో 104 మందికిపైగా పాలస్తీనియన్లు మరణించారు. ఇందులో 46 మంది చిన్నారులు ఉన్నారు. 600 మందికి గాయాలయ్యాయి. దాడులు ముగిసిన వెంటనే, మళ్లీ కాల్పుల విరమణ ఒప్పందం అమల్లోకి వచ్చినట్లు ఇజ్రాయెల్‌ ప్రకటించింది. ఒప్పందాన్ని హమాస్‌ ఉల్లంఘించిందని, అందుకే దాడులకు ఆదేశాలిచ్చానని ఇజ్రాయెల్‌ ప్రధాని నెతన్యాహు మంగళవారం పేర్కొన్న సంగతి తెలిసిందే. దాడులను ట్రంప్‌ సమర్థించారు. ఇజ్రాయెల్‌ సైనికుడినొకరిని హమాస్‌ హతమార్చిందని, అందుకే టెల్‌అవీవ్‌ దాడులకు పాల్పడిందన్నారు. దీన్ని హమాస్‌ ఖండించింది. కాల్పుల విరమణను ఇజ్రాయెలే ఉల్లంఘిస్తోందని ఆరోపించింది.