Nobel Peace Prize: ట్రంప్‌ను నోబెల్‌కు నామినేట్‌ చేస్తా: జపాన్ ప్రధాని

ఇంటర్నెట్‌డెస్క్‌: నోబెల్‌ శాంతి బహుమతి (Nobel Peace Prize)పై అమెరికా అధ్యక్షుడు డొనాల్డ్‌ ట్రంప్‌ (Donald Trump) ఎన్నో ఆశలు పెట్టుకొన్న సంగతి తెలిసిందే. పలు దేశాల మధ్య యుద్ధాలు ఆపానని ప్రచారం చేసుకుంటున్న ట్రంప్.. వచ్చే ఏడాది ఆ పురస్కారం కోసం ప్రయత్నించే అవకాశం ఉంది. ఈ నేపథ్యంలో నోబెల్‌ శాంతి బహుమతికి అధ్యక్షుడిని నామినేట్‌ చేస్తానని జపాన్‌ ప్రధాని సనాయె తకాయిచి హామీ ఇచ్చారు. ఈ విషయాన్ని వైట్‌హౌస్ వెల్లడించింది.

‘‘థాయ్‌లాండ్‌-కంబోడియాల మధ్య కాల్పుల విరమణ ఒప్పందం కుదర్చడంలో ట్రంప్ విజయం సాధించారు. ఇక, పశ్చిమాసియాలో కుదిర్చిన ఒప్పందం (ఇజ్రాయెల్‌-హమాస్‌) చరిత్రాత్మకమైంది’’ అని జపాన్ ప్రధాని పేర్కొన్నారు. జపాన్ (Japan) రాజధాని టోక్యోలో ఈ ఇద్దరు నేతల మధ్య భేటీ జరిగింది.   ఆ సందర్భంగా నోబెల్ ప్రస్తావన వచ్చింది. ట్రంప్ మాట్లాడుతూ.. ‘‘నాకు జపాన్ అంటే అభిమానం, గౌరవం ఉన్నాయి. ఇరుదేశాల మధ్య బంధం మరింత బలపడనుంది. ఈ దేశానికి ఎప్పుడూ అండగా ఉంటాం’’ అని అన్నారు. ఈ పర్యటనలో భాగంగా రెండు దేశాల మధ్య కీలక ఒప్పందాలు కుదిరాయి.

• మూడోసారి పోటీకి సిద్ధం.. మనసులో మాట బయటపెట్టిన ట్రంప్‌!

ప్రతిష్ఠాత్మకమైన నోబెల్ శాంతి బహుమతి వెనుజువెలా ప్రతిపక్ష నాయకురాలు మరియా కొరీనా మచాదోను వరించిన సంగతి తెలిసిందే. ట్రంప్‌ (Donald Trump)నకు నోబెల్ రాకపోవడంపై వైట్‌హౌస్ ఆగ్రహం వ్యక్తంచేసిన సంగతి తెలిసిందే. గాజా కాల్పుల విరమణ తర్వాత కూడా ట్రంప్‌ సేవలకు తగినంత గౌరవం దక్కలేదని పేర్కొంది. ఈ క్రమంలో నోబెల్‌ కమిటీ శాంతి కంటే రాజకీయాలకే ఎక్కువ ప్రాధాన్యమిచ్చిందని ఆరోపించింది.