Earthquake: భూప్రకంపనలు ఆపరేషన్‌ థియేటర్‌ను వణికించినా సర్జరీని పూర్తి చేశారు.. వీడియో వైరల్‌

మాస్కో: రష్యా తీరంలో భారీ భూకంపం (Russia Earthquake) సంభవించింది. రిక్టర్ స్కేల్‌పై 8.8గా నమోదైన ఈ భూకంపం రష్యాలోని కామ్చాట్కా ద్వీపకల్పాన్ని అతలాకుతలం చేసింది. బలమైన ప్రకంపనలు ఆ ప్రాంతాన్ని కుదిపేశాయి. భవనాలు ఊగిపోయాయి. ఇందుకు సంబంధించిన పలు వీడియోలు సోషల్‌ మీడియాలో దర్శనమిస్తున్నాయి.

• శక్తిమంతమైన భూప్రకంపనలు (Earthquake) సంభవించిన సమయంలో కామ్చాట్కా ప్రాంతంలోని ఓ ఆస్పత్రి దృశ్యాలను రష్యన్‌ న్యూస్‌ నెట్‌వర్క్‌ ఆర్టీ(RT) షేర్‌ చేసింది. ఆపరేషన్‌ థియేటర్‌లో సర్జరీ జరుగుతున్న సమయంలో భూకంపం సంభవించింది. ప్రకంపనల ధాటికి ఆ భవనం మొత్తం ఊగిపోయింది. అయితే.. వైద్యులు ఏ మాత్రం భయపడకుండా.. ప్రశాంతంగా ఉండి ఆ సర్జరీని పూర్తి చేయడం గమనార్హం. ఆపరేషన్‌ థియేటర్‌లోని స్ట్రెచర్‌ను ఊగకుండా సిబ్బంది గట్టిగా పట్టుకోగా.. వైద్యులు సర్జరీని కొనసాగించారు. ఇందుకు సంబంధించిన దృశ్యాలు వైరల్‌గా మారాయి. వైద్యుల నిబద్ధతను మెచ్చుకుంటూ పలువురు కామెంట్లు పెడుతున్నారు. ఇక ఆ సర్జరీ విజయవంతంగా జరిగిందని.. రోగి కోలుకుంటున్నారని రష్యన్‌ ఆరోగ్య శాఖ ప్రకటించినట్టు ఆర్టీ న్యూస్‌ ఛానల్‌ వెల్లడించింది.
• సునామీ ఎఫెక్ట్‌.. తీరానికి కొట్టుకొచ్చిన భారీ తిమింగలాలు..!

భూకంప కేంద్రం సమీపంలోని కామ్చాట్కా ద్వీపకల్పంలోని ఓడరేవులు పూర్తిగా దెబ్బతిన్నాయి. సునామీ అలల కారణంగా ఆ ప్రాంతంలోని ప్రజలు సురక్షిత ప్రాంతాలకు తరలివెళ్లారు. రష్యా (Russia)లో తూర్పు ప్రాంతంలో బుధవారం తెల్లవారుజామున వచ్చిన భారీ భూకంపం కారణంగా దాంతోపాటు చుట్టుపక్కల దేశాలపై సునామీ అలలు విరుచుకుపడ్డాయి. అలలు తాకిన దీవుల్లో రష్యా అత్యవసర పరిస్థితిని ప్రకటించింది. ఈ సునామీ వల్ల ఆయా ప్రాంతాల్లో సముద్ర జలాలు ముందుకు వచ్చాయి. పలు నిర్మాణాలు దెబ్బతిన్నాయి.