JD Vance: ఉషకు మతం మారే ఆలోచన లేదు కానీ..

విమర్శలపై అమెరికా ఉపాధ్యక్షుడు వాన్స్‌ స్పందన 

న్యూయార్క్‌: తన సతీమణి ఉషా వాన్స్‌ క్రిస్టియన్‌ కాదని, ఆమెకు మతం మారే ఆలోచన లేదని అమెరికా ఉపాధ్యక్షుడు జేడీ వాన్స్‌ శుక్రవారం పేర్కొన్నారు. ఉష ఏదో రోజు క్రైస్తవంలోకి మారుతుందని ఆశిస్తున్నట్లు అంతకు ముందు తాను చేసిన వ్యాఖ్యలపై విమర్శలు వస్తున్న నేపథ్యంలో ఆయన ఈ మేరకు ‘ఎక్స్‌’లో స్పందించారు. ‘‘నా మతాంతర వివాహం గురించి ప్రశ్నలు వస్తున్నాయి. ప్రజాప్రతినిధి కావడంతో వీటి గురించి తెలుసుకునేందుకు ఆసక్తిగా ఉండటం సహజం. వీటిపై మాట్లాడకుండా తప్పించుకోలేను. నా మత విశ్వాసాలను నేను గౌరవిస్తాను. నా సతీమణి కూడా చాలా ఏళ్ల క్రితమే ఇందుకు అంగీకరించింది. ఆమె క్రిస్టియన్‌ కాదు. మతం మారే ఆలోచన కూడా లేదు. కానీ, ఇతర మతాంతర వివాహాలు, బంధాల్లో మాదిరిగానే.. ఏదో ఒక రోజు నా దృష్టితో ఆలోచిస్తుందని ఆశిస్తున్నా. ఏదేమైనా ఆమెను ప్రేమిస్తూ, ఆమెకు అండగా ఉంటూనే ఉంటా. ఆమె నా భార్య అయినందున అన్ని విషయాలపై ఆమెతో మాట్లాడతా’’ అని జేడీ వాన్స్‌ పేర్కొన్నారు.