USA: అమెరికా సెనెట్‌లో ట్రంప్‌నకు చుక్కెదురు

ఇంటర్నెట్‌డెస్క్‌: ఓ టీవీ యాడ్‌ కారణంగా కెనడా (Canada)తో వాణిజ్య చర్చలను అమెరికా అధ్యక్షుడు డొనాల్డ్‌ ట్రంప్‌ (Donald Trump) నిలిపివేసిన సంగతి తెలిసిందే. ఈ క్రమంలోనే దానిపై అదనపు సుంకాలు విధించాలని నిర్ణయించారు. అయితే, ట్రంప్‌ నిర్ణయానికి అమెరికా సెనెట్‌లో చుక్కెదురైంది. కెనడాపై టారిఫ్‌ల తొలగింపునకు అనుకూలంగా ఓట్లు పడ్డాయి (USA-Canada). 

ట్రంప్‌ సుంకాల అధికారాలను అంతం చేసేందుకు డెమోక్రట్లతో పాటు నలుగురు రిపబ్లికన్‌లు కూడా మద్దతు తెలిపారు. ఈ క్రమంలో ట్రంప్‌ నిర్ణయానికి వ్యతిరేకంగా సెనెట్‌లో 50-46 ఓట్లు పడ్డాయి. గతంలోను ఇలాంటి తీర్మానాన్నే ప్రవేశపెట్టగా సభ దాన్ని ఆమోదించలేదు. ఈ క్రమంలో డెమోక్రట్‌ పార్టీ సభ్యుడు, వర్జీనియా సెనెటర్‌ టిమ్‌ కైన్‌ మరోసారి దీన్ని ప్రవేశపెట్టారు. అంతర్జాతీయ అత్యవసర ఆర్థిక అధికార చట్టాలకు వ్యతిరేకంగా కెనడాపై ట్రంప్‌ సుంకాల నిర్ణయాన్ని సమర్థించలేమన్నారు. ఆ దేశంతో ఉన్న దీర్ఘకాల సంబంధాలు తెగిపోవడానికి తాను ఇష్టపడటం లేనందున దీన్ని వ్యతిరేకిస్తున్నట్లు తెలిపారు. కెనడా సరిహద్దు రాష్ట్రం మైనే సెనెటర్‌ సుసాన్‌ కాలిన్స్‌ మాట్లాడుతూ.. ఈ సుంకాలు తమ రాష్ట్ర ఆర్థిక వ్యవస్థ పైనా తీవ్ర ప్రభావం చూపుతోందన్నారు. 

• మోదీ అంటే గౌరవం, ప్రేమ

ఇక, దీనికి ముందు బ్రెజిల్‌పై ట్రంప్‌ సుంకాల అధికారాన్ని వ్యతిరేకిస్తూ సెనెట్‌లో ఇలాంటి తీర్మానమే తీసుకొచ్చారు. దీనికి కూడా సెనెట్‌లో ఆమోదం లభించింది. యూఎస్‌ టారిఫ్‌లను వ్యతిరేకిస్తూ కెనడా ఇచ్చిన ప్రకటనలపై ట్రంప్‌ ఆగ్రహం వ్యక్తంచేశారు. దీంతో ఆ దేశంతో నడుస్తోన్న వాణిజ్య చర్చలను నిలిపివేస్తున్నట్లు ప్రకటించారు.