YSRCP: పుంగనూరులో అరాచకస్వామ్యం.. ప్రశ్నిస్తే వేధింపులు, దాడులు!

పెద్దిరెడ్డి రామచంద్రారెడ్డి.. ఉమ్మడి చిత్తూరు జిల్లాలో ఆయన్ను అంతా పెద్దాయనగా పిలుస్తారు. వైకాపా ప్రభుత్వంలో సీనియర్ మంత్రిగా, పార్టీలో అత్యంత కీలక నేతగా వ్యవహరిస్తున్న ఆయన మౌనంగా, శాంత స్వభావిగా ఉన్నట్లు కనిపిస్తారు. కానీ, కాగల కార్యం మాత్రం ఆయన అనుచరులు, సంబంధీకులు నెరవేరుస్తుంటారు. ఫలితంగా ఆయన ప్రాతినిధ్యం వహిస్తున్న పుంగనూరు నియోజకవర్గంలో అడుగడుగునా అరాచకస్వామ్యం వర్ధిల్లుతోంది. వారికి అణిగిమణిగి ఉండకపోతే దాడులు, అక్రమాల్ని ప్రశ్నిస్తే.. దౌర్జన్యాలు, తప్పుల్ని నిలదీస్తే.. హత్యాయత్నాలు, ప్రతిపక్ష పార్టీలకు మద్దతుగా నిలిస్తే.. అక్రమ కేసులు, ఆర్థికమూలాలను దెబ్బతీయడాలు, ఆస్తులను ధ్వంసం చేయడాలు నిత్యకృత్యంగా మారాయి.