Silver Filigree: అంబానీ ఇంట వివాహానికి కరీంనగర్‌ ఫిలిగ్రీ కళాఖండాలు

దేశంలోనే అరుదైన కళల్లో ఒకటైన కరీంనగర్ ఫిలిగ్రీకి మరో గుర్తింపు లభించింది. వెండి తీగతో కళాకారులు ఆవిష్కరించే అద్భుతమైన ఉత్పత్తులు ఇప్పటికే కరీంనగర్ ఖ్యాతిని నలుదిశలా చాటాయి. ప్రముఖ వ్యాపార దిగ్గజం ముకేశ్ అంబానీ, నీతా దంపతుల కుమారుడు అనంత్ అంబానీ వివాహం సందర్భంగా ఫిలిగ్రీ కళాఖండాలు మరోసారి చర్చనీయాంశంగా మారాయి. ముకేశ్ దంపతులు దేశవ్యాప్తంగా ఉన్న చేనేత హస్తకళా రూపాలను.. దేశవిదేశాలకు చెందిన అతిథులకు బహుమతులుగా ఇవ్వాలని నిర్ణయించారు. అంబానీ ఇంట వివాహానికి దాదాపు 400 వస్తువులకు ఆర్డర్ చేసినట్లు కరీంనగర్ ఫిలిగ్రీ వెల్ఫేర్ సొసైటీ ప్రతినిధులు తెలిపారు. జులైలో ఈ పెళ్లి జరగనుండగా జ్యుయలరీ బాక్సులు, పర్సులు, ట్రేలు, ఫ్రూట్ బౌల్స్, తదితర వస్తువులకు ఆర్డర్ ఇచ్చారు. గతేడాది జరిగిన జీ-20 సదస్సులో వివిధ దేశాల అధ్యక్షులు కోటుకు అలంకరించుకునేందుకు అశోకచక్రంతో కూడిన బ్యాడ్జీలను ఇక్కడి కళాకారులే తయారు చేసి పంపించారు.