Breaking | Feedback | ePratibha | E-PAPER | Pratibha

Telangana Election Results 2023: ఏ పార్టీకి ఎన్ని ఓట్లు? ఎన్ని సీట్లు?

తెలంగాణ (Telangana), మధ్యప్రదేశ్‌ (Madhya Pradesh), రాజస్థాన్‌ (Rajasthan), ఛత్తీస్‌గఢ్‌ (Chattisgarh) రాష్ట్రాల అసెంబ్లీ ఎన్నికల కౌంటింగ్‌ (Assembly Election Counting) లైవ్‌ అప్‌డేట్స్‌ (Live Updates) మీ కోసం...

Updated : 03 Dec 2023 22:33 IST

03/12/2023 22:24(IST)

తెలంగాణలో ఏ పార్టీకి ఎన్ని సీట్లు? ఎన్ని ఓట్లు?

తెలంగాణలో పూర్తిస్థాయి ఫలితాలు (అధికారికంగా) వెలువడ్డాయి. మొత్తం 119 స్థానాలకు గాను కాంగ్రెస్‌ పార్టీ 64 సీట్లలో గెలిచి అధికారం కైవసం చేసుకోగా.. భారాస 39; భాజపా 8, ఎంఐఎం 7, సీపీఐ ఒక చోట విజయం సాధించాయి.

కాంగ్రెస్‌కు 92,35,792 ఓట్లు (39.40శాతం) రాగా.. భారాసకు 87,53,924 ఓట్లు (37.35శాతం); భాజపా 32,57,511 ఓట్లు (13.90శాతం); ఎంఐఎం 5,19,379 ఓట్లు (2.22శాతం); నోటాకు 1,71,940 (0.73శాతం) ఓట్లు వచ్చాయని కేంద్ర ఎన్నికల సంఘం తన అధికారిక వెబ్‌సైట్‌లో గణాంకాలను వెల్లడించింది.

03/12/2023 21:50(IST)

గవర్నర్‌తో ముగిసిన కాంగ్రెస్‌ నేతల భేటీ..

గవర్నర్‌తో ముగిసిన కాంగ్రెస్‌ నేతల సమావేశం
సమావేశం తర్వాత మీడియాతో మాట్లాడిన కాంగ్రెస్‌ సీనియర్‌ నేత, కర్ణాటక డిప్యూటీ సీఎం డీకే శివకుమార్‌
‘గవర్నర్‌ను కలిశాం.. ప్రభుత్వాన్ని ఏర్పాటు చేసేందుకు అవకాశం ఇవ్వాలని కోరినట్లు చెప్పిన డీకేఎస్‌
మాకు 65 మంది ఎమ్మెల్యేలు ఉన్నారని గవర్నర్‌కు చెప్పాం
కాంగ్రెస్‌ శాసనసభాపక్ష సమావేశం సోమవారం ఉదయం 9.30గంటలకు జరుగుతుందని డీకేఎస్‌ వెల్లడి

03/12/2023 21:34(IST)

గవర్నర్‌ను కలవనున్న సీఈవో వికాస్‌రాజ్‌

రాష్ట్ర ఎన్నికల ప్రధానాధికారి(సీఈవో) వికాస్‌రాజ్‌ సోమవారం ఉదయం గవర్నర్‌ తమిళిసైను కలవనున్నారు.
శాసనసభ ఎన్నికలపై గవర్నర్‌కు నివేదిక అందజేయనున్నారు.
కొత్త శాసనసభ ఏర్పాటు చేస్తూ సోమవారం నోటిఫికేసన్‌ జారీ కానుంది.

03/12/2023 21:14(IST)

గవర్నర్‌ను కలిసిన రేవంత్‌ రెడ్డి, కాంగ్రెస్‌ నేతల బృందం

గవర్నర్‌ తమిళిసైని కాంగ్రెస్‌ నేతల బృందం కలిసింది.
ప్రభుత్వ ఏర్పాటుకు ఆహ్వానించాలని కోరుతూ గవర్నర్‌కు లేఖ అందజేత
రేపు శాసనసభాపక్ష సమావేశం అనంతరం సీఎల్పీ నేత పేరును నివేదిస్తామని చెప్పిన నేతలు
గవర్నర్‌ను కలిసిన వారిలో టీపీసీసీ చీఫ్‌ రేవంత్‌ రెడ్డితో పాటు ఆ పార్టీ ముఖ్య నేతలు డీకే శివకుమార్‌, మాణిక్‌రావ్‌ ఠాక్రే, ఉత్తమ్‌కుమార్‌ రెడ్డి, మల్లు రవి తదితరులు ఉన్నారు.
సోమవారం సాయంత్రం ప్రమాణస్వీకారోత్సవానికి ఏర్పాట్లు చేస్తున్నట్టు సమాచారం.

03/12/2023 21:05(IST)

రాజ్‌భవన్‌కు చేరుకున్న రేవంత్‌ రెడ్డి, డీకేఎస్‌

టీపీసీసీ చీఫ్‌తో పాటు పలువురు కాంగ్రెస్‌ నేతలు రాజ్‌భవన్‌కు చేరుకున్నారు.
గవర్నర్‌ను కలిసి ప్రభుత్వ ఏర్పాటుకు అవకాశం ఇవ్వాలని కోరనున్న నేతలు
గవర్నర్‌ను కలవనున్న నేతల్లో మాణిక్‌ రావ్‌ఠాక్రే, డీకే శివకుమార్‌, ఉత్తమ్‌కుమార్‌ రెడ్డి తదితరులు ఉన్నారు.

03/12/2023 20:44(IST)

రేపు ఉదయం 9.30గంటలకు సీఎల్పీ సమావేశం: డీకే

సోమవారం ఉదయం 9.30గంటలకు కాంగ్రెస్‌ ఎమ్మెల్యేలంతా సమావేశమవుతారు: డీకే శివకుమార్‌
ఇప్పుడు గవర్నర్‌ను కలిసేందుకు వెళ్తున్నట్లు వెల్లడి
తెలంగాణ అసెంబ్లీ ఎన్నికల్లో స్పష్టమైన ఆధిక్యం సాధించిన కాంగ్రెస్‌ పార్టీ ప్రభుత్వ ఏర్పాటుకు కసరత్తు ముమ్మరం
మరి కాసేపట్లో గవర్నర్‌ను కలవనున్న రేవంత్‌ రెడ్డి సారథ్యంలోని కాంగ్రెస్‌ నేతల బృందం

03/12/2023 20:34(IST)

గవర్నర్‌ను కలిసేందుకు బయల్దేరిన రేవంత్‌ రెడ్డి

టీపీసీసీ చీఫ్‌ రేవంత్‌ రెడ్డి సారథ్యంలోని బృందం గవర్నర్‌ తమిళిసై సౌందరరాజన్‌ను కలిసేందుకు రాజ్‌భవన్‌కు బయల్దేరింది.
మరి కాసేపట్లో ఈ బృందం గవర్నర్‌ను కలిసి కొత్త ప్రభుత్వ ఏర్పాటుకు అనుమతి కోరనుంది.
తెలంగాణ నూతన సీఎంగా రేవంత్‌ రెడ్డి సోమవారం ప్రమాణస్వీకారం చేసే అవకాశం?
తగిన బందోబస్తు ఏర్పాటు చేయాలని ఇంటెలిజెన్స్‌ అదనపు డీజీ నుంచి ముగ్గురు కమిషనర్లకు ఆదేశాలు
ప్రమాణస్వీకారానికి సోనియా, రాహుల్‌, ప్రియాంకతో పాటు పార్టీ పెద్దలు వచ్చే అవకాశం

03/12/2023 20:07(IST)

కాసేపట్లో కాంగ్రెస్ సీఎం అభ్యర్థి ఎంపిక

ఎన్నికల్లో 64 స్థానాలు గెలుచుకున్న కాంగ్రెస్‌ పార్టీ ప్రభుత్వ ఏర్పాటుకు సిద్ధమైంది
మరికాసేపట్లో సీఎల్పీ నేతను ఎన్నుకోనున్న నూతన ఎమ్మెల్యేలు
హైదరాబాద్‌లోని గచ్చిబౌలిలోని ఎల్లా హోటల్‌లో సీఎల్పీ సమావేశం
ఒక్కక్కరిగా చేరుకొంటున్న గెలిచిన అభ్యర్థులు, పరిశీలకులు, పార్టీ నేతలు

03/12/2023 20:03(IST)

తెలంగాణ నూతన డీజీపీగా రవిగుప్తా నియామకం.. ఉత్తర్వులు జారీ

తెలంగాణ కొత్త డీజీపీగా రవిగుప్తా నియామకం.. ఉత్తర్వులు జారీ
డీజీపీ అంజనీకుమార్‌ ఎన్నికల కోడ్‌ ఉల్లంఘనకు పాల్పడ్డారంటూ మధ్యాహ్నం సస్పెండ్‌ చేసిన ఈసీ
ఆయనతో పాటు ఇద్దరు అదనపు డీజీలు సందీప్‌కుమార్‌ జైన్‌, మహేశ్‌ భగవత్‌కు నోటీసులు ఇచ్చిన విషయం తెలిసిందే.
రవిగుప్తా 1990 బ్యాచ్‌కు చెందిన సీనియర్‌ ఐపీఎస్‌ అధికారి.
ప్రస్తుతం విజిలెన్స్‌ అండ్‌ ఎన్‌ఫోర్స్‌మెంట్‌ విభాగంతో పాటు ఏసీబీ డైరెక్టర్‌ జనరల్‌గా కొనసాగుతున్న రవిగుప్తా

03/12/2023 20:01(IST)

తెలంగాణ ఎన్నికల్లో భారీ మెజార్టీ వీళ్లకే..

వివేకానంద - కుత్బుల్లాపూర్‌ - 85,576 ఓట్లు
హరీశ్‌రావు - సిద్దిపేట- 82,308 ఓట్లు
మాధవరం కృష్ణారావు - కూకట్‌పల్లి - 70,387 ఓట్లు
వేముల వీరేశం - నకిరేకల్‌ - 68,838 ఓట్లు
ప్రేమసాగర్‌రావు -మంచిర్యాల- 66,116 ఓట్లు
కుందూరు జైవీర్‌ రెడ్డి- నాగార్జున సాగర్‌ - 55,849 ఓట్లు
కోమటిరెడ్డి వెంకట్‌రెడ్డి- నల్గొండ - 54,332 ఓట్లు

03/12/2023 19:55(IST)

ఈ ఎన్నికలు మాకు మరింత బలాన్నిచ్చాయి.. మోదీ

ఏ ప్రభుత్వం కావాలనే విషయంలో ప్రజలు పరిపక్వతతో ఉన్నారు.
దేశ ప్రజలు అన్ని రకాలుగా ఆలోచించి ఓటేస్తున్నారు.
భాజపా ప్రభుత్వాల కార్యక్రమాలను ప్రజలు నిశితంగా పరిశీలిస్తున్నారు
వచ్చే లోక్‌సభ ఎన్నికల్లో కూడా మాకు గ్యారంటీ ఉంది
తెలంగాణలో మా పార్టీ కార్యకర్తలు బాగా కష్టపడ్డారు.
తెలంగాణలో ప్రతి ఎన్నికల్లో బలపడుతున్నాం.
తెలంగాణ అభివృద్ధి కోసం ఎప్పుడూ పనిచేస్తాం.
తెలంగాణతో మాకు మంచి అనుబంధం ఉంది.
భాజపా కేంద్ర కార్యాలయంలో మాట్లాడిన ప్రధాని

03/12/2023 19:46(IST)

మంత్రుల్లో ఎవరు గెలిచారు? ఎవరు ఓడారు?

ఓడిన మంత్రులు వీరే.. నిరంజన్‌ రెడ్డి; కొప్పుల ఈశ్వర్‌, ఎర్రబెల్లి దయాకర్‌; ఇంద్రకరణ్‌ రెడ్డి; శ్రీనివాస్‌ గౌడ్‌; పువ్వాడ అజయ్‌
గెలిచిన మంత్రులు వీళ్లే.. కేటీఆర్‌; హరీశ్‌రావు, తలసాని శ్రీనివాస్‌ యాదవ్‌, సబితా ఇంద్రారెడ్డి; ప్రశాంత్‌ రెడ్డి, మల్లారెడ్డి, జగదీశ్‌ రెడ్డి, గంగుల కమలాకర్‌

03/12/2023 19:39(IST)

చేవెళ్లలో ఉత్కంఠ పోరు.. భారాస అభ్యర్థి విజయం

చేవెళ్లలో భారాస అభ్యర్థి కాలే యాదయ్య విజయం
కేవలం 283 ఓట్ల తేడాతో గెలుపు.. రీకౌంటింగ్‌కు కాంగ్రెస్‌ అభ్యర్థి డిమాండ్‌
ఐదు వీవీప్యాట్‌లను లెక్కించిన అధికారులు
రీకౌంటింగ్‌లో భారాసకు అనుకూలంగా ఉండటంతో యాదయ్య గెలుపును ప్రకటించిన అధికారులు

03/12/2023 19:34(IST)

జూబ్లీహిల్స్‌లో భారాస అభ్యర్థి ఆధిక్యం.. తుది ఫలితానికి మరో గంట

జూబ్లీహిల్స్‌లో 24వ రౌండ్‌ ముగిసేసరికి భారాస అభ్యర్థి మాగంటి గోపీనాథ్‌ 14,879 ఓట్ల ఆధిక్యం
వీవీప్యాట్ల లెక్కింపునకు మరో గంట సమయం పట్టే అవకాశం.
వీవీప్యాట్ల లెక్కింపు అనంతరం తుది ఫలితంపై ప్రకటన

03/12/2023 19:23(IST)

ఇంకా మూడు స్థానాల్లో తేలని ఫలితం

తెలంగాణ అసెంబ్లీ ఎన్నికల ఓట్ల లెక్కింపు ఇంకా మూడు స్థానాల్లో కొనసాగుతోంది.
జూబ్లీహిల్స్‌, పఠాన్‌చెరు, చేవెళ్ల స్థానాలకు సంబంధించిన ఫలితాలు ఇంకా వెలువడాల్సి ఉంది.
ఇప్పటివరకు కాంగ్రెస్‌ 64; భారాస 36; భాజపా 8; ఎంఐఎం 7; ఇతరులు 1 స్థానాలు చొప్పున గెలుచుకున్నాయి.
మరో మూడు స్థానాల్లో భారాస ఆధిక్యంలో కొనసాగుతోంది.

03/12/2023 19:20(IST)

జనసేనతో పొత్తు వల్ల నష్టమైతే లేదు.. కిషన్‌ రెడ్డి

వచ్చే పార్లమెంట్ ఎన్నికలకు రేపట్నుంచే పూర్తిస్థాయిలో సంసిద్ధమై ముందుకెళ్తాం
ఆ దిశగా కార్యాచరణ ప్రణాళికను రూపొందిస్తాం
ఇద్దరు ముఖ్యమంత్రి అభ్యర్థులను ఓడించి భాజపా అభ్యర్థిని గెలిపించిన కామారెడ్డి ప్రజలకు అభినందనలు
రెండు మూడేళ్లుగా ప్రజలకు సేవలందిస్తూ, రాజకీయ పోరాటం చేసి భాజపా జెండా పాతినందుకు కార్యకర్తలకు కృతజ్ఞతలు
జనసేనతో పొత్తు అంశాన్ని విలేకర్లు ప్రశ్నించగా.. ‘నష్టమైతే లేదు..’ అని కిషన్‌ రెడ్డి సమాధానం

03/12/2023 19:06(IST)

ఈ ఆసక్తికర విశేషాలు తెలుసా?

అసెంబ్లీకి ఎన్నికైన పిన్న వయస్కులు: రోహిత్‌ (26), యశస్విని (26), పర్ణికారెడ్డి (30)
అసెంబ్లీ ఎన్నికల్లో గెలిచిన అన్నదమ్ములు: కోమటిరెడ్డి వెంకట్‌ రెడ్డి, రాజగోపాల్‌ రెడ్డి; వివేక్‌, వినోద్‌
అసెంబ్లీ ఎన్నికల్లో గెలిచిన దంపతులు: ఉత్తమ్‌కుమార్‌ రెడ్డి, పద్మావతి
అసెంబ్లీ ఎన్నికల్లో గెలిచిన మామా అల్లుళ్లు: మల్లారెడ్డి, రాజశేఖర్‌ రెడ్డి

03/12/2023 18:56(IST)

కేసీఆర్‌ రాజీనామాకు గవర్నర్‌ ఆమోదం

ముఖ్యమంత్రి కేసీఆర్‌ రాజీనామాను గవర్నర్‌ తమిళిసై ఆమోదించారు. ఈ ఎన్నికల్లో ప్రజాతీర్పును శిరసావహిస్తూ కేసీఆర్‌ తన రాజీనామా లేఖను రాజ్‌భవన్‌కు పంపిన విషయం తెలిసిందే. కొత్త ప్రభుత్వం ఏర్పడే వరకు ఆపద్ధర్మ సీఎంగా కొనసాగాలని కేసీఆర్‌ను గవర్నర్‌ కోరారు.

03/12/2023 18:47(IST)

రాజస్థాన్‌ సీఎం అశోక్‌ గహ్లోత్‌ రాజీనామా

రాజస్థాన్‌ సీఎం, కాంగ్రెస్‌ సీనియర్‌ నేత అశోక్‌ గహ్లోత్‌ తన పదవికి రాజీనామా చేశారు. తన రాజీనామా లేఖను గవర్నర్‌ కల్‌రాజ్‌ మిశ్రాకు అందజేశారు. రాజస్థాన్‌ అసెంబ్లీ ఎన్నికల్లో భాజపా 104 సీట్లు గెలుచుకోగా.. మరో 11 చోట్ల ఆధిక్యంలో కొనసాగుతున్న విషయం తెలిసిందే.

03/12/2023 18:31(IST)

గంగుల కమలాకర్‌ గెలుపు.. రీకౌంటింగ్‌ కోరాలని భాజపా నిర్ణయం

కరీంనగర్‌లో భారాస అభ్యర్థి గంగుల కమలాకర్‌ గెలుపు
భాజపా అభ్యర్థి బండి సంజయ్‌పై 3,163 ఓట్ల మెజారిటీతో విజయం
మొరాయించిన రెండు ఈవీఎంలను లెక్కించని అధికారులు
ఆ రెండు ఈవీఎంలలో 1300 ఓట్లు
కరీంనగర్‌ అసెంబ్లీ నియోజకవర్గంలో రీకౌంటింగ్ కోరాలని భాజపా నిర్ణయించింది.

03/12/2023 18:14(IST)

ఈ ఓటమి మా ‘కారుకు’ చిన్న స్పీడ్‌ బ్రేకర్‌ మాత్రమే: కేటీఆర్‌

ఈ పరాజయం మా కారుకు చిన్న స్పీడ్‌ బ్రేకర్‌ మాత్రమే
ప్రజా తీర్పును శిరసావహిస్తూ కేసీఆర్‌ రాజీనామా చేశారు
కేసీఆర్‌ తన రాజీనామా లేఖను గవర్నర్‌కు పంపారు
ఎంతో కష్టపడినా ఆశించిన ఫలితం రాలేదు
ప్రతిపక్షంగా సమర్థంగా పనిచేస్తాం.
ఈ పరాజయానికి కారణాలు విశ్లేషించుకుంటాం
హైదరాబాద్ నగర ప్రజలు భారాసకు మంచి మద్దతు ఇచ్చారు

03/12/2023 18:06(IST)

ఓటమికి కారణాలు సమీక్షించుకుంటాం.. ప్రెస్‌మీట్‌లో కేటీఆర్‌

భారాస పార్టీ అభ్యర్థుల విజయం కోసం ప్రయత్నం చేసిన ప్రతి కార్యకర్తకు హృదయపూర్వక ధన్యవాదాలు: కేటీఆర్‌
గతం కన్నా మెజార్టీ సాధిస్తామని ఆశాభావంతో ఎన్నికలకు వెళ్లాం.
ఓటమికి కారణాలను సమీక్షించుకుంటాం.
119 సీట్లకు గాను 39 సీట్లు ఇచ్చి ప్రతిపక్ష పాత్ర పోషించాలని ప్రజలు ఆదేశించారు.
ఈ బాధ్యతను సమర్థంగా నిర్వహిస్తాం.
పదేళ్లు ప్రభుత్వాన్ని అప్పగిస్తే సమర్థంగా నడిపాం. సేవలందించాం.
ఈ ఎదురు దెబ్బను పాఠంగా నేర్చుకొని ముందుకు సాగుతాం.
23 ఏళ్లలో అనేక ఎత్తుపల్లాలు చూశాం. ప్రజల దయతో పదేళ్లు అధికారంలో ఉన్నాం.
మేం చేసిన పనిపట్ల సంతృప్తి ఉంది. ఓడిపోయామన్న బాధ, అసంతృప్తి లేదు.
గతంలో చేసిన దానికంటే రెట్టింపు కష్టం చేస్తాం. ఎవరూ నిరాశకు గురికావొద్దు.
రాజకీయాలు, జీవితంలో గెలుపోటమిలు సర్వసాధారణం.
కాంగ్రెస్‌ పార్టీకి ప్రజలు అవకాశం ఇచ్చారు. ఆ పార్టీకి శుభాకాంక్షలు
కొత్త ప్రభుత్వాన్ని తొందరపెట్టం.. వాళ్లు కుదురుకోవాలి. పనిచేయాలి.
ప్రజలకు ఇచ్చిన హామీలు నిలబెట్టుకుంటారని ఆశిస్తున్నాం.

03/12/2023 17:37(IST)

తెలంగాణ డీజీపీ అంజనీకుమార్‌ సస్పెండ్‌

తెలంగాణ డీజీపీ అంజనీ కుమార్‌ సస్పెన్షన్‌కు గురయ్యారు. ఎన్నికల కోడ్‌ ఉల్లంఘించారంటూ ఆయన్ను కేంద్ర ఎన్నికల సంఘం సస్పెండ్‌ చేసింది. ఇద్దరు అదనపు డీజీలు సందీప్‌ కుమార్‌ జైన్‌, మహేశ్‌ భగవత్‌కు నోటీసులు జారీ చేసింది.

03/12/2023 17:21(IST)

ప్రజా తీర్పును గౌరవిస్తున్నాం: ఈటల రాజేందర్‌

20 ఏళ్లుగా హుజురాబాద్ ప్రజలు వారికి సేవ చేసే భాగ్యాన్ని కలిగించారు. వారి రుణం తీర్చుకోలేనిది.
గెలుపొందిన భాజపా అభ్యర్థులకు హార్దిక శుభాకాంక్షలు. ప్రజల సమస్యలను అసెంబ్లీ సాక్షిగా వినిపించాలని కోరుకుంటున్నా.
అధికారం చేపట్టబోతున్న కాంగ్రెస్ పార్టీకి శుభాకాంక్షలు.
ఈ ఎన్నికలలో భారతీయ జనతా పార్టీ గెలుపుకోసం అహర్నిశలు కృషి చేసిన నాయకులకు, కార్యకర్తలకు, అభిమానులకు ప్రజలందరికీ హృదయపూర్వక కృతజ్ఞతలు. జై తెలంగాణ !! భారత్ మాతా కీ జై !!

03/12/2023 17:00(IST)

‘‘భాజపాను సపోర్ట్‌ చేసిన తెలంగాణ సోదర, సోదరీమణులకు ధన్యవాదాలు. గత కొన్నేళ్లుగా మీ సహాయ సహకారాలతోనే ముందుకు వెళ్తున్నాం. ఇది భవిష్యత్‌లోనూ కొనసాగాలి. తెలంగాణతో మా అనుబంధం ఎవరూ తెంచలేరు. రాష్ట్ర ప్రజల కోసం మరింత కష్టపడతాం. ఎన్నికల్లో భాజపా అభ్యర్థుల గెలుపుకోసం కృషి చేసిన ప్రతి కార్యకర్తకు నా అభినందనలు’’ - ప్రధాని మోదీ

03/12/2023 16:55(IST)

సోమవారం కాంగ్రెస్‌ ముఖ్యమంత్రి ప్రమాణ స్వీకారం

తెలంగాణ ఎన్నికల్లో విజయం సాధించిన కాంగ్రెస్‌ పార్టీ ప్రభుత్వ ఏర్పాటుకు సన్నాహాలు చేస్తోంది. సోమవారం ముఖ్యమంత్రి ప్రమాణ స్వీకారోత్సవం జరగనుంది. హైదరాబాద్‌ ఎల్బీ స్టేడియం వేదికగా ఈ కార్యక్రమం నిర్వహించనున్నారు. ఎన్నికల్లో గెలిచిన కాంగ్రెస్‌ ఎమ్మెల్యేలు ఇప్పటికే తాజ్‌ కృష్ణకు చేరుకున్నారు. ఈ రోజు రాత్రి సీఎల్పీ సమావేశం జరగనుంది.

03/12/2023 16:40(IST)

కామారెడ్డిలో భాజపా విజయం

తెలంగాణ ప్రజలు ఆసక్తిగా గమనించిన ఫలితం కామారెడ్డి. సీఎం కేసీఆర్‌, టీపీసీసీ అధ్యక్షుడు రేవంత్‌రెడ్డి ఇదే స్థానం నుంచి పోటీ చేస్తుండటంతో అందరి దృష్టిని ఆకర్షించింది. అయితే, కామారెడ్డి ప్రజలు స్థానిక నాయకుడైన భాజపా అభ్యర్థి కాటిపల్లి వెంకట రమణారెడ్డికి పట్టం గట్టారు. 5,156 ఓట్ల మెజార్టీతో తన సమీప ప్రత్యర్థి, భారాస అభ్యర్థి సీఎం కేసీఆర్‌పై విజయం సాధించారు. రేవంత్‌రెడ్డి మూడో స్థానానికి పరిమితమయ్యారు.

03/12/2023 16:31(IST)

సాధారణ మెజార్టీ సాధించిన కాంగ్రెస్‌

తెలంగాణలో 119 అసెంబ్లీ స్థానాలకు జరిగిన ఎన్నికల్లో కాంగ్రెస్‌ పార్టీ 60 స్థానాల్లో విజయం సాధించి, మేజిక్‌ ఫిగర్‌ను అందుకుంది. ప్రభుత్వ ఏర్పాటుకు అవసరమైన స్థానాలను ఇప్పటికే గెలుచుకోగా, మరో నాలుగు స్థానాల్లో ఆధిక్యంలో కొనసాగుతోంది.

03/12/2023 16:19(IST)

ప్రజా సమస్యలపై రాజీలేని పోరాటం చేస్తాం: సబితా ఇంద్రారెడ్డి

రాష్ట్రంలో ప్రజలు ఇచ్చిన తీర్పు శిరోధార్యం, శిరసావహిస్తున్నాం!
కేసీఆర్ నాయకత్వంలో ముందుకు సాగుతాం
నా విజయానికి కృషి చేసిన భారాస నాయకులు, కార్యకర్తలకు కృతజ్ఞతలు : సబితా
నియోజకవర్గ ప్రజలకు ఎప్పుడూ అందుబాటులో ఉంటా!

03/12/2023 16:09(IST)

ఈ తీర్పు ఇచ్చిన తెలంగాణ ప్రజలకు కృతజ్ఞతలు: రేవంత్‌రెడ్డి

ఈరోజు తెలంగాణ ప్రజలు ప్రజాస్వామ్యాన్ని పునరుద్ధరించారు.
తెలంగాణ ప్రజల ఆకాంక్షలను నెరవేర్చేందుకు కాంగ్రెస్‌కు అవకాశం వచ్చింది.
భారత్‌ జోడో యాత్ర తెలంగాణలో 21 రోజులు సాగింది.
భారత్‌ జోడో యాత్ర ద్వారా రాహుల్‌ మాలో స్ఫూర్తినింపారు.
రాహుల్‌, సోనియా, ప్రియాంకలకు తెలంగాణతో కుటుంబం అనుబంధం ఉంది.
నన్ను, భట్టి విక్రమార్కను రాహుల్‌గాంధీ వెన్నుతట్టి ప్రోత్సహించారు.
ఈ విజయాన్ని తెలంగాణ అమరవీరులకు అంకితం.
కాంగ్రెస్‌ గెలుపును కేటీఆర్‌ స్వాగతించారు.
కేటీఆర్‌ స్పందనను స్వాగిస్తున్నా: రేవంత్‌రెడ్డి
విపక్షాలు సహకరించాలని మనస్ఫూర్తిగా కోరుతున్నా
ప్రమాణ స్వీకార కార్యక్రమానికి అన్ని పార్టీలను ఆహ్వానిస్తా
కాంగ్రెస్‌ ఇచ్చిన ఆరు గ్యారెంటీలు, ఇతర హామీలను నెరవేరుస్తాం.

03/12/2023 16:08(IST)

ప్రజా తీర్పును గౌరవిస్తున్నాం.. కాంగ్రెస్‌కు కంగ్రాట్స్‌: హరీశ్‌

తెలంగాణ అసెంబ్లీ ఎన్నికల ఫలితాలపై మంత్రి హరీశ్‌రావు స్పందించారు. ప్రజా తీర్పును గౌరవిస్తున్నాం. కాంగ్రెస్ పార్టీకి శుభాకాంక్షలు అంటూ ట్వీట్‌ చేశారు.

03/12/2023 16:02(IST)

కోమటిరెడ్డి వెంకట్‌ రెడ్డి విజయం

నల్గొండ నియోజకవర్గంలో కాంగ్రెస్‌ అభ్యర్థి కోమటిరెడ్డి వెంకట్‌రెడ్డి విజయం సాధించారు.
నర్సంపేట నుంచి కాంగ్రెస్‌ అభ్యర్థి దొంతి మాధవరెడ్డి; మహబూబాబాద్‌ నుంచి మురళీ నాయక్‌ గెలుపొందారు.

03/12/2023 15:39(IST)

స్పీకర్ గా పనిచేసిన వారు ఓడిపోతారనే అపోహ వీడింది: పోచారం శ్రీనివాస్ రెడ్డి

బాన్సువాడ ఎమ్మెల్యే గెలిచిన భారాస అభ్యర్థి, స్పీకర్ పోచారం శ్రీనివాస్‌రెడ్డి
రిటర్నింగ్ అధికారి నుంచి గెలుపు ధ్రువ పత్రం పొందిన పోచారం
స్పీకర్‌గా పనిచేసిన వారు ఓడిపోతారనే అపోహ వీడింది.
ప్రజలతో మమేకమై ఉండటం వల్లే ఈ రోజు నేను గెలిచా

03/12/2023 15:26(IST)

ప్రతి బిడ్డ బతుకులో వెలుగు నింపే బాధ్యత తీసుకుంటా!

‘‘ఆత్మగౌరవ జెండాను ఆకాశమంత ఎత్తున ఎగరేసిన కొడంగల్ గడ్డకు శిరస్సు వంచి నమస్కరిస్తున్నా. కొన ఊపిరి వరకూ కొడంగలే శ్వాసగా జీవిస్తా. కష్టకాలంలో భుజాలు కాయలు కాసేలా కాంగ్రెస్ జెండాను మోసిన ప్రతి కార్యకర్తనూ కడుపులో పెట్టుకుని చూసుకుంటా. ఈ గడ్డపై ప్రతి బిడ్డ బతుకులో వెలుగు నింపే బాధ్యత తీసుకుంటా. దేశానికి కొడంగల్‌ను ఒక మోడల్ గా నిలబెడతా’’ -రేవంత్‌రెడ్డి ట్వీట్‌

03/12/2023 15:12(IST)

తెలంగాణ ఎన్నికల ఫలితాలపై స్పందించిన కేటీఆర్‌

భారాసకు వరుసగా రెండు సార్లు ప్రభుత్వాన్ని అందించినందుకు తెలంగాణ ప్రజలకు కృతజ్ఞతలు.
ఈరోజు ఫలితం గురించి బాధపడలేదు, కానీ అది మాకు ఆశించిన స్థాయిలో లేకపోవడంతో కచ్చితంగా నిరాశ చెందా.
మేము దీన్నొక పాఠంగా తీసుకుని, తిరిగి పుంజుకుంటాం.
ఎన్నికల్లో విజయం సాధించిన కాంగ్రెస్ పార్టీకి అభినందనలు. మీకు శుభం జరగాలని కోరుకుంటున్నాను

03/12/2023 15:04(IST)

భారాస హయాంలో ప్రజాస్వామ్యం ఖూనీ: కోమటిరెడ్డి రాజగోపాల్ రెడ్డి

డిసెంబర్ 3న తెలంగాణ ప్రజల నిర్ణయం చరిత్రలో నిలిచిపోతుంది.
ఆత్మగౌరం కోసం పోరాటం చేసిన తెలంగాణలో ఒక కుటుంబం దోచుకుంది
అవినీతితో కూరుకుపోయిన భారాసకి ప్రజలు చరమగీతం పాడారు.
తెలంగాణ ప్రజలందరికీ హృదయపూర్వక అభినందనలు
నా ఆశయం లక్ష్యం నెరవేరినందుకు సంతోషంగా ఉన్నా.
సోనియాగాంధీకి తెలంగాణ ప్రజలు గిఫ్ట్ ఇచ్చినందుకు సంతోషం

03/12/2023 14:42(IST)

ప్రజలు మంచి నిర్ణయం తీసుకుని గెలిపించారు: కల్వకుర్తి కాంగ్రెస్‌ అభ్యర్థి కసిరెడ్డి నారాయణరెడ్డి

నా గెలుపు కోసం నాయకత్వం కృషి చేసింది.
నియోజకవర్గం ప్రజలకు ధన్యవాదాలు.
ప్రజా సమస్యలు, ఇచ్చిన హామీలు నెరువేరుస్తా.
ఇప్పుడు కాంగ్రెస్ ప్రభుత్వం ఏర్పాటు కానుండటం అదృష్టం.
రేవంత్‌రెడ్డి ముఖ్యమంత్రి అవ్వాలి.
కల్వకుర్తి ప్రజలకు ఎల్లవేళలా అందుబాటులో ఉంటా.
ప్రభుత్వం సాయంతో నియోజకవర్గం అభివృద్ధి కోసం కృషి చేస్తా.

03/12/2023 14:24(IST)

కామారెడ్డిలో భాజపా ఆధిక్యం

కామారెడ్డిలో భాజపా అభ్యర్థి వెంకట రమణారావు ఆధిక్యంలో కొనసాగుతున్నారు.
13వ రౌండ్‌ ముగిసే సమయానికి 625 ఓట్ల లీడ్‌లో ఉన్నారు.
ఆ తర్వాతి స్థానంలో రేవంత్‌రెడ్డి ఉండగా, మూడో స్థానంలో సీఎం కేసీఆర్‌ ఉన్నారు.

03/12/2023 13:02(IST)

అందోల్‌లో కాంగ్రెస్‌ పార్టీ విజయం

అందోల్‌ శాసనసభా నియోజకవర్గంలో కాంగ్రెస్‌ పార్టీ విజయం సాధించింది.
ఆ పార్టీ అభ్యర్థి దామోదర్‌ రాజ నర్సింహా తన సమీప ప్రత్యర్థి భారాస అభ్యర్థి చంటి క్రాంతి కిరణ్‌పై గెలుపొందారు.

03/12/2023 12:48(IST)

భారీ ర్యాలీగా గాంధీభవన్‌కు రేవంత్‌రెడ్డి

తెలంగాణ ఎన్నికల్లో కాంగ్రెస్‌ పార్టీ స్పష్టమైన ఆధిక్యంలో దూసుకెళ్తున్న నేపథ్యంలో టీపీసీసీ అధ్యక్షుడు రేవంత్‌రెడ్డి ఇంటి వద్ద భద్రత పెంచారు. మరోపైపు భారీ ర్యాలీగా రేవంత్‌రెడ్డి గాంధీభవన్‌కు బయలుదేరారు.

03/12/2023 12:36(IST)

సీఎం అభ్యర్థిపై కలిసి నిర్ణయం తీసుకుంటాం: కోమటిరెడ్డి

సీఎం అభ్యర్థిపై ఎమ్మెల్యేలంతా కలిసి నిర్ణయం తీసుకుంటామని కాంగ్రెస్‌ పార్టీ నాయకుడు కోమటిరెడ్డి వెంకటరెడ్డి అన్నారు. ఆదివారం ఆయన విలేకరులతో మాట్లాడుతూ.. తెలంగాణ విజయాన్ని సోనియాగాంధీకి బర్త్‌డే గిఫ్ట్‌ ఇస్తున్నామని అన్నారు. తాను సీఎం రేసులో ఉన్నానా? లేదా? అన్నది అప్రస్తుతమని వ్యాఖ్యానించారు. పీసీసీ అధ్యక్షుడు కాబట్టే రేవంత్‌రెడ్డిని డీజీపీ కలిశారని అన్నారు.

03/12/2023 12:32(IST)

కేంద్ర అధినాయకత్వం నిర్ణయం మేరకు తదుపరి కార్యాచరణ: డీకే శివకుమార్‌

తెలంగాణలో కాంగ్రెస్‌ పార్టీ ఆధిక్యంలో దూసుకెళ్తున్న నేపథ్యంలో తదుపరి కార్యాచరణను కేంద్ర అధినాయకత్వం నిర్ణయం మేరకు తీసుకుంటామని, కర్ణాటక ఉప ముఖ్యమంత్రి డీకే శివకుమార్‌ విలేకరులతో అన్నారు. కేసీఆర్‌, కేటీఆర్‌లకు మీరు ఏమైనా చెప్పాలనుకుంటున్నారా? అని అడిగిన ప్రశ్నకు ఇప్పుడేం వ్యాఖ్యలు చేయబోనని అన్నారు. పూర్తి ఫలితాలు వచ్చాక, వాళ్లు పెట్టిన ట్వీట్లకు తాము సమాధానం ఇస్తామని అన్నారు. అయితే, తెలంగాణ ప్రజలు ఇప్పటికే సమాధానం ఇచ్చేశారని అన్నారు.

03/12/2023 12:25(IST)

రేవంత్‌ ఇంటి వద్ద భద్రత పెంపు

తెలంగాణ ఎన్నికల ఫలితాల్లో కాంగ్రెస్‌ ఆధిక్యంలో దూసుకెళ్తున్న నేపథ్యంలో టీపీసీసీ అధ్యక్షుడు రేవంత్‌రెడ్డి ఇంటి వద్ద భద్రత పెంచారు. ఈ క్రమంలో తెలంగాణ డీజీపీ అంజనీకుమార్‌.. రేవంత్‌ ఇంటికి వెళ్లారు. ఆయన వెంట పలువురు ఐపీఎస్‌లు కూడా ఉన్నారు.

03/12/2023 12:21(IST)

గోషా మహల్‌లో రాజాసింగ్‌ ఆధిక్యం

ఖైరతాబాద్‌లో భారాస అభ్యర్థి దానం నాగేందర్‌ ముందంజ.
జూబ్లీహిల్స్‌లో భారాస అభ్యర్థి మాగంటి గోపీనాథ్‌ ఆధిక్యం.
పరిగిలో కాంగ్రెస్‌ అభ్యర్థి రామ్మోన్‌రెడ్డి ఆధిక్యం
తాండూరులో పైలెట్‌ రోహిత్‌రెడ్డి ముందంజ

03/12/2023 12:13(IST)

రామగుండంలో కాంగ్రెస్‌ పార్టీ విజయం

ఎన్నికల ఫలితాల్లో కాంగ్రెస్‌ పార్టీ మూడో విజయాన్ని నమోదు చేసింది. రామగుండం భారాస అభ్యర్థి కోరుకంటి చందర్‌పై కాంగ్రెస్‌ అభ్యర్థి మక్కాన్‌ సింగ్‌ రాజ్‌ఠాకూర్‌ విజయం సాధించారు.

03/12/2023 12:01(IST)

రెండో విజయం కూడా కాంగ్రెస్‌దే!

తెలంగాణ ఎన్నికల్లో రెండో విజయాన్ని కూడా కాంగ్రెస్‌ పార్టీ నమోదు చేసింది. భద్రాద్రి కొత్తగూడెం జిల్లా ఇల్లెందు (ఎస్టీ) నుంచి పోటీ చేసిన కాంగ్రెస్‌ అభ్యర్థి కోరం కనకయ్య తన సమీప ప్రత్యర్థి భారాస అభ్యర్థి బానోతు హరిప్రియ నాయక్‌పై గెలుపొందారు.

03/12/2023 11:50(IST)

రాహుల్‌గాంధీ జోడో యాత్ర రాష్ట్రంలో విజయవంతమైంది: ఉత్తమ్‌ కుమార్‌రెడ్డి

ఆయన ఇమేజ్‌ తెలంగాణ ఎన్నికల్లో ఉపయోగపడింది.
అవినీతి, అహంకారం, నియంత తరహా పాలనతో ప్రజలు విసిగిపోయారు.
సరైన సమయం కోసం ప్రజలు వేచి చూసి తీర్పు చెప్పారు.

03/12/2023 11:42(IST)

తెలంగాణ ఎన్నికల్లో కనపడని జనసేన ప్రభావం

తెలంగాణ ఎన్నికల ఫలితాలు వెలువడుతున్న నేపథ్యంలోకాంగ్రెస్‌ పార్టీ స్పష్టమైన ఆధిక్యంతో ముందుకు వెళ్తోంది. మరోవైపు ఈ ఎన్నికల్లో భాజపాతో పొత్తు పెట్టుకుని 8 స్థానాల్లో పోటీ చేసిన జనసేన ప్రభావం పెద్దగా లేదు. కూకట్‌పల్లిలో ఆ పార్టీ అభ్యర్థి ప్రేమ్‌కుమార్‌ మూడో స్థానంలో కొనసాగుతున్నారు. అక్కడ జనసేనకు ఇప్పటివరకూ 14,954 ఓట్లు వచ్చాయి. ఖమ్మం, కొత్తగూడెం, వైరా, అశ్వారావుపేటల్లో ఎక్కడా ఆ పార్టీ ప్రభావం చూపలేకపోయింది.

03/12/2023 11:33(IST)

మొదటి విజయం కాంగ్రెస్‌దే!

తెలంగాణ ఎన్నికల్లో స్పష్టమైన మెజార్టీతో ముందుకు వెళ్తున్న కాంగ్రెస్‌ పార్టీ తొలి విజయం నమోదు చేసింది.
అశ్వారావుపేట అభ్యర్థి ఆదినారాయణరావు విజయం సాధించారు.
భారాస అభ్యర్థి మెచ్చా నాగేశ్వరరావుపై ఆదినారాయణరావు విజయం సాధించారు.

03/12/2023 11:29(IST)

నిజామాబాద్ రూరల్: పదో రౌండ్ ముగిసే సరికి 8055 ఓట్ల ఆధిక్యంలో కాంగ్రెస్ అభ్యర్థి భూపతిరెడ్డి.
భూపాలపల్లి: నాలుగో రౌండ్ ముగిసే సరికి 9285 ఓట్ల ఆధిక్యంలో కాంగ్రెస్ పార్టీ అభ్యర్థి గండ్ర సత్యనారాయణ రావు
అశ్వారావుపేట: 11వ రౌండ్ పూర్తి అయ్యేసరికి కాంగ్రెస్ అభర్థి జారే ఆదినారాయణ 23,831 ఓట్ల ఆధిక్యం

03/12/2023 11:28(IST)

మూడు రాష్టాల్లో భాజపా ఆధిక్యం..

నాలుగు రాష్ట్రాల అసెంబ్లీ ఎన్నికల ఫలితాలు వెలువడుతున్నాయి.
మధ్యప్రదేశ్‌, రాజస్థాన్‌, ఛత్తీస్‌గఢ్‌ రాష్ట్రాల్లో భాజపా ఆధిక్యంలో దూసుకుపోతోంది.
తెలంగాణలో కాంగ్రెస్‌ ఆధిక్యం కొనసాగుతోంది.

03/12/2023 11:27(IST)

ఆ మంత్రులు వెనుకంజ.. వీళ్లు ముందంజ

తెలంగాణ ఎన్నికల ఫలితాల్లో భారాస మంత్రులు వెనుకంజలో కొనసాగుతున్నారు.
పాలకుర్తి నుంచి పోటీ చేసిన ఎర్రబెల్లి దయాకర్‌రావు, ధర్మపురి అభ్యర్థి కొప్పుల ఈశ్వర్‌, ఖమ్మం అభ్యర్థి పువ్వాడ అజయ్‌, నిర్మల్‌ అభ్యర్థి ఇంద్రకరణ్‌రెడ్డిలు వెనుకంజలో ఉన్నారు.
జగదీశ్‌రెడ్డి (సూర్యాపేట), మల్లారెడ్డి (మేడ్చల్‌), సబితా ఇంద్రారెడ్డి (మహేశ్వరం)లు ముందంజలో ఉన్నారు.

03/12/2023 11:20(IST)

బర్రెలక్కకు 983 ఓట్లు

ఈ ఎన్నికల్లో బాగా వినిపించిన పేరు కర్నె శిరీష అలియాస్‌ బర్రెలక్క.
కొల్లాపూర్‌ నియోజకవర్గం నుంచి పోటీ చేసిన ఆమెకు మూడు రౌండ్లు పూర్తయ్యే సమయానికి 983 ఓట్లు వచ్చాయి.
కాంగ్రెస్‌ అభ్యర్థి జూపల్లి కృష్ణారావు (14,200 ఓట్లు) ప్రస్తుతం లీడ్‌లో ఉన్నారు.

03/12/2023 11:06(IST)

పదివేల ఓట్ల ఆధిక్యంలో వీళ్లు...

మధిర ఐదో రౌండ్ ముగిసే సమయానికి భట్టి విక్రమార్క (కాంగ్రెస్‌) 10,499 ఓట్లతో లీడ్‌
ఆర్మూర్ ఐదో రౌండ్ పూర్తయ్యే సరికి రాకేష్ రెడ్డి (భాజపా) 10,321 ఓట్ల ఆధిక్యం
అశ్వారావుపేట ఏడో రౌండ్ పూర్తి అయ్యేసరికి కాంగ్రెస్ అభ్యర్థి జారే ఆదినారాయణ 13,876 ఆధిక్యం
రామగుండం 9వ రౌండు పూర్తి అయ్యేసరికి కాంగ్రెస్ అభ్యర్థి మక్కన్ సింగ్ రాజ్ ఠాగూర్ 29,641 ఓట్ల ఆధిక్యం

03/12/2023 11:02(IST)

రాజేంద్రనగర్‌: నాలుగో రౌండు ముగిసే సమయానికి తొల్కంటి ప్రకాశ్‌గౌడ్‌ (భారాస) 213 ఓట్ల ఆధిక్యం

మంథని: శ్రీధర్‌బాబు (కాంగ్రెస్‌) 10,504 ఓట్ల లీడ్‌ (8వ రౌండ్‌)
ఆసిఫాబాద్: కోవ లక్ష్మి (భారాస) 7036 ఓట్లతో ముందంజ (ఐదో రౌండ్‌)
ఖానాపూర్‌: వెడ్మ బొజ్జు (కాంగ్రెస్‌) 3,918 ఓట్ల లీడ్‌ (నాలుగో రౌండ్‌)

03/12/2023 10:47(IST)

బండి సంజయ్‌పై రెండు వేల ఓట్ల ఆధిక్యంలో గంగుల

నాలుగో రౌండ్‌ పూర్తయ్యే సమయానికి కరీంనగర్‌ భారాస అభ్యర్థి గంగుల కమలాకర్‌ 2,232 ఓట్ల ఆధిక్యం.
షాద్‌నగర్‌లో నాలుగు రౌండ్లు పూర్తయ్యే సమయానికి కాంగ్రెస్ అభ్యర్థి శంకరయ్య 2,586 ఓట్ల ఆధిక్యం.
భువనగిరిలో కాంగ్రెస్ అభ్యర్థి కుంభ అనిల్‌కుమార్‌ రెడ్డి నాలుగో రౌండ్‌ ముగిసే సమయానికి 3,873 ఓట్ల ఆధిక్యం

03/12/2023 10:44(IST)

ఛత్తీస్‌గఢ్‌లో హోరాహోరీ పోరు..

ఛత్తీస్‌గఢ్‌లో భాజపా, కాంగ్రెస్‌ల మధ్య హోరాహోరీ పోరు
ఇరు పార్టీల మధ్య క్షణక్షణానికి మారుతున్న ఆధిక్యం
ప్రస్తుతం భాజపా 48 స్థానాల్లో ఆధిక్యంలో ఉండగా.. కాంగ్రెస్‌ 40 స్థానాల్లో ముందంజలో ఉంది.

03/12/2023 10:44(IST)

ఆరో రౌండ్‌లోనూ కొనసాగుతున్న రేవంత్ రెడ్డి ఆధిక్యం

ఆరో రౌండ్ ముగిసే సరికి టీపీసీసీ అధ్యక్షుడు రేవంత్‌రెడ్డి కొడంగల్‌లో 6,416 ఓట్ల ఆధిక్యం.
జడ్చర్లలో కాంగ్రెస్‌ అభ్యర్థి అనిరుధ్‌రెడ్డి ముందంజ.
దేవరకద్రలో కాంగ్రెస్‌ అభ్యర్థి మధుసూదన్‌రెడ్డి ముందంజ.
మహబూబ్‌నగర్‌లో భారాస అభ్యర్థి శ్రీనివాసగౌడ్‌ ఆధిక్యం.
బాల్కొండలో మంత్రి ప్రశాంత్ రెడ్డి వెనుకంజ. ఆరు రౌండ్ల తర్వాత 3897 ఓట్ల ఆధిక్యంలో కాంగ్రెస్ అభ్యర్థి సునీల్ కుమార్ లీడ్‌.
కంటోన్మెంట్‌లో మూడో రౌండ్‌ ముగిసే సమయానికి లాస్య నందితకు 7,221 ఓట్ల ఆధిక్యం.

03/12/2023 10:40(IST)

సిద్దిపేటలో హరీశ్‌రావు హవా

ఎన్నికల ఫలితాల్లో సిద్దిపేట భారాస అభ్యర్థి, మంత్రి మంత్రి హరీశ్‌రావు హవా కొనసాగుతోంది. మూడు రౌండ్లు పూర్తయ్యే సరికి 15,742 ఓట్ల ఆధిక్యంలో ఉన్నారు.
ఖమ్మంలో భారాస అభ్యర్థి పువ్వాడ అజయ్‌ వెనుకంజలో ఉన్నారు. నాలుగు రౌండ్లు ముగిసేసరికి కాంగ్రెస్‌ అభ్యర్థి తుమ్మల నాగేశ్వరరావు 1,554 ఓట్ల ఆధిక్యంలో కొనసాగుతున్నారు.
వేములవాడలో కాంగ్రెస్‌ అభ్యర్థి శ్రీనివాస్‌ ముందంజలో ఉన్నారు.

03/12/2023 10:32(IST)

రామగుండం: 6వ రౌండు పూర్తి అయ్యేసరికి కాంగ్రెస్ అభ్యర్థి 21, 138 ఓట్ల ఆధిక్యంలో మాణిక్‌సింగ్‌ రాజ్‌ ఠాకూర్‌
కల్వకుర్తి: ఐదో రౌండ్ ముగిసే సమయానికి 4,771 ఓట్ల ఆధిక్యంలో కాంగ్రెస్ అభ్యర్థి నారాయణరెడ్డి.
షాద్‌నగర్‌: మూడు రౌండ్లు ముగిసే సమయానికి కాంగ్రెస్ అభ్యర్థి శంకరయ్య 1783 ఓట్లతో ముందంజ.

03/12/2023 10:30(IST)

ఈసీ వెబ్‌సైట్‌ క్రాష్..!

నాలుగు రాష్ట్రాల అసెంబ్లీ ఎన్నికల కౌంటింగ్ ప్రక్రియ కొనసాగుతోంది.
ఫలితాల కోసం.. పెద్ద సంఖ్యలో ఎన్నికల సంఘం(EC) వెబ్‌సైట్‌ను ఆశ్రయిస్తున్నారు.
దీంతో ఈసీ వెబ్‌సైట్‌ క్రాష్ అయినట్లు తెలుస్తోంది.
దానిపై నెటిజన్లు సోషల్ మీడియాలో ఫిర్యాదు చేస్తున్నారు.

03/12/2023 10:21(IST)

కొడంగల్‌లో రేవంత్‌.. సిరిసిల్లలో కేటీఆర్‌ ముందంజ

కొడంగల్‌లో కొనసాగుతున్న రేవంత్‌రెడ్డి ఆధిక్యం. నాలుగో రౌండ్‌లో 5,687 ఓట్ల ఆధిక్యం.
మూడో రౌండ్‌లో భారాస అభ్యర్థి మల్లారెడ్డి 7,459 ఓట్లతో ముందంజ.
బాన్సువాడలో భారాస అభ్యర్థి పోచారం శ్రీనివాస్‌రెడ్డి ఆధిక్యం. ఐదు రౌండ్ల తర్వాత 1574 ఓట్ల లీడ్‌.
సిరిసిల్ల నియోజకవర్గం మూడో రౌండ్ పూర్తయ్యేసరికి భారాస అభ్యర్థి కేటీఆర్ 2,621 ఓట్లతో ముందంజ.

03/12/2023 10:15(IST)

వీళ్లు ఆధిక్యంలో కొనసాగుతున్నారు

పినపాక: పాయం వెంకటేశ్వర్లు (కాంగ్రెస్‌)
ఆదిలాబాద్‌: పాయల్‌ శంకర్‌ (భాజపా)
ఖానాపూర్‌: వెడ్మబొజ్జు (కాంగ్రెస్‌)
సంగారెడ్డి: చింతా ప్రభాకర్‌ (భారాస)
చొప్పదండి: మేడిపల్లి సత్యం (కాంగ్రెస్)
మంథని: దుద్దిళ్ల శ్రీధర్‌బాబు (కాంగ్రెస్)
హుస్నాబాద్‌: పొన్నం ప్రభాకర్‌ (కాంగ్రెస్)
పెద్దపల్లి: విజయరమణారావు (కాంగ్రెస్‌)
బాల్కొండ: సునీల్‌కుమార్‌ (కాంగ్రెస్‌)
ఆర్మూర్‌: పైడి రాకేశ్‌రెడ్డి (భాజపా)
బోధన్‌: సుదర్శన్‌రెడ్డి (కాంగ్రెస్‌)

03/12/2023 09:45(IST)

సిద్ధిపేటలో హరీశ్‌రావు (భారాస) ముందంజ

నర్సాపూర్‌: సునీతా లక్ష్మారెడ్డి (భారాస) లీడ్‌
సికింద్రాబాద్‌: టి.పద్మారావు (భారాస) ఆధిక్యం
దేవరకొండ: బాలూ నాయక్‌ (కాంగ్రెస్‌) లీడ్‌
మానకొండూరులో : సత్యనారాయణ (కాంగ్రెస్‌) లీడ్‌..
వనపర్తి : నిరంజన్‌రెడ్డి (భారాస) ఆధిక్యం
సనత్‌నగర్‌: తలసాని శ్రీనివాస్‌ యాదవ్‌ (భారాస) ఆధిక్యం

03/12/2023 09:45(IST)

మధ్య ప్రదేశ్‌లో ఆధిక్యంలో మ్యాజిక్‌ ఫిగర్‌ను దాటిన భాజపా

మధ్యప్రదేశ్‌లో భాజపా ఆధిక్యంలో దూసుకుపోతోంది.
కమలం పార్టీ ఇక్కడ ఆధిక్యంలో మ్యాజిక్‌ ఫిగర్‌(116)ను దాటింది. ప్రస్తుతం ఆ పార్టీ 144 స్థానాల్లో ఆధిక్యంలో కొనసాగుతోంది.
కాంగ్రెస్‌ 58 చోట్ల.. ఇతరులు 2 చోట్ల ముందంజలో ఉన్నారు.

03/12/2023 09:40(IST)

8వేల ఓట్ల ఆధిక్యంలో సీఎం కేసీఆర్‌..

గజ్వేల్‌ నియోజకవర్గంలో భారాస అభ్యర్థి, సీఎం కేసీఆర్‌ తొలి రౌండ్‌ ముగిసే సరికి 8,827 ఓట్ల ఆధిక్యంలో ఉన్నారు.
మేడ్చల్‌: మల్లారెడ్డి (భారాస) లీడ్‌..
ఇల్లెందు: కనకయ్య (కాంగ్రెస్‌) ఆధిక్యం..
నారాయణఖేడ్‌: సంజీవ్‌రెడ్డి (కాంగ్రెస్) ఆధిక్యం..
అచ్చంపేట: వంశీకృష్ణ (కాంగ్రెస్) లీడ్‌

03/12/2023 09:37(IST)

50+ స్థానాల్లో కాంగ్రెస్‌ ఆధిక్యం

తెలంగాణ ఎన్నికల్లో కాంగ్రెస్‌ పార్టీ ఆధిక్యంలో కొనసాగుతోంది. ఇప్పటివరకూ 50+ స్థానాల్లో లీడ్‌లో ఉంది. అధికార భారాస 34 స్థానాల్లో, భాజపా 8 చోట్ల, ఇతరులు 2 స్థానాల్లో ఆధిక్యంలో కొనసాగుతున్నారు.

03/12/2023 09:33(IST)

కరీంనగర్‌లో బండి సంజయ్‌పై గంగుల లీడింగ్‌..

కరీంనగర్‌లో భాజపా అభ్యర్థి బండి సంజయ్‌పై భారాస అభ్యర్థి గంగుల కమలాకర్‌ ఆధిక్యంలో కొనసాగుతున్నారు.
హుజూరాబాద్‌లో ఈటల రాజేందర్‌ (భాజపా) వెనుకంజలో ఉన్నారు. భారాస అభ్యర్థి పాడి కౌశిక్‌రెడ్డి 1061 ఓట్లతో ఆధిక్యంలో ఉన్నారు.

03/12/2023 09:30(IST)

కామారెడ్డి, కొడంగల్‌ రెండింటిలోనూ రేవంత్‌రెడ్డి ఆధిక్యం

కాంగ్రెస్‌ పార్టీ తెలంగాణ అధ్యక్షుడు రేవంత్‌రెడ్డి కామారెడ్డి, కొడంగల్‌ నియోజకవర్గాల్లో లీడ్‌లో ఉన్నారు. కామారెడ్డిలో 1981 ఓట్లు, కొడంగల్‌లో 1,365 ఓట్లతో లీడింగ్‌లో ఉన్నారు.

03/12/2023 09:23(IST)

రెండో రౌండ్‌లోనూ రేవంత్‌రెడ్డి ముందంజ

కామారెడ్డి నియోజకవర్గంలో కాంగ్రెస్‌ అభ్యర్థి రేవంత్‌రెడ్డి రెండో రౌండ్‌లోనూ ముందంజలో ఉన్నారు.
బెల్లంపల్లిలో తొలిరౌండ్‌లో కాంగ్రెస్‌ అభ్యర్థి వినోద్‌కు 2,160 ఆధిక్యం
సత్తుపల్లిలో సండ్ర వెంకటవీరయ్య (భారాస) 418 ఓట్ల ఆధిక్యం

03/12/2023 09:19(IST)

వరంగల్‌ తూర్పు కాంగ్రెస్ అభ్యర్థి కొండా సురేఖ ముందంజ

చెన్నూరులో గడ్డం వివేకానంద (కాంగ్రెస్) ఆధిక్యం
జుక్కల్‌లో భారాస అభ్యర్థి షిండే ముందంజ
కొత్తగూడెంలో సీపీఐ అభ్యర్థి కూనంనేని సాంబశివరావు ఆధిక్యం
భూపాలపల్లిలో కాంగ్రెస్‌ అభ్యర్థి సత్యనారాయణరావు ముందంజ
నిర్మల్‌లో భాజపా అభ్యర్థి మహేశ్వర్‌రెడ్డి ముందంజ
మక్తల్‌లో కాంగ్రెస్‌ అభ్యర్థి శ్రీహరి ముందంజ

03/12/2023 09:12(IST)

నర్సంపేటలో భారాస ఆధిక్యం

వరంగల్ జిల్లా నర్సంపేట నియోజకవర్గం మొదటి రౌండ్‌లో భారాస ఆధిక్యం సాధించింది. బీఆర్‌ఎస్‌ అభ్యర్థి పెద్ది సుదర్శన్‌రెడ్డి 2,156 ఓట్లు సాధించగా, కాంగ్రెస్‌కు 1,633 ఓట్లు వచ్చాయి. దీంతో భారాస 507 ఓట్లతో లీడ్‌లో ఉంది.

03/12/2023 09:07(IST)

మధిర కాంగ్రెస్‌ అభ్యర్థి భట్టికి తొలి రౌండ్‌లో 2వేల ఓట్ల లీడ్‌

హుజూర్‌నగర్‌: ఉత్తమ్‌కుమార్‌రెడ్డి (కాంగ్రెస్‌) 2380 ఓట్లతో లీడ్‌
నకిరేకల్‌: వేముల వీరేశం (కాంగ్రెస్) 2408తో ఆధిక్యం
ఆలేరు: ఐలయ్య (కాంగ్రెస్‌) 760తో ఆధిక్యం
భువనగిరి: కుంభం అనిల్‌ (కాంగ్రెస్‌) 760 ఓట్ల మెజార్టీ

03/12/2023 08:42(IST)

పోస్టల్‌ బ్యాలెట్‌ ఓట్ల లెక్కింపులో కాంగ్రెస్‌ లీడింగ్‌

తెలంగాణలో ఓట్ల లెక్కింపు ప్రక్రియ కొనసాగుతోంది.
ముందుగా పోస్టల్‌, సర్వీస్‌ ఓట్లను లెక్కిస్తుండగా, చాలా స్థానాల్లో కాంగ్రెస్‌ ముందంజలో ఉంది.
ఖమ్మం 9 స్థానాల్లో కాంగ్రెస్‌, ఒక చోట సీపీఎం లీడ్‌లో ఉన్నాయి.
నల్గొండలో కోమటిరెడ్డి వెంకటరెడ్డి, మునుగోడులో రాజగోపాల్‌, మధిరలో భట్టి విక్రమార్క లీడ్‌లో ఉన్నారు.

03/12/2023 08:37(IST)

పోస్టల్‌ బ్యాలెట్‌ ఓట్ల లెక్కింపు.. వీళ్లు ముందంజ

బెల్లంపల్లిలో వినోద్‌ (కాంగ్రెస్‌)
ఖమ్మంలో తుమ్మల నాగేశ్వరరావు (కాంగ్రెస్‌)
కొడంగల్‌లో రేవంత్‌రెడ్డి (కాంగ్రెస్‌)
మంచిర్యాలలో ప్రేమ్‌సాగర్‌ (కాంగ్రెస్‌)
చాంద్రాయణగుట్టలో అక్బరుద్దీన్‌ (ఎంఐఎం)
కామారెడ్డిలో వెంకట రమణారెడ్డి (భాజపా)

03/12/2023 08:28(IST)

పోస్టల్‌ బ్యాలెట్లలో భారాస, కాంగ్రెస్‌ హోరా హోరీ

ప్రస్తుతం తెలంగాణలో ఎన్నికల ఫలితాలకు సంబంధించి పోస్టల్‌ బ్యాలెట్‌, సర్వీస్‌ ఓట్లను లెక్కిస్తున్నారు. తాజాగా అందుతున్న సమాచారం ప్రకారం భారాస, కాంగ్రెస్‌ల మధ్య పోరు హోరాహోరీగా ఉన్నట్లు తెలుస్తోంది. రాష్ట్రంలో అధికార కైవసానికి మేజిక్‌ ఫిగర్‌ 60 సీట్లు.

03/12/2023 08:13(IST)

ఉదయం 8.30 గంటల తర్వాత ఈవీఎంలోని ఓట్ల లెక్కింపు

తెలంగాణ సహా నాలుగు రాష్ట్రాల్లో ఓట్ల లెక్కింపు ప్రక్రియ షురూ అయింది. ప్రస్తుతం పోస్టల్‌, సర్వీస్‌ ఓట్లను లెక్కిస్తున్నారు. 8.30గంటల నుంచి ఈవీఎంలలో పోలైన ఓట్ల లెక్కింపు జరగనుంది. తెలంగాణలో 119 స్థానాల్లో ఓట్ల లెక్కింపు కోసం 1,798 టేబుళ్లను ఏర్పాటు చేశారు. 2,417 రౌండ్లలో ఓట్ల లెక్కింపు జరగనుంది.

03/12/2023 08:00(IST)

తెలంగాణ సహా నాలుగు రాష్ట్రాల ఎన్నికల ఓట్ల లెక్కింపు ప్రారంభం

నాలుగు రాష్ట్రాల అసెంబ్లీ ఎన్నికల ఓట్ల లెక్కింపు ప్రారంభమైంది. నెల రోజులుగా ఉత్కంఠ రేపిన తెలంగాణ అసెంబ్లీ ఎన్నికలతో పాటు రాజస్థాన్‌, మధ్యప్రదేశ్‌, ఛత్తీస్‌గఢ్‌లో ఓట్లను లెక్కిస్తున్నారు. తెలంగాణలోని మొత్తం 49 కేంద్రాల్లో ఉదయం 8 గంటల నుంచి కౌంటింగ్‌ను మొదలుపెట్టారు. తొలుత పోస్టల్ బ్యాలెట్‌ ఓట్లను లెక్కిస్తున్నారు. చార్మినార్‌లో పోలైన ఓట్లు అతి తక్కువగా ఉన్నందున మిగిలిన రెండింటి కంటే దాని ఫలితమే మొదట తెలుస్తుందని భావిస్తున్నారు. పది గంటల నుంచి ఫలితాల సరళి వెలువడే అవకాశం ఉంది.

అభ్యర్థులు.. విజేతల పూర్తి జాబితా కోసం క్లిక్‌ చేయండి

03/12/2023 07:40(IST)

కౌంటింగ్‌ సెంటర్‌కి చేరుకున్న భాజపా అభ్యర్థి రాజాసింగ్‌

గోషామహల్ నియోజకవర్గ ఓట్ల కౌంటింగ్‌కు పూర్తయిన ఏర్పాట్లు
కోఠి ఉమెన్స్ కాలేజీలో ఏర్పాటు చేసిన కౌంటింగ్ సెంటర్‌కు చేరుకున్న ఎన్నికల సిబ్బంది.
కౌంటింగ్ సెంటర్ వద్ద పటిష్ఠమైన పోలీస్ బందోబస్తు
ఐడీ కార్డులు చూసి లోపలికి అనుమతిస్తున్న పోలీసులు
కౌంటింగ్ సెంటర్‌కి చేరుకున్న భాజపా అభ్యర్థి రాజాసింగ్

03/12/2023 07:21(IST)

ఓట్ల లెక్కింపు ఇలా...

తొలుత పోస్టల్‌ ఓట్లను 25 బ్యాలెట్ల చొప్పున కట్టలు కట్టి.. లెక్కిస్తారు.
ఇవి పూర్తయ్యాక.. అభ్యర్థులు లేదా వారి ప్రతినిధుల సమక్షంలో ఈవీఎంలను భద్రపరిచిన స్ట్రాంగ్‌ రూమ్‌ను తెరిచి కంట్రోల్‌ యూనిట్లను టేబుల్‌కు ఒకటి చొప్పున బయటకు తీసుకొస్తారు.
కంట్రోల్‌ యూనిట్‌లోని ‘టోటల్‌’ బటన్‌ను నొక్కగానే ఎన్ని ఓట్లు పోలయ్యాయో తెలుస్తుంది. పోలైన ఓట్ల వివరాలను 17-సి పేరిట నమోదు చేసిన రికార్డుతో.. కంట్రోల్‌ యూనిట్‌లో వచ్చిన మొత్తం ఓట్లతో సరిపోయాయా? లేదా? అని పరిశీలిస్తారు.
ఆ తరువాత ‘రిజల్ట్స్‌’ మీటను నొక్కగానే ఒక్కో అభ్యర్థికి ఎన్ని ఓట్లు వచ్చాయో కనిపిస్తాయి. ఆ వివరాలను ఇటు అధికారులు, అటు పోలింగ్‌ ఏజెంట్లు నమోదు చేసుకుంటారు. ఏజెంట్ల నుంచి ఆమోదం లభించిన తరువాత వారి సంతకాలు తీసుకుంటారు. అనంతరం మరో కంట్రోల్‌ యూనిట్‌ను లెక్కిస్తారు.
ఇలా ఒక్కో విడతకు 14 కంట్రోలు యూనిట్లలోని వివరాలు లెక్కించేలా 14 టేబుల్స్‌ ఏర్పాటు చేశారు. 14 ఈవీఎంల లెక్కింపు పూర్తయితే ఒక రౌండు ముగిసినట్లు. అభ్యర్థులు, ఓటర్లు అధికంగా ఉన్న నియోజకవర్గాల కోసం ఏర్పాటు చేసిన నియోజకవర్గాల్లో 28 ఈవీఎంల లెక్కింపును ఒక రౌండుగా పరిగణిస్తారు.
అన్ని రౌండ్ల లెక్కింపు పూర్తయ్యాక ఆ నియోజకవర్గ లెక్కింపు పరిశీలకుడు, ఏజెంట్ల సమక్షంలో.. ర్యాండమ్‌గా అయిదు వీవీప్యాట్స్‌ను ఎంపిక చేస్తారు. వాటిలోని ట్రేలను తెరిచి ఓటరు స్లిప్పులను లెక్కిస్తారు.
ఇలా అయిదు వీవీ ప్యాట్‌లలో లెక్కించిన వివరాలకు.. అంతకుముందు ‘17-సి’లో నమోదు చేసిన ఓట్ల సంఖ్యకు సరిపోలితే అధికారులు, ఏజెంట్ల ఆమోదంతో ఫలితాన్ని ప్రకటిస్తారు.

03/12/2023 07:06(IST)

గ్రేటర్‌ పీఠం.. ఎవరిదో ఆధిపత్యం

రాజధానిలో ఎక్కువ సీట్లు గెలుస్తామని ప్రధాన పార్టీల నేతలు ఎవరికి వారు ధీమా వ్యక్తం చేస్తున్నారు. అధికార పీఠం అందుకోవాలంటే నగరంతోసహా చుట్టుపక్కల ఉన్న 29 నియోజకవర్గాలు కీలకం. హైదరాబాద్‌ జిల్లా (15), మేడ్చల్‌ (5), రంగారెడ్డి జిల్లా (8), పటాన్‌చెరు నియోజకవర్గాలు ఇందులో ఉన్నాయి. ఇక్కడ ఎవరికి ఆధిక్యం రాబోతుందనేది నేడు తేలనుంది. చాలా నియోజకవర్గాల్లో త్రిముఖ పోరు, కొన్నిచోట్ల చతుర్ముఖ పోరు ఉండటంతో ఫలితాలపై ఉత్కంఠ నెలకొంది.

పూర్తి కథనం కోసం క్లిక్‌ చేయండి

03/12/2023 06:47(IST)

‘సెమీఫైనల్స్‌’పై సర్వత్రా ఉత్కంఠ

మరికొన్ని నెలల్లో జరగబోయే లోక్‌సభ ఎన్నికలకు అసలుసిసలు సెమీ ఫైనల్స్‌గా రాజకీయ పక్షాలు పరిగణించిన శాసనసభ ఎన్నికల ఫలితాలు ఆదివారం వెలువడనున్నాయి. గురువారం ఎన్నికలు పూర్తయిన వెంటనే వేర్వేరు సంస్థలు, మాధ్యమాలు తమతమ అంచనాలను ఎగ్జిట్‌ పోల్స్‌ రూపంలో వెలువరించిన సంగతి తెలిసిందే. కాంగ్రెస్‌, భాజపాలకు చెరో రెండు రాష్ట్రాలు లభించవచ్చని, మిజోరంలో మాత్రం ఈ రెండు పార్టీలు కాకుండా స్థానిక రాజకీయ పక్షాల మధ్యే హోరాహోరీ పోరు ఉంటుందని అంచనాలు వెలువడ్డాయి. అవి ఎంతవరకు వాస్తవమనేది ఆదివారం తెరవబోయే ఎలక్ట్రానిక్‌ ఓటింగ్‌ యంత్రాలు తేటతెల్లం చేయనున్నాయి.

పూర్తి కథనం కోసం క్లిక్‌ చేయండి.

03/12/2023 06:33(IST)

పది గంటలకల్లా ఫలితాల సరళి!

నెల రోజులుగా ఉత్కంఠ రేపిన రాష్ట్ర అసెంబ్లీ ఎన్నికల ఫలితాలు ఆదివారం వెలువడనున్నాయి. రాష్ట్రవ్యాప్తంగా ఓట్ల లెక్కింపునకు అధికారులు సర్వం సిద్ధం చేశారు. మొత్తం 49 కేంద్రాల్లో ఉదయం ఎనిమిది గంటలకు కౌంటింగ్‌ ప్రారంభం కానుంది. రాష్ట్రంలోని 119 అసెంబ్లీ నియోజకవర్గాలకు గురువారం పోలింగ్‌ జరిగిన విషయం తెలిసిందే. రాష్ట్రంలోని 35,655 పోలింగ్‌ కేంద్రాలకు సంబంధించిన ఈవీఎంలలో నమోదైన ఓట్లను లెక్కించాల్సి ఉంది. భద్రాచలం, అశ్వారావుపేట, చార్మినార్‌ నియోజకవర్గాల్లో లెక్కింపు రౌండ్లు తక్కువగా ఉండడంతో వీటిలో ఏదో ఒక స్థానం ఫలితం తొలుత వెలువడవచ్చని అంచనా. చార్మినార్‌లో పోలైన ఓట్లు అతి తక్కువగా ఉన్నందున మిగిలిన రెండింటి కంటే దాని ఫలితమే మొదట తెలుస్తుందని భావిస్తున్నారు.

పూర్తి కథనం కోసం క్లిక్‌ చేయండి

03/12/2023 06:29(IST)

కారు జోరా.. కాంగ్రెస్‌ హోరా..

హ్యాట్రిక్‌ విజయంతో మూడోసారి గద్దెనెక్కాలని అధికార పార్టీ భారాస.. తెలంగాణ రాష్ట్రం ఏర్పడ్డాక.. ‘చేతి’కి చిక్కని పీఠాన్ని అందుకోవాలని కాంగ్రెస్‌.. ఇక్కడ అధికారం సాధించి తెలుగు రాష్ట్రాల్లో బోణీ కొట్టాలన్న ఆశతో భాజపా.. ఇంకా మరెన్నో పార్టీలు, ఎందరో ఆశావహులు ఎన్నికల బరిలో హోరాహోరీగా పోరాడారు. వీరందరి భవితవ్యం ఆదివారం తేలిపోనుంది. అత్యధిక సీట్లు సాధించి.. అధికారం దిశగా పయనించేదెవరో స్పష్టం కానుంది. రాష్ట్రంలో ఓటుహక్కు వినియోగించుకున్న 2.36 కోట్ల మంది తీర్పు ఎలా ఉందో తేలిపోనుంది. 2023 శాసనసభ ఎన్నికల ఫలితాలు ఆదివారం వెల్లడి కానున్నాయి.

పూర్తి కథనం కోసం క్లిక్‌ చేయండి