Breaking | Feedback | ePratibha | E-PAPER | Pratibha

సార్వత్రిక ఎన్నికలు - 2024... ఎగ్జిట్‌ పోల్స్‌ అంచనాలు ఇవీ!

Exit Polls Live Updates: 2024 సార్వత్రిక ఎన్నికల ఎగ్జిట్‌పోల్స్‌ వెలువడుతున్నాయి. లోక్‌సభ, ఏపీ అసెంబ్లీ ఎన్నికల్లో ఓటరు తీర్పు ఎలా ఉంటుందనే అంచనాలు మీ కోసం...

Updated : 01 Jun 2024 18:30 IST

02/06/2024 11:45(IST)

ఇండియా కూటమికి 295-310 సీట్లు: సంజయ్‌ రౌత్‌

ఎగ్జిట్‌ పోల్స్‌ను ‘కార్పొరేట్ల ఆట’గా కొట్టిపారేసిన శివసేన (యూబీటీ) నేత సంజయ్‌ రౌత్‌
ఇండియా కూటమి 295-310 స్థానాల్లో గెలుస్తుందని అంచనా
ఎగ్జిట్‌ పోల్స్‌ నిర్వహించిన సంస్థలపై తీవ్ర ఒత్తిడి ఉందని ఆరోపణ
బారామతిలో ఎన్సీపీ (ఎస్పీ) నేత సుప్రియా సూలే 1.5 లక్షల మెజారిటీతో గెలుస్తారని ధీమా
తమ శివసేన గతంలో సాధించిన 18 సీట్లను నిలబెట్టుకుంటుందని అంచనా
కాంగ్రెస్‌ అత్యుత్తమ ప్రదర్శన కనబరుస్తుందని వ్యాఖ్య
యూపీలో ఇండియా కూటమి 35, బిహార్‌లో ఆర్జేడీ 16 సీట్లు గెలుస్తుందని జోస్యం

02/06/2024 11:29(IST)

ఆ మాటలు విని సమయం వృథా చేసుకోవద్దు: ప్రశాంత్‌ కిశోర్‌

ఎగ్జిట్‌ పోల్స్‌ తర్వాత తొలిసారి స్పందించిన రాజకీయ వ్యూహకర్త ప్రశాంత్‌ కిశోర్‌
‘‘ఈ సారి ఎప్పుడైనా ఎన్నికలు, రాజకీయాలపై చర్చలు జరుగుతుంటే.. నోరేసుకుపడే రాజకీయ నాయకులు, స్వయం ప్రకటిత సోషల్‌ మీడియా మేధావుల గురించి పనికిమాలిన చర్చలు, విశ్లేషణలపై మీ సమయం వృథా చేసుకోవద్దు’’ అని వ్యాఖ్య

01/06/2024 20:56(IST)

ఇవి ఎగ్జిట్‌ పోల్స్‌ కాదు.. ఎగ్జాక్ట్‌ పోల్స్‌: సీఎం రమేశ్‌

కేంద్రంలో భాజపా ప్రభుత్వం ఏర్పాటు కానుంది: అనకాపల్లి భాజపా ఎంపీ అభ్యర్థి సీఎం రమేశ్‌
రాష్ట్రంలో ఎన్డీయే కూటమి అధికారంలోకి వస్తోంది
ఐదేళ్లుగా ప్రజలు పడ్డ కష్టాలు తీరబోతున్నాయి
ఇవి ఎగ్జిట్‌ పోల్స్‌ కాదు.. ఎగ్జాక్ట్‌ పోల్స్‌
ప్రజలు మార్పు కోరుకున్నారు.. అదే జరిగి తీరుతుంది: సీఎం రమేశ్‌

01/06/2024 17:48(IST)

Exit Polls 2024: కాసేపట్లో వెలువడనున్న ఎగ్జిట్‌పోల్స్‌

కాసేపట్లో ముగియనున్న ఏడో విడత పోలింగ్‌
పోలింగ్‌ సమయం ముగిశాక వెలువడనున్న ఎగ్జిట్‌పోల్స్‌
ఎగ్జిట్‌పోల్స్‌పై దేశవ్యాప్తంగా నెలకొన్న ఆసక్తి
ఎగ్జిట్‌ పోల్స్‌ నిర్వహించిన వివిధ మీడియా, సర్వే సంస్థలు

01/06/2024 17:33(IST)

ఇండియా కూటమికి 295 స్థానాలు: ఖర్గే

ఎన్నికల ఫలితాలపై కాంగ్రెస్‌ అధ్యక్షుడు మల్లికార్జున ఖర్గే కీలక వ్యాఖ్యలు చేశారు. ఇండియా కూటమికి 295 సీట్లు రాబోతున్నాయని చెప్పారు. శనివారం నిర్వహించిన ఇండియా కూటమి భేటీ అనంతరం ఆయన మీడియాతో మాట్లాడారు.

01/06/2024 16:49(IST)

సాయంత్రం 6.30 గంటలకు ఎగ్జిట్‌ పోల్స్

లోక్‌సభతో పాటు నాలుగు రాష్ట్రాల అసెంబ్లీ స్థానాలకు సంబంధించిన ఎగ్జిట్ పోల్స్‌ అంచనాలు మరి కాసేపట్లో వెలువడనున్నాయి. సాయంత్రం 6.30 గంటల నుంచి వివిధ మీడియా, సర్వే సంస్థలు తమ అంచనాలను వెలువరించనున్నాయి.

01/06/2024 16:46(IST)

ఎగ్జిట్‌ పోల్స్‌ అంచనాలు నిజమైన సందర్భాలు..

Exit polls: 1998 లోక్‌సభ ఎన్నికలు: ఈ ఎన్నికల్లో దాదాపు అన్ని ఎగ్జిట్‌ పోల్స్‌ ఫలితాల్ని కచ్చితంగా అంచనా వేశాయి. ఎగ్జిట్‌ పోల్స్‌ అన్నీ.. భాజపా నేతృత్వంలోని కూటమికి 200 సీట్లు దాటి దాదాపు మెజారిటీకిగా దగ్గరగా వస్తాయని అంచనా వేయగా.. 252 సీట్లు వచ్చాయి. కాంగ్రెస్‌ నేతృత్వంలోని పార్టీలకు 166 సీట్లు వచ్చాయి.

2014 లోక్‌సభ ఎన్నికలు: దాదాపు అన్ని ఎగ్జిట్‌ పోల్‌ సంస్థలు ఈ ఎన్నికల ఫలితాల్ని సరిగ్గానే అంచనా వేశాయి. కేంద్రంలో భాజపా నేతృత్వంలోని ఎన్డీయేకి స్పష్టమైన ఆధిక్యత వస్తుందని చెప్పాయి.
2019 లోక్‌సభ ఎన్నికలు: ఈసారి ఫలితాల్ని అన్ని సంస్థలూ దాదాపు దగ్గరగా అంచనా వేశాయి.
2021 అసెంబ్లీ ఎన్నికలు: కేరళ, పశ్చిమ బెంగాల్, తమిళనాడు, అస్సాం, పుదుచ్చేరి.. రాష్ట్రాల్లో ఎన్నికలు జరిగాయి. కేరళలో లెఫ్ట్‌ డెమోక్రాటిక్‌ ఫ్రంట్‌(ఎల్‌డీఎఫ్‌), అధికారాన్ని నిలబెట్టుకుంటుందనీ, పశ్చిమ బెంగాల్‌లో మమతా బెనర్జీ నేతృత్వంలోని తృణమూల్‌ కాంగ్రెస్‌ మళ్లీ అధికారం దక్కించుకుంటుందనీ చాలా సంస్థలు సరిగ్గానే అంచనా వేశాయి.
2023 అసెంబ్లీ ఎన్నికలు: తెలంగాణ అసెంబ్లీ ఎన్నికల్లో చాలా వరకూ ఎగ్జిట్‌ పోల్స్‌ కాంగ్రెస్‌ విజయాన్ని అంచనా వేశాయి. 119 సీట్లకుగాను టుడేస్‌ చాణక్య కాంగ్రెస్‌కు 71, బీఆర్‌ఎస్‌కు 33 సీట్లు వస్తాయని అంచనా వేసింది. ఆరా సంస్థ కాంగ్రెస్‌కు 58-67, బీఆర్‌ఎస్‌కు 41-44, భాజపాకు 5-7 సీట్లు వస్తాయంది. సీఎన్‌ఎన్‌- న్యూస్‌18 కాంగ్రెస్‌కు 56, బీఆర్‌ఎస్‌కు 48 సీట్లు వస్తాయని చెప్పాయి. తుది ఫలితాల్లో కాంగ్రెస్‌కు 64, బీఆర్‌ఎస్‌కు 39, భాజపాకు 8 సీట్లు వచ్చాయి.

01/06/2024 15:04(IST)

ఎగ్జిట్‌ పోల్స్‌ గురి తప్పిన సందర్భాలు ఇవీ..

2004 లోక్‌సభ ఎన్నికలు: ఎనిమిది నెలల పదవీ కాలం ఉండగానే, 2004లో అప్పటి ప్రధాని వాజ్‌పేయీ సారథ్యంలోని ఎన్డీయే ప్రభుత్వం లోక్‌సభను రద్దు చేసి ఎన్నికలకు వెళ్లింది. అంతకు కొద్దిరోజుల ముందే మధ్యప్రదేశ్, రాజస్థాన్, ఛత్తీస్‌గఢ్‌ అసెంబ్లీ ఎన్నికల్లో గెలుపూ ముందస్తుకు వారిని పురిగొల్పింది. ఆ సమయంలో ఎగ్జిట్‌ పోల్స్‌ సైతం తిరిగి ఎన్డీయేనే అధికారం చేపట్టే అవకాశాలు పుష్కలంగా ఉన్నట్లు చెప్పాయి. ఎన్డీయే కూటమికి 330 సీట్లు వస్తాయని ‘ఇండియా టుడే’, 270కి కాస్త అటూఇటూగా రావచ్చొని మిగతా సంస్థలు అంచనా వేశాయి. కానీ, ఫలితాలు మాత్రం అందుకు భిన్నంగా వచ్చాయి. ఎన్డీయే కూటమి కేవలం 181 స్థానాలకే పరిమితం కాగా.. మెజార్టీ సీట్లతో యూపీఏ అధికారంలోకి వచ్చింది.
2015 బిహార్‌ ఎన్నికలు: బిహార్‌ అసెంబ్లీకి 2015లో జరిగిన ఎన్నికల్లో ఎగ్జిట్‌ పోల్స్‌ అంచనాలు పూర్తిగా తలకిందులయ్యాయి. జేడీయూ-ఆర్జేడీ జట్టుగా బరిలోకి దిగిన ఈ పోరులో.. భాజపా కూటమికే మొగ్గు ఉన్నట్లు తేల్చాయి. అయితే, అందుకు విరుద్ధంగా జేడీయూ-ఆర్జేడీకి సంయుక్తంగా 178 సీట్లుగా రాగా.. భాజపా పక్షాలు 58తో సరిపెట్టుకోవాల్సి వచ్చింది.
2017 యూపీ ఎన్నికలు: ఉత్తర్‌ప్రదేశ్‌ అసెంబ్లీకి 2017లో జరిగిన ఎన్నికల్లో ఎగ్జిట్‌ పోల్స్‌ అన్నీ హంగ్‌ ఏర్పడుతుందని చెప్పాయి. కానీ, 202 స్థానాలతో భాజపా అతిపెద్ద పార్టీగా అవతరించి పాలనా పగ్గాలు చేపట్టింది.
2017 పంజాబ్‌ ఎన్నికలు: పంజాబ్‌ అసెంబ్లీకి 2017లో జరిగిన ఎన్నికల్లో మెజార్టీ సర్వే సంస్థలన్నీ ఆప్‌కే పీఠం అని నొక్కి చెప్పాయి. కానీ, 77 స్థానాల్లో విజయం సాధించిన కాంగ్రెస్‌.. ఆ అంచనాలన్నింటినీ పటాపంచలు చేసింది.
2020 బిహార్‌ ఎన్నికలు: బిహార్‌లో 2020లో జరిగిన అసెంబ్లీ ఎన్నికల్లో పలు సంస్థలు ఆర్జేడీకి అనుకూలంగా సర్వే ఫలితాలు ఇచ్చాయి. కానీ, బీజేపీ-జేడీయూ కూటమి అధికారం చేపట్టింది.

01/06/2024 14:39(IST)

ఎగ్జిట్‌ పోల్స్‌.. తొలి నాళ్లలో ఇలా..

Exit polls: భారత్‌లో ఈ ఎగ్జిట్‌పోల్స్‌ ప్రక్రియ రెండో సార్వత్రిక ఎన్నికలతో 1957లోనే మొదలైంది. ‘ఇండియన్‌ ఇన్‌స్టిట్యూట్‌ ఆఫ్‌ పబ్లిక్‌ ఒపీనియన్‌’ అనే సంస్థ ఈ సర్వే నిర్వహించేది. అయితే.. స్వాతంత్య్రానికి పూర్వమే బ్రిటిష్‌ పాలన కాలంలోనే కాంగ్రెస్‌ పార్టీ తమకు పడ్డ ఓట్లను అంచనా వేసే ప్రయత్నాలు చేసింది. 1937 యునైటెడ్‌ ప్రొవెన్షియల్‌ ఎన్నికల్లో... ఆ పార్టీ ఓ చిత్రమైన ప్రయోగం చేసింది. తమకు ఓటు వేసే ప్రతి ఒక్కరూ చిన్న కర్ర తీసుకొని రావాలని కోరింది. తమకు ఓటు వేసినవారు ఆ కర్రను పోలింగ్‌ స్టేషన్‌ దగ్గర్లోని ఓ చోట గుట్టగా వేయమంది. ఓటింగ్‌ పూర్తయ్యాక ఆ కర్రలన్నింటినీ లెక్కించి... తమకు ఎన్ని ఓట్లు పడ్డాయో అంచనాకు వచ్చేవారు. తర్వాత విజయానికి చిహ్నంగా కర్రల గుట్టను కాల్చి సంబరం చేసుకునేవారు.

01/06/2024 14:32(IST)

ఎగ్జిట్‌ పోల్స్‌ అంచనాలు ఎలా రూపొందిస్తారు?

Exit Polls: ఓటర్లపై ప్రభావం పడకుండా ఉండటం కోసమని... పోలింగ్‌ చివరి రోజు ఓటింగ్‌ సమయం పూర్తయ్యాకే... ఎగ్జిట్‌పోల్స్‌ను (Exit Polls) విడుదల చేయాలని ఎన్నికల సంఘం నిబంధన విధించింది. ఓటు వేసి వచ్చిన ఓటర్లలోంచి కొంతమందిని యాదృచ్ఛికంగా ఎంపిక చేసి... అడిగి తెలుసుకున్న సమాచారాన్ని క్రోడీకరించి... విశ్లేషించి చేసే గణాంకాల గమ్మత్తే ఈ ఎగ్జిట్‌ పోల్స్‌! శాస్త్రీయంగా చెప్పాలంటే దీన్ని సెఫాలజీగా పిలుస్తారు. ఈ లెక్కలు, విశ్లేషణలు చేసేవారిని సెఫాలజిస్టులంటారు! ఈ ఎగ్జిట్‌పోల్స్‌ కచ్చితత్వం అనేది అనేక అంశాలపై ఆధారపడి ఉంటుంది.

సర్వే చేసే సంస్థ ప్రామాణికత, అదెవరి కోసం పని చేస్తోందనేది తొలుత గమనించాల్సిన అంశం.
ఎంత మందితో సర్వే చేస్తున్నారేది కీలకం. వారిలో భిన్నత్వం (వివిధ మతాలు, కులాలు, జెండర్, యువకులు, మహిళలు... ఇలా) ఎంత అనేదీ ప్రధానం!
ఎంత ఎక్కువ మందిని సర్వేచేస్తే కచ్చితత్వం అంతగా ఉంటుందనేది ఓ నమ్మకం.
సాధారణంగా... ఓటు వేసి వచ్చిన తర్వాత ఓటర్లను నేరుగాగానీ, టెలిఫోన్‌ ద్వారాగానీ సంప్రదించి వారి నుంచి సర్వేయర్లు సమాచారం సేకరిస్తారు.
తర్వాత దాన్ని విశ్లేషించి... ఆయా పార్టీలకు వచ్చే ఓట్లశాతాన్ని, ఓట్లను అంచనా వేస్తారు.

01/06/2024 14:30(IST)

నేడే ఎగ్జిట్‌ పోల్స్‌

Exit Polls: ఓట్ల పండగలో ఆఖరి అంకం ఫలితాల వెల్లడే అయినా...అంతకుముందే అంతకంటే ఎక్కువ ఉత్కంఠ రేకెత్తించే ఘట్టం ఎగ్జిట్‌పోల్స్‌! (Exit Polls) పద్దెనిమిదో సార్వత్రిక ఎన్నికల చివరి దశ పోలింగ్‌ శనివారంతో ముగుస్తున్న నేపథ్యంలో... సాయంత్రం 6.30 గంటల తర్వాత ఎగ్జిట్‌ పోల్స్‌ వెలువడబోతున్నాయి. వివిధ సర్వే సంస్థలు, మీడియా సంస్థలు కలసి చేసే ఈ అంచనాలపై సర్వత్రా ఆసక్తి వ్యక్తమవుతోంది! ప్రధాని నరేంద్రమోదీ పదేపదే వల్లిస్తున్న ‘చార్‌సౌ పార్‌’ సాధ్యమయ్యేనా? (lok sabha exit polls) భాజపాకు సొంతంగా సీట్లు తగ్గుతాయా పెరుగుతాయా? విపక్ష ‘ఇండియా’ కూటమి పుంజుకుంటుందా?.. ఆంధ్రావని మొగ్గు ఎటు వైపు?(ap exit polls).. ఇలా ఎన్నో ప్రశ్నలు! వీటికి శనివారం నాటి ఎగ్జిట్‌పోల్స్‌ కచ్చిత సమాధానం ఇవ్వకున్నా... ఉజ్జాయింపుగా ఓ అంచనాను ముందుంచుతాయి. ఇవి కాస్త అటూఇటూగా నిజం కావొచ్చు... కాకపోవచ్చు! కానీ... అంతిమ ఫలితంపై మరింత ఉద్వేగాన్ని, ఉద్విగ్నతను పెంచుతాయి.