కరెంట్‌ అఫైర్స్‌

ఫిక్కీ లేడీస్‌ ఆర్గనైజేషన్‌ (ఎఫ్‌ఎల్‌ఓ) 41వ జాతీయ అధ్యక్షురాలిగా జోయ్‌శ్రీ దాస్‌ వర్మ 2024, మార్చి 29న బాధ్యతలు స్వీకరించారు. 2024-25 ఏడాదికి ఆమె ఈ హోదాలో కొనసాగుతారు. ఈశాన్య భారతానికి గౌరవ కాన్సుల్‌గా జోయ్‌శ్రీని ఇజ్రాయెల్‌ నియమించింది. వర్మ కాప్రో మేనేజ్‌మెంట్‌ సొల్యూషన్స్‌కు డైరెక్టర్‌గా వ్యవహరిస్తున్నారు.

తేజస్‌ ఎంకే1ఏ శ్రేణిలో రూపొందిన యుద్ధ విమానం ఎల్‌ఏ-5003 తన తొలి ప్రయాణాన్ని విజయవంతంగా పూర్తి చేసింది. పూర్తిస్థాయి స్వదేశీ పరిజ్ఞానంతో హిందుస్థాన్‌ ఏరోనాటికల్‌ లిమిటెడ్‌ (హెచ్‌ఏఎల్‌) ఈ యుద్ధ విమానాన్ని రూపొందించింది. 2024, మార్చి 28న బెంగళూరులోని హెచ్‌ఏఎల్‌ సంస్థ ప్రాంగణంలో ఈ ప్రయోగం నిర్వహించారు.

హైదరాబాద్‌కు చెందిన స్టార్టప్‌ సంస్థ స్కైరూట్‌ ఏరోస్పేస్‌ నిర్వహించిన రాకెట్‌ స్టేజ్‌-2 పరీక్ష విజయవంతమైంది. తిరుపతి జిల్లా శ్రీహరికోటలో ఉన్న సతీశ్‌ ధవన్‌ స్పేస్‌ సెంటర్‌ (షార్‌) వేదికగా 2024, మార్చి 28న ఈ ప్రయోగం నిర్వహించారు.

కేంద్ర ప్రభుత్వ అప్పులు 2023, డిసెంబరు నాటికి రూ.160.69 లక్షల కోట్లకు చేరాయి. 2023, సెప్టెంబరులో ఇవి రూ.157.84 లక్షల కోట్లుగా ఉన్నాయి. కేంద్ర ఆర్థికశాఖ 2024, మార్చి 28న ఈ వివరాలను వెల్లడించింది.

కరెంట్‌ అఫైర్స్‌ ఈబుక్స్‌ కోసం క్యూఆర్‌ కోడ్‌ స్కాన్‌ చేయండి.