బయోరియాక్టర్‌ పంట గోల్డెన్‌ రైస్‌!

టీఆర్‌టీ - 2024 బయాలజీ

జీవుల పుట్టుక, నిర్మాణం, లక్షణాలు, వర్గీకరణ, మనుగడ గురించి అధ్యయనం చేసే జీవశాస్త్రం పరిధి విస్తృతం. కంటికి కనిపించని సూక్ష్మజీవుల నుంచి ఆవరణ వ్యవస్థల వరకు ఎన్నో వర్గీకరణలు ఇందులో ఉన్నాయి. జీవుల లక్షణాలను జీవకణాల స్థాయిలో విశ్లేషించి ఎన్నో సమస్యలకు, వ్యాధులకు పరిష్కారాలను చూపుతుంది. బయోటెక్నాలజీతో జీవ ఎరువులు, ఇంధనాలు, మేలు రకం వంగడాలు, వైరస్‌ల పనిపట్టే టీకాల తయారీ సాధ్యమవుతోంది. పునరుత్పత్తి, ఫలదీకరణం సమస్యలను అధిగమించే విధంగా టెస్ట్‌ట్యూబ్‌ బేబీ విధానం వచ్చింది. జీవిని పోలిన జీవిని ప్రతిసృష్టించే క్లోనింగ్‌ ప్రక్రియ సంచలనాలను సృష్టిస్తోంది. జీవశాస్త్రంలో జరుగుతున్న ఇలాంటి ఆధునిక ఆవిష్కరణలపై పరీక్షార్థులకు అవగాహన ఉండాలి. జన్యువులు, కణజాలాలపై ప్రపంచవ్యాప్తంగా చేసిన పరిశోధనలు, వాటిపై తలెత్తిన ఆందోళనలతో పాటు దేశంలో సాధించిన పురోగతి గురించీ తెలుసుకోవాలి.