కరెంట్‌ అఫైర్స్‌

మాదిరి ప్రశ్నలు

2024, ఫిబ్రవరిలో భార్య యూజినీతో కలిసి కారుణ్య మరణానికి అనుమతి పొంది మరణించిన డ్రైస్‌ వాన్‌ అగ్ట్‌ (93) ఏ దేశానికి 1977-82 కాలంలో ప్రధానిగా పని చేశారు? (70 ఏళ్ల అన్యోన్య జీవితం గడిపిన ఈ జంట తుది దశలో రోగగ్రస్తులైన నేపథ్యంలో బతుకు భారమనిపించి కారుణ్య మరణానికి అనుమతి పొందారు. చేయి చేయి కలిపి, కళ్లలోకి ఆత్మీయంగా చూసుకుంటూ, చితిలో సైతం జతగా ఉంటామనే ఉదాత్త భావనకు  పరమోదాహరణగా ‘పాయిజన్‌ ఇంజక్షన్‌’తో జీవితాలకు ముగింపు పలికారు.)

జ: నెదర్లాండ్స్‌

ఏ ఆరు నదుల పరీవాహక ప్రాంతాల్లో కాలుష్య కట్టడే లక్ష్యంగా కేంద్ర జలశక్తి మంత్రిత్వ శాఖ దేశంలోని పన్నెండు ప్రఖ్యాత అత్యున్నత విద్యా సంస్థలతో ఇటీవల ఓ అవగాహన ఒప్పందం కుదుర్చుకుంది? (కాన్పుర్‌ ఐఐటీ సారథ్యంలో ఏడు విద్యాసంస్థలు గంగానది పరీవాహక నిర్వహణకు సంబంధించి ప్రత్యేక ప్రణాళికను రూపొందించి కేంద్రానికి అందించాయి. అది సత్ఫలితాలను ఇస్తున్న  నేపథ్యంలో కేంద్రం ఇలా విస్తృత కార్యాచరణపై దృష్టి సారించింది.)

జ: కృష్ణా, గోదావరి, కావేరి, మహానది, పెరియార్‌, నర్మదా

2024-25 ఐక్యరాజ్య సమితి బడ్జెట్‌కు భారత్‌ తన వాటాగా ఎంత మొత్తాన్ని కేటాయించింది? (2023-24లో ఈ మొత్తం 4.7 కోట్ల డాలర్లు (రూ.382.54 కోట్లు)గా ఉంది. భారత్‌ ఐక్యరాజ్య సమితి భద్రతా మండలిలో శాశ్వత సభ్యత్వం కావాలనుకుంటోంది. కానీ ఈ  విషయంలో అడుగు ముందుకు పడటం లేదు. ఈ నేపథ్యంలో తన మనోభావాలను నిర్మొహమాటంగా చాటి చెప్పేందుకు ఐరాసకు కేటాయించే వార్షిక నిధుల్లో ఇలా భారీగా (2023-24తో పోలిస్తే 54.25 శాతం తగ్గింపు) కోత విధించింది. ఐక్యరాజ్య సమితి మొత్తం బడ్జెట్‌ 340 కోట్ల డాలర్లు.)

జ: 2.1 కోట్ల డాలర్లు (రూ.175 కోట్లు)