కరెంట్‌ అఫైర్స్‌

మాదిరి ప్రశ్నలు

ప్రపంచ వాణిజ్య సంస్థ (డబ్ల్యూటీఓ) సభ్య దేశాల మంత్రుల 13వ సదస్సు (ఎంసీ 13)ను 2024, ఫిబ్రవరి 26 నుంచి 29 వరకు ఎక్కడ నిర్వహించారు? (ప్రజావసరాల కోసం ఆహార ధాన్యాలను నిల్వ చేసే హక్కు ప్రభుత్వానికి ఉందన్న అంశాన్ని డబ్ల్యూటీఓ గుర్తించాలని భారత్‌ ఈ సదస్సులో కోరింది. డబ్ల్యూటీఓ సంస్థాపక సభ్య దేశం హోదాలో వర్ధమాన దేశాల ప్రయోజనాల పరిరక్షణకు భారత్‌ గళం వినిపిస్తోంది.)

జ: అబూధాబీ

ప్రపంచ వన్యప్రాణుల సంరక్షణ దినోత్సవాన్ని ఏటా ఏ రోజున నిర్వహిస్తారు? (వన్యప్రాణులు, వృక్ష జాతులు భూగోళంపై పర్యావరణ సమతౌల్యతను కాపాడటంలో కీలక పాత్ర పోషిస్తాయి. మితిమీరిన మానవ కార్యకలాపాల వల్ల వాటి మనుగడకు తీవ్ర ముప్పు కలుగుతోంది. ఈ క్రమంలో అంతరించిపోయే ప్రమాదాన్ని ఎదుర్కొంటున్న అడవుల్లోని జంతు జాలం, వృక్ష జాతులను సమష్టిగా సంరక్షించుకోవాలనే లక్ష్యంతో 1973లో ఐరాస సాధారణ సభలో 183 దేశాల మధ్య ఒప్పందం కుదిరింది. అప్పటి నుంచి ఏటా ఈ దినోత్సవాన్ని నిర్వహిస్తున్నారు. వన్యప్రాణుల సంరక్షణలో డిజిటల్‌ ఆవిష్కరణలను అందుబాటులోకి తేవాలనే నినాదంతో ఈ ఏడాది ప్రచార కార్యక్రమాలను నిర్వహిస్తున్నారు.)
జ: మార్చి 3

ప్రముఖ సాహితీవేత్త, బహుముఖ ప్రజ్ఞా నిధి కళాప్రపూర్ణ గణపతి రాజు అచ్యుత రామరాజు శత జయంతి వేడుకలను 2024, మార్చి 5న నిర్వహించారు. 1924, మార్చి 5న ఈయన ఎక్కడ జన్మించారు? (ఉత్తరాంధ్ర ప్రాంతంలో సాహిత్యోద్యమాలకు ఈయన జీవగర్ర. విశాఖ ప్రాంత సాంస్కృతిక చరిత్రలో వీరిది ఒక విశిష్ట అధ్యాయం. ఆంధ్ర విశ్వవిద్యాలయం 1993లో ఈయనకు కళా ప్రపూర్ణ బిరుదు ప్రదానం చేసింది. 1977లో ఆంధ్రప్రదేశ్‌ సాహిత్య అకాడమీ సభ్యులుగా ఎంపికయ్యారు. 1983-92 మధ్య కేంద్ర సాహిత్య అకాడమీ ప్రాంతీయ సలహాదారుగా వ్యవహరించారు.)

జ: కాకినాడ జిల్లా, తుని మండలం, కొలిమేరు గ్రామం