సమాచారం సరళంగా.. స్పష్టంగా!

వందమంది ఉన్న తరగతిలో ఎంతమంది విద్యార్థులు ఏయే సబ్జెక్టులు ఇష్టపడుతున్నారో కనుక్కోవాలంటే లెక్కలేసి సంఖ్యల్లో చెప్పాలి. కానీ దాన్ని వేగంగా అర్థం చేసుకోవడం కాస్త కష్టం కావచ్చు. అదే కొన్ని వృత్తాల్లో ఆ వివరాలను ప్రదర్శిస్తే వెంటనే తెలిసిపోతాయి. సంక్లిష్ట సమాచారాన్ని సరళంగా, స్పష్టంగా వ్యక్తీకరించడానికి వృత్త రేఖాచిత్రాలు లేదా వెన్‌ డయాగ్రమ్స్‌ ఉపయోగిస్తారు. అవి భిన్న సెట్‌ల మధ్య సంబంధాలను సులువుగా బొమ్మల రూపంలో చెప్పేస్తాయి. దీంతో మెరుగైన నిర్ణయాలు తీసుకోవడం సాధ్యమవుతుంది. డేటాను ఆ విధంగా ప్రదర్శించగల సామర్థ్యాన్ని అభ్యర్థుల్లో అంచనా వేసేందుకు రీజనింగ్‌లో ‘వృత్త రేఖాచిత్రాల’పై ప్రశ్నలు అడుగుతుంటారు. ప్రాథమిక గణిత పరిక్రియలు, శాతాలు, నిష్పత్తులు, సగటు తదితరాలపై అవగాహన పెంచుకుంటే వాటికి తేలిగ్గా సమాధానాలను గుర్తించవచ్చు.