General Studies: గీతల్లో దొరుకుతుంది జవాబు!

జనరల్‌ స్టడీస్‌ రీజనింగ్‌

నిర్ణీత కాలంలో వాతావరణం, స్టాక్‌ మార్కెట్‌ల్లో సంభవించే మార్పులను తార్కికంగా పరిశీలిస్తే కచ్చితంగా వాటి గమనం చాలా వరకు అర్థమవుతుంది. దాన్నిబట్టి సరైన నిర్ణయం తీసుకోవడం సాధ్యమవుతుంది. అలాగే ఒక సంవత్సరం లేదా కొన్ని నెలల వ్యవధిలో వివిధ వస్తువుల అమ్మకాల తీరుతెన్నులను గుర్తించగలిగితే మార్కెటింగ్‌కు సంబంధించి అవసరమైన చర్యలు చేపట్టవచ్చు. వీటన్నింటి కోసం పెద్ద ఎత్తున డేటాను అధ్యయనం చేయాల్సి ఉంటుంది. సంక్లిష్టమైన ఆ సమాచారాన్ని సరళంగా, స్పష్టంగా, తక్కువ సమయంలో గ్రహించడానికి కొన్ని గీతల చిత్రాలను ఉపయోగిస్తారు. వాటిని వినియోగించగలిగిన సామర్థ్యాన్ని పోటీ పరీక్షార్థుల్లో అంచనా వేయడానికి రీజనింగ్‌లో డేటా ఇంటర్‌ప్రిటేషన్‌లో భాగంగా రేఖా చిత్రాలపై ప్రశ్నలు అడుగుతారు. ప్రాథమిక గణిత పరిక్రియలతోపాటు కొన్ని అంకగణిత మౌలికాంశాలను తెలుసుకుంటే సమాధానాలను సులభంగా కనుక్కోవచ్చు.