TGPSC Group 1 Prelims: గ్రూప్-1 ప్రిలిమ్స్ అభ్యర్థులకు అలర్ట్.. పరీక్ష కేంద్రం వద్ద వీటికి నో ఎంట్రీ!

హైదరాబాద్‌: తెలంగాణలో గ్రూప్‌- 1 ప్రిలిమినరీ పరీక్ష రాసే అభ్యర్థులకు టీజీపీఎస్సీ (TGPSC) కీలక సూచనలు చేసింది. జూన్‌ 9న ఉదయం 10.30గంటల నుంచి మధ్యాహ్నం 1గంట వరకు పరీక్ష జరుగుతుందని వెల్లడించింది. అభ్యర్థులను ఉదయం 9గంటల నుంచే పరీక్ష కేంద్రాల్లోకి అనుమతిస్తామని తెలుపుతూ బుధవారం రాత్రి  ఓ ప్రకటన విడుదల చేసింది. పది గంటలకు పరీక్ష కేంద్రం గేట్లు మూసివేస్తామని.. ఆ తర్వాత ఎవరినీ లోపలికి అనుమతించేది లేదని స్పష్టం చేసింది.

రాష్ట్రంలో 563 గ్రూప్‌-1 పోస్టుల భర్తీ కోసం ప్రిలిమినరీ పరీక్షకు టీజీపీఎస్సీ పకడ్బందీగా ఏర్పాట్లు చేస్తోంది. ఈ పరీక్షకు ఫిబ్రవరి 23 నుంచి మార్చి 16 వరకు ఆన్‌లైన్లో దరఖాస్తులు స్వీకరించగా.. రాష్ట్ర వ్యాప్తంగా దాదాపు 4.03 లక్షల మందికి పైగా అభ్యర్థులు దరఖాస్తు చేసుకున్నారు. అలాగే, TGPSC Group 1 Prelims పరీక్షకు సంబంధించిన హాల్‌ టికెట్లు జూన్‌ 1న మధ్యాహ్నం 2గంటల నుంచి డౌన్‌లోడ్‌ చేసుకోవచ్చని తెలిపింది. అలాగే, పరీక్ష కేంద్రం వద్ద అభ్యర్థులు అనుసరించాల్సిన జాగ్రత్తలపై పలు సూచనలు చేసింది.

ఎక్కువ సేపు చదవలేకపోతున్నారా? ఈ చిట్కాలు ట్రై చేయండి!

• కాలిక్యులేటర్లు, పేజర్లు, సెల్‌ఫోన్లు, ట్యాబ్‌లెట్స్‌, పెన్‌డ్రైవ్‌లు, బ్లూటూత్‌ పరికరాలు, వాచ్‌, మ్యాథమెటిక్స్‌ టేబుళ్లు, లాగ్‌బుక్‌లు, లాగ్‌ టేబుళ్లు, వాలెట్స్‌, హ్యాండ్‌ బ్యాగ్‌లు, పౌచ్‌లు, రైటింగ్‌ ప్యాడ్‌, నోట్స్‌, ఛార్ట్స్‌, జ్యువెలరీ, ఇతర గ్యాడ్జెట్లు/ ఎలక్ట్రానిక్‌ పరికరాలు, రికార్డింగ్‌ పరికరాలకు పరీక్ష కేంద్రంలోకి అనుమతిలేదు.
• అభ్యర్థులు చెప్పులు మాత్రమే ధరించాలి. షూ వేసుకోవద్దు. 
• పరీక్ష సమయం పూర్తయ్యే వరకు పరీక్ష కేంద్రం నుంచి బయటకు వెళ్లేందుకు అనుమతిలేదు. బయటకు వెళ్లే ముందు ఓఎంఆర్‌ షీట్‌ను ఇన్విజిలేటర్‌కు అందజేయాలి. 
• పరీక్ష కేంద్రం వద్ద బయో మెట్రిక్‌ ఉదయం 9.30గంటలకే మొదలవుతుంది. ఇన్విజిలేటర్‌ బయో మెట్రిక్‌ క్యాప్చర్‌ చేయకుండా అభ్యర్థుల పరీక్ష కేంద్రాన్ని వీడి వెళ్లొద్దు. ఒకవేళ ఎవరైనా తమ బయోమెట్రిక్‌లను ఇవ్వకపోతే.. వారి ఓఎంఆర్‌ జవాబు పత్రం మూల్యాంకనం చేయరు. 
• బయో మెట్రిక్‌ రికార్డింగ్‌కు ఆటంకం కలిగించే విధంగా మెహెందీ, తాత్కాలిక టాటూలు వేసుకోవద్దు. 
• అభ్యర్థుల విలువైన వస్తువులను భద్రపరుచుకొనేందుకు కమిషన్‌ పరీక్ష కేంద్రం వద్ద ఎలాంటి స్టోరేజీ సౌకర్యాన్ని ఏర్పాటు చేయదని గమనించాలి.
• అభ్యర్థుల సౌలభ్యం కోసం సమయాన్ని అంచనా వేసేందుకు ప్రతి అరగంటకు హెచ్చరిక బెల్‌ మోగిస్తారు. అభ్యర్థులు హాల్‌లో ఇన్విజిలేటర్‌ నుంచి కూడా సమయం అడిగి తెలుసుకోవచ్చు. 
• పరీక్ష కేంద్రం ఎక్కడ ఉందో ఆఖరి నిమిషంలో గందరగోళానికి గురవ్వకుండా  కనీసం ఒక్కరోజు ముందు వెళ్లి చెక్‌ చేసుకుంటే మంచిది. 
• పరీక్షకు హాజరయ్యే ముందు అభ్యర్థులు హాల్‌టికెట్‌, ఓఎంఆర్‌ ఆన్షర్‌ షీట్‌లోని సూచనల్ని జాగ్రత్తగా చూడాలి.