TSPSC: ప్రభుత్వ పాలిటెక్నిక్‌ కళాశాలల్లో లెక్చరర్‌ పోస్టులు.. హాల్‌ టికెట్లు విడుదల

హైదరాబాద్‌: ప్రభుత్వ పాలిటెక్నిక్‌ కళాశాలల్లో లెక్చరర్‌ పోస్టులకు సెప్టెంబరు 4 నుంచి 8 వరకు జరగనున్న కంప్యూటర్‌ ఆధారిత నియామక పరీక్షల హాల్‌ టికెట్లను వెబ్‌సైట్‌లో అందుబాటులో ఉంచినట్లు టీఎస్‌పీఎస్సీ కార్యదర్శి అనితా రామచంద్రన్‌ తెలిపారు. ఈ పరీక్షలు ఉదయం 10 నుంచి మధ్యాహ్నం 12: 30 వరకు, మధ్యాహ్నం 2.30 నుంచి సాయంత్రం 5 గంటల వరకు జరుగుతాయని పేర్కొన్నారు. వేర్వేరు సబ్జెక్టు పోస్టులకు దరఖాస్తు చేసిన అభ్యర్థులు.. ప్రతి సబ్జెక్టు హాల్‌టికెట్‌ విడిగా డౌన్‌లోడ్‌ చేసుకోవాలని వెల్లడించారు.

వీరు సబ్జెక్టు పరీక్షతో పాటు ఆ రోజు జరిగే జనరల్‌ స్టడీస్‌ పరీక్ష తప్పనిసరిగా రాయాలని స్పష్టం చేశారు. ఉదాహరణకు ఒక అభ్యర్థి మెకానికల్‌, ఆటోమొబైల్‌ ఇంజనీరింగ్‌ సబ్జెక్టులకు దరఖాస్తులు చేస్తే.. జనరల్‌ స్టడీస్‌ పేపర్‌-1 పరీక్ష తప్పనిసరిగా రాయాల్సి ఉంటుంది. మాక్‌ టెస్ట్‌ల కోసం వెబ్‌సైట్‌ను సంప్రదించాలని కమిషన్‌ వెల్లడించింది.