UPSC: నేషనల్‌ డిఫెన్స్‌ అకాడమీ, నేవల్‌ అకాడమీ అడ్మిట్‌ కార్డులు విడుదల

దిల్లీ: యూనియన్ పబ్లిక్‌ సర్వీస్‌ కమిషన్‌(UPSC) నిర్వహించే నేషనల్‌ డిఫెన్స్‌ అకాడమీ(NDA), నేవల్‌ అకాడమీ(NA) పరీక్ష(2)కు సంబంధించి అడ్మిట్‌ కార్డులను విడుదల చేసింది. ఈ పరీక్షకు దరఖాస్తు చేసిన వారు యూపీఎస్సీ అధికార వెబ్‌సెట్‌ upsc.gov.in,  upsconline.nic.inలలో సంబంధిత సమాచారంతో అడ్మిట్‌ కార్డులను పొందవచ్చు. సెప్టెంబర్‌ 3 వరకు అడ్మిట్‌కార్డులను డౌన్‌లోడ్‌ చేసుకోవచ్చని యూపీఎస్సీ పేర్కొంది. పరీక్షకు హాజరుకానున్న విద్యార్థులు ప్రింట్‌ తీసుకున్న ఈ-అడ్మిట్‌ కార్డుతో పాటు, ఫొటోను చూపించాల్సి ఉంటుంది. ఒకవేళ అడ్మిట్‌ కార్డుపై అభ్యర్థి ఫొటో సరిగా కనిపించకున్నా, మసకగా ఉన్న, ఒకవేళ ఫొటో లేకుండా ఉన్నా రెండు ఫొటోలను తీసుకురావాల్సి ఉంటుంది. అభ్యర్థికి సంబంధించిన సమాచారం అడ్మిట్‌కార్డుతో సరిపోలకుంటే వెంటనే usnda-upsc@nic.inకు ఈమెయిల్‌లో ఆగస్టు 23లోపు సంప్రదించాలని సూచించింది. 

సైన్యంలో చేరి దేశానికి సేవ చేయాలనే తపన, ఉన్నతోద్యోగాల్లో స్థిరపడాలనుకునే యువత కోసం యూపీఎస్సీ(UPSC) ఏటా రెండు సార్లు నేషనల్‌ డిఫెన్స్‌ అకాడమీ(NDA), నేవల్‌ అకాడమీ(NA) పరీక్ష నిర్వహిస్తుంది. వచ్చే ఏడాది జులై 2 నుంచి ఎన్‌డీఏ 152వ కోర్సు, ఇండియన్‌ నేవల్‌ అకాడమీ 114వ కోర్సులో ప్రవేశం పొందేందుకు 17 మే 2023న ఈ నోటిఫికేషన్‌ విడుదల చేసింది. జూన్‌ 6 వరకు అభ్యర్థుల దరఖాస్తులను తీసుకున్నారు. 3 సెప్టెంబర్‌ 2023న దేశవ్యాప్తంగా పరీక్ష నిర్వహించనున్నారు. మొత్తంగా 395 ఖాళీలు ఉండగా, వీటిలో నేషనల్ డిఫెన్స్ అకాడమీ పోస్టులు 370 (ఆర్మీ-208, నేవీ-42, ఏయిర్‌ఫోర్స్- 120) కాగా.. 28 గ్రౌండ్ డ్యూటీకి సంబంధించిన ఖాళీలు. నేవల్ అకాడమీ (10+2 క్యాడెట్ ఎంట్రీ స్కీమ్) ఖాళీలు 25 ఉన్నాయి. తెలుగు రాష్ట్రాల్లోని విశాఖ పట్నం, అనంతపురం, విజయవాడ, తిరుపతి, వరంగల్‌, హైదరాబాద్‌లలో పరీక్ష కేంద్రాలు ఉన్నాయి.