తాబేళ్ల కన్నీళ్లే అక్కడి సీతాకోక చిలుకలకు ఆహారం

రంగురంగుల సీతాకోక చిలుకలన్నీ తాబేళ్ల చుట్టూ చేరి ముద్దులతో ముంచేస్తున్నట్టు ఉన్నాయి కదూ ఇక్కడున్న చిత్రాల్ని చూస్తుంటే. కానీ ఈ ముద్దులముచ్చట వెనక అసలు కారణం వేరే ఉందండోయ్‌. మామూలుగా సీతాకోక చిలుకలు- పూల మీద వాలి మకరందాల్ని జుర్రుకుంటే... అమెజాన్‌ అడవుల్లో ఉండే సీతాకోక చిలుకలు మాత్రం ఇలా అక్కడి తాబేళ్ల కన్నీళ్లలోని లవణాల్ని తీసుకుంటాయి. ఇక్కడుండే ఎనిమిది రకాల సీతాకోకచిలుక జాతులకు మిగిలిన ఆహారంతోపాటూ సోడియమూ అవసరమే. అప్పుడే వాటి జీవనం సాఫీగా సాగుతుంది. కానీ అమెజాన్‌ అడవిలోని చెట్లలో, నేలలో, చుట్టూ పరిసరాల్లో ఎక్కడా ఆ సోడియం దొరకకపోవడంతో తాబేళ్లూ, మొసళ్లలాంటి జీవుల కన్నీళ్లను తాగుతూ ఆ లోటును భర్తీ చేసుకుంటాయి. తాబేళ్లలోని అదనపు సోడియాన్ని మాత్రమే సీతాకోకచిలుకలు తీసుకోవడం వల్ల వాటికీ ఎలాంటి హానీ ఉండదట. ఇదీ ఈ సీతాకోక చిలుకల కన్నీటివిందు కథ!