సిల్లీపాయింట్‌

మాట్లాడుతూ ముఖంలో హావభావాలు పలికిస్తుంటాం కదా! వీటిని మిగతావాళ్ళకన్నా ఇటలీ ప్రజలే ఎక్కువగా ఉపయోగిస్తారట. వాటి కోసం డిక్షనరీలు ఉన్నాయక్కడ!

బంగారు తాపడంతో ఉన్న వేలూరు స్వర్ణ దేవాలయాన్నో, తిరుపతినో చూసి ఎంతగానో ఆశ్చర్యపోతాం కదా! అలా- భూమి మొత్తానికీ పూత వేసేంత బంగారం మన భూగర్భంలో ఉందట.

• ఆస్ట్రేలియాలో 1998 దాకా... ఇంట్లో బల్బు కాలిపోతే మనమే మార్చకూడదు. ఆపాటి పనికి కూడా సర్టిఫైడ్‌ ఎలక్ట్రీషియన్నే పిలవాలన్న రూలుండేది!
• అరుణాచల్‌ ప్రదేశ్‌, మిజోరం, నాగాలాండ్‌, లక్షద్వీప్‌- ఈ ప్రాంతాల్లోకి అడుగుపెట్టే పరాయి రాష్ట్రాలవాళ్ళు ఎవరైనా సరే ‘ఇన్నర్‌ లిమిట్‌ పర్మిట్‌’(ఐఎల్‌పీ) అనే అనుమతి పత్రాన్ని తీసుకోవాలి.
• కొన్ని రకాల ప్యాకేజ్డ్‌ చిప్స్‌ ఇట్టే నిప్పు అంటుకుంటాయి. పాశ్చాత్యదేశాల్లో ‘డొరిటో’ అన్న బ్రాండ్‌ కారణంగా అగ్నిప్రమాదాలూ జరిగిన దాఖలాలున్నాయి.
• జంతువుల్లో ఒక్క జిరాఫీలు మాత్రమే... కొమ్ములతో పుడతాయి.
• ప్రపంచంలో విడాకుల సంఖ్య ఎక్కువున్న దేశం మాల్దీవులు. ప్రతి వెయ్యి పెళ్ళిళ్ళలో ఐదు... పెటాకులవుతున్నాయట అక్కడ.
• ఉత్తర కొరియాలో ఫ్రిజ్‌ల్ని సంపన్నులు- ఓ స్టేటస్‌ సింబల్‌గా మాత్రమే వాడతారు. దేశానికి విశిష్ట సేవలందించినవాళ్ళూ, క్రీడల్లో రాణించినవాళ్ళకి అక్కడి ప్రభుత్వం ఫ్రిజ్‌లనే బహుమానంగా ఇస్తుంది. కాకపోతే ఆ దేశంలో విద్యుత్తు కోతలెక్కువ కాబట్టి... ఆ ఫ్రిజ్‌లని పుస్తకాలూ బట్టలూ పెట్టే అల్మారాలలాగే వాడుతున్నారక్కడ.
• నగల ఉత్పత్తిలోనే కాదు, వాడకంలోనూ చైనాయే ఫస్ట్‌. భారత్‌ది మూడో స్థానం. మరి రెండో స్థానం ఎవరిదంటారా- అమెరికాయే! అక్కడ స్థిరపడిన భారతీయులు, చైనీయులూ ఇందుకు కారణమని చెబుతున్నారు.
• షాపింగ్‌ మాల్స్‌ ప్లే ఏరియాల్లో ఉండే పోకర్‌ మెషిన్‌లని పాశ్చాత్య దేశాల్లో జూదానికి వాడతారు! ఆటగాళ్ళని అది నిలువుదోపిడీ చేస్తుంది కాబట్టి ‘వన్‌హ్యాండ్‌ బండిట్‌’ (ఒంటిచేతి బందిపోటు) అని కూడా పిలుస్తారు అక్కడ దాన్ని.
• సింగపూర్‌లో ఎవర్ని ఏ కారణంతో అరెస్టు చేసినా సరే- కనీసం 48 గంటలపాటు తమవాళ్ళు ఎవరితోనూ మాట్లాడనివ్వరు.
• ఎముక మజ్జ మార్పిడి శస్త్రచికిత్స చేయించుకున్నవారిలో... చాలా అరుదుగా రెండు బ్లడ్‌ గ్రూపులు కనిపిస్తాయి!
• కుక్కలూ పిల్లుల తర్వాత మనుషులు ఎక్కువగా పెంచుకునే జంతువు... కుందేలు.
• మీరు సినిమాకో షాపింగ్‌కో వెళ్ళారు. సడెన్‌గా ఫోన్‌ చూసుకుంటే- ఛార్జింగ్‌ 5 శాతమే ఉంది. అయ్యో ఇప్పుడెలా... మా వాళ్ళకెలా ఫోన్‌ చేయాలి అని ఆందోళనపడతారు కదా! దాన్నే ‘ఛార్జింగ్‌ యాంగ్జైటీ’ అంటున్నారు ఇప్పుడు. ప్రపంచంలో 57 శాతం మంది వారంలో ఒక్కసారైనా ఈ ఆందోళన అనుభవిస్తున్నారట.

10 వేల ఏళ్ళకిందటి దాకా మనుషులందరికీ కళ్ళు మామూలు రంగులోనే ఉండేవి. ఆ తర్వాత ఏర్పడ్డ జన్యుమార్పుల కారణంగానే మనలో పిల్లికళ్ళు ఏర్పడ్డాయట!

మనం రోజువారీ ఆహారంలో ఉప్పు వేసుకున్నట్టే...  సెంట్రల్‌ ఆఫ్రికన్‌ రిపబ్లిక్‌ దేశంలో తేనె వాడతారు. ప్రపంచంలో అత్యధికంగా తేనె దిగుమతి చేసుకునే దేశం
కూడా అదే.

ముందుభాగం- అదీ కిందివైపు కాస్త పొడవుగా ఉండే జపాన్‌ హైస్పీడ్‌ రైళ్ళని గమనించారా ఎప్పుడైనా! చూడటానికి ఓ పక్షి ముక్కులా ఉంటుందది. ఉండటం కాదు-
లకుముకి పిట్ట (కింగ్‌ఫిషర్‌) స్ఫూర్తితోనే ఆ ట్రైన్‌ని నిర్మించారట వాళ్ళు.

స్పైడర్‌ మ్యాన్‌, సూపర్‌మ్యాన్‌, ఐరన్‌ మ్యాన్‌లే కాదు- పాశ్చాత్య కామిక్‌ ప్రపంచంలో స్పైడర్‌ ఉమన్‌, సూపర్‌ ఉమన్‌, ఐరన్‌ ఉమన్‌లూ ఉన్నారు.

అమెరికన్‌ కోళ్ళ ఫారాల్లో తెలుపు, ముదురు ఊదారంగే కాదు... నీలం, గులాబీ, పచ్చరంగు గుడ్లు పెట్టే కోళ్ళూ ఎక్కువగా ఉంటాయి.