అందాల గాజు బొమ్మ... కళ్లు చెదరనీయదమ్మా!

టేబుల్‌ మీద పెట్టుకునే పేపర్‌ వెయిట్‌... కేవలం కాగితాలు కదలకుండా ఉంచడానికే కాదు, ఆ టేబుల్‌కే అలంకారంగానూ మారితే ఎలా ఉంటుంది అనుకున్నారేమో కొందరు గ్లాస్‌ ఆర్టిస్టులు- దాన్ని ఓ అద్భుతమైన ఆర్ట్‌పీస్‌గా తీర్చిదిద్దుతున్నారు. రంగు రంగుల పూలు, పచ్చని చెట్లు, ముచ్చటైన జీవులు, ఇంకా ఎన్నెన్నో ప్రకృతి దృశ్యాలూ- ఆ కళాకారుల నైపుణ్యానికి తలవంచుతూ గాజుబంతిలో అందంగా ఒదిగిపోయి చూపరుల్ని చకితుల్ని చేస్తున్నాయి. రంగుల గాజును కరిగించి, అది గట్టిపడకముందే నచ్చిన ఆకృతుల్ని తీర్చిదిద్దుతూ ఈ అందమైన పేపర్‌వెయిట్‌లకి రూపమిస్తున్నారు. చేయాలనుకున్న చిత్రానికి తగ్గట్టుగా ఆ బొమ్మల ఆకారాలు, వాటి అమరిక... అన్నీ సరిగ్గా రావాలంటే అందుకు ఎంతో ఓర్పూనేర్పూ కావాల్సిందే. అందుకే మరి, ఆ కళానైపుణ్యానికి ఫిదా అయిపోతున్నారందరూ!