చుట్టూ నీరు... మధ్యలో ఓ ఊరు!

నీటి మధ్యలో పచ్చని చెట్లతో పొందిగ్గా ఉన్న ఆ దీవిలోకి- స్వాగతం పలికే తోవే ప్రకృతి ప్రేమికుల్ని పరవశించేలా చేస్తుంది. అందులో అడుగుపెట్టాక అందమైన పొదరిళ్లలాంటి ఇళ్లూ, పాతకాలం నాటి నిర్మాణాలూ- చూసినవారిని మరింత ముగ్ధుల్ని చేస్తాయి. సావో జసెంటో పేరుతో పిలిచే ఈ దీవి మరెక్కడో లేదు. గోవాలోని జువార నదిలో సముద్రతీరానికి దగ్గర్లో ఉంటుంది.

ప్రకృతి ఒడిలో పుట్టినట్టుగా ఉండే ఈ దీవి, ఇదివరకు పోర్చుగీసు వాళ్లకు నివాసంగా ఉండేది. అందుకే ఆనాటి వాస్తు నైపుణ్యాల్ని ప్రతిబింబిస్తూ ఉంటాయి దీవిలోని భవనాలన్నీ. ఇప్పటికీ ఈ ఊళ్లోని స్థలాల్ని బయటివాళ్లకు అమ్మరు, ఇళ్ళను అద్దెకివ్వరు. ఇంచుమించు 200 ఇళ్లు, వందల ఏళ్లనాటి చర్చితో ఉండే ఈ దీవి మంచి పర్యటక ప్రాంతం. గోవాలోని సముద్రతీరాలతో పాటూ నీళ్లలో పాతకాలం నాటి కట్టడాలతో ఉండే ఈ ఊరినీ చూడ్డానికి సందర్శకులు ఎక్కడెక్కడి నుంచో వస్తుంటారు. దీవి చుట్టూ సరదాగా పడవల్లో షికారు కొడుతూ స్థానిక వంటల్ని ఆస్వాదిస్తుంటారట!