ఆకాశంలో... స్వింగ్‌ జరా!

ఎత్తయిన పర్వతాల మధ్యలో పొడవైన తాడుకు ఊయల కట్టి అందులో పడుకుంటే ఎలా ఉంటుంది... బాబోయ్‌ ఆ ఊహే కడుపులో భయం పుట్టిస్తుంది కదూ. కానీ నిజంగానే అలా చేసే సాహసికులున్నారు మరి. ఇటలీలోని మాంటీ పియనా పర్వతాల్లో ‘ఇంటర్నేషనల్‌ హైలైన్‌ మీటింగ్‌’ పేరుతో ఏటా ప్రపంచంలోని డేర్‌డెవిల్స్‌ ఈ స్కైక్యాంపింగ్‌ను ఏర్పాటు చేసుకుంటారు. వందలాది అడుగుల ఎత్తులో, రెండు పర్వతాల నడుమ, పొడవైన తాడు బిగించి, దానికి వరసగా ఉయ్యాలలు కట్టుకుంటారు. అంత ఎత్తుకి ధైర్యంగా చేరుకోవడమే కాదు... సరదాగా పాటలు పాడుతూ, గిటారు వాయిస్తూ, పుస్తకాలు చదువుతూ నచ్చిన పనులతో కాలక్షేపం చేస్తారు. అదంతా సరే, మరి జారిపడితే ఎలా అంటారా... ఆ భయం లేకుండా సేఫ్టీ బెల్టుల్లాంటివి వేసుకుంటారు. ఎంత రక్షణ ఏర్పాట్లు చేసుకున్నా... చూస్తేనే ఒళ్లు గగుర్పొడిచేలా ఆకాశంలో ఊయల ఊగడమంటే నిజంగా పెద్ద సాహసమే!